Şeyx Paşazadə axundları vətənpərvərliyi təbliğ etməyə çağırıb

Qafqaz Müsəlmanları İdarəsi (QMİ) Ramazan ayının başlanması ilə bağlı çərşənbə axşamı öz ofisində mətbuat konfransı keçirib.

    Mətbuat konfransında QMİ Qazilər Şurasının Azərbaycanda Ramazan ayının iyulun 21-dən başlanması haqda fitvası açıqlanıb. 

    QMİ sədri, Şeyxülislam Allahşükür Paşazadə Ramazan ayının ən vacib əməlinin oruc tutmaq olduğunu deyib. Oruc tutmağın təkcə müsəlmanlara yox, ondan əvvəlki ümmətlərə də əmr olunduğu xatırladılıb. Daha sonra diqqət din dövlət əlbirliyi məsələsinə yönəldilib. Dindən Azərbaycan dövləti əleyhinə istər şimalda, istər cənubda istifadə etmək istəyən maraqlı qüvvələr olduğu xatırladılıb. Ramazan ayını insanları maarifləndirmə üçün fürsət sayan QMİ sədri məscidlərə xütbələr göndəriləcəyini, axundların bu xütbə ətrafında öz cümə çıxışlarını quracaqlarını vurğulayıb. QMİ sədri axundlara dindən dövlət əleyhinə istifadə etmək istəyən qüvvələrə fürsət verməmək çağırışı edib. 

    Ramazan ayının iyulun 21-dən başlamasına gəlincə, Pirqulu rəsədxanasına isnadən, ayın iyulun 19-da bürcə girəcək, amma iyulun 20-si axşam gözlə görülə biləcəyi üçün orucluq iyulun 21-də başlayacaq. A.Paşazadə dövlətçilik naminə din xadimlərinə Dini Qurumlarla iş üzrə Dövlət komitəsinin yerli bölmələri və yerli icra hakimiyyətlərilə birgə fəaliyyət göstərmək tövsiyəsi verib.

    Dini Qurumlarla iş üzrə Dövlət Komitəsinin sədri Elşad İskəndərov din-dövlət münasibətləri mövzusunu davam etdirərək, dövlətin din xadimlərindən gözləntiləri olduğunu xüsusi vurğulayıb. Onun fikrincə, 70 il sovet dönəmində din xurafat halına salınıb və onu bu xurafatçılıqdan təmizləmək gözləntilərdən biridir. Dində ixtilaf yaradan mövzulardan qaçmaq, daha çox birləşdirici mövzularla bağlı xütbələrə üstünlük vermək tövsiyə edilib. Məscidlərdə Ramazan ayındakı xütbələrdə maarifləndirici xütbələrlə yanaşı, həm də vətənpərvərlik kimi mövzulara üstünlük verilməsi də tövsiyə olunub.

    Tədbirin sonunda QMİ QŞ-nın Ramazan ayının başlanması ilə bağlı fitvası açıqlanıb, orucluq günlərində imsak və iftar vaxtları ilə bağlı təqvimlər paylanıb. -05C-