Yerevan Azərbaycanın Xocalı aeroportuna olan haqqını etiraf etdi?

ATƏT-in Minsk qrupunun həmsədrləri bu yaxınlarda verdikləri bəyanatda Qarabağ münaqişəsi tərəflərini Xocalı aeroportu məsələsi ilə bağlı beynəlxalq konvensiya və sazişlərə uyğun şəkildə razılıq əldə etməyə çağırıb.

    “Azərbaycan XİN həmişə Azərbaycanın işğal edilmiş əraziləri üzərində aviareyslərin həyata keçirilməsinin yolverilməz olduğunu bildirib, belə ki, Ermənistan tərəfin bu qanunsuz addımı müxtəlif növ təxribatlara və insidentlərə səbəb ola bilər”, bu barədə XİN-in rəsmi nümayəndəsi bildirib.

    Öz növbəsində, Azərbaycan mülki aviasiya idarəsinin direktoru Arif Məmmədov qeyd edib ki, Azərbaycan Beynəlxalq Mülki Aviasiya Təşkilatına yeddi dəfə Dağlıq Qarabağda qanunsuz aeroport tikintisi barədə rəsmi məlumat verib, bunun əsasında təşkilat Ermənistana müvafiq xəbərdarlıq edib. 

    A.Məmmədov bildirib ki, Azərbaycanın bu məsələ ilə bağlı mövqeyi dəyişməz olaraq qalır. “Azərbaycanın icazəsi olmadan onun ərazisi üzərində mülki aviasiya təyyarələrinin uçuşu qadağan edilir”, deyə o bildirib.

    Bütün bunlara baxmayaraq, Ermənistan tərəfi Azərbaycanın işğal edilmiş əraziləri üzərindən reyslər həyata keçirəcəyi halda Azərbaycan tərəfin mümkün reaksiyası ilə bağlı şərh verən Məmmədov bu uçuşlara heç kimin təhlükəsizlik zəmanəti verməyəcəyini bildirib. “Heç kim belə bir zəmanət verə bilməz”, deyə o qeyd edib.

    Cümə günü ATƏT-in Minsk qrupunun həmsədrləri tərəfləri Qarabağ üzərində uçuşların qarşısının alınması üçün güc tətbiq etmək hədələrindən yayınmağa çağırıblar.

    Öz növbəsində, “Qarabağ mülki aviasiya idarəsinin” nümayəndəsi Dmitri Adbaşyan bu gün etiraf edib ki, yerli hava limanından mülki təyyarələrin uçuşları bir neçə həftəliyinə təxirə salınıb.

    İlk uçuş iyulun ortalarında həyata keçirilməli idi, lakin texniki səbəblərdən, daha dəqiq isə, təyyarəyə texniki xidmətlə bağlı müqavilə bağlanması ilə əlaqədar gecikir. “Hər şey bizdən asılı deyil, müqaviləni iki tərəf imzalayır, bizdən başqa ikinci tərəf də onu imzalamalıdır, məhz buna görə aeroportun işə düşməsi ilə bağlı konkret tarix söyləyə bilmərəm”, deyə Adbaşyan bildirib.

    Göründüyü kimi, o, Azərbaycan tərəfi nəzərdə tuturdu. Lakin bu müqavilənin hansı formatda imzalanmalı olduğu hələlik aydın deyil. 

    Xatırladaq ki, Qarabağda yeganə aeroport 1992-ci ilin fevralında ermənilər tərəfindən işğal edilmiş Xocalıda yerləşir. Bir il əvvəl ermənilər onu bərpa ediblər və istismara başlayacağını elan ediblər. -02D-