Siyasi partiyalar haqqında qanunun pozulmasına görə yeni cərimələr müəyyən edilib

Bakı/14.07.23/Turan: Bu gün Milli Məclis “Siyasi partiyalar haqqında” qanunvericiliyin pozulmasına görə yeni cərimələrin müəyyən edilməsilə bağlı İnzibati Xətalar Məcəlləsinə dəyişiklikləri qəbul edib.

Dəyişikliklərə görə, Azərbaycan ərazisində xarici dövlətlərin siyasi partiyalarının, habelə onların bölmələrinin və təşkilatlarının təsis edilməsinə və ya fəaliyyətinə görə fiziki şəxslər 700 manatdan 1000 manatadək, vəzifəli şəxslər isə 1 500 manatdan 2 000 manatadək, hüquqi şəxslər 6 000 manatdan 8 000 manatadək cərimə olunacaqlar.

Siyasi partiyanın səlahiyyət müddəti bitmiş orqanları (struktur qurumları) tərəfindən partiyanın fəaliyyətilə əlaqədar hər hansı hərəkətlərin edilməsinə, o cümlədən qərarların qəbul edilməsinə və ya sənədlərin imzalanmasına görə fiziki şəxslər 700 manatdan 1 000 manatadək məbləğdə cərimələnəcək.

Siyasi partiya üzvlərinin reyestrində baş vermiş sonrakı dəyişikliklər barədə "Siyasi partiyalar haqqında" qanunla müəyyən edilmiş müddətdə müvafiq icra hakimiyyəti orqanının müəyyən etdiyi orqana (quruma) məlumatın təqdim edilməməsinə görə vəzifəli şəxslər 1 000 manatdan 1 500 manatadək, hüquqi şəxslər isə 2 000 manatdan 3 000 manatadək cərimə olunacaqlar.

Əcnəbilərin və vətəndaşlığı olmayan şəxslərin partiyaya qəbuluna görə vəzifəli şəxslər 800 manatdan 1000 manatadək, hüquqi şəxslər isə 3000 manatdan 5000 manatadək cərimələnəcəklər.

Digər ölkələrin partiyaları ilə sazişin imzalanması və beynəlxalq təşkilatlara daxil olması barədə dövlət orqanına məlumat verilməməsinə görə vəzifəli şəxslər 500 manatdan 700 manatadək, hüquqi şəxslər isə 1500 manatdan 2000 manatadək cərimələnəcəklər.

Demokratik Təşəbbüslər İnstitutunun rəhbəri Akif Qurbanov hesab edir ki, formal baxımdan qanunun pozulmasına görə sanksiyaların tərbiqi normal prosesdir

Bununla yanaşı, o, yeni qanunun sərt şərtlərinə görə dövlət qeydiyyatı olmayan və ya yenidən qeydiyyatdan keçə bilməyən partiyaların qanunvericilik qadağasını tənqidi qiymətləndirib.

"Faktiki olaraq ölkəyə icazəli siyasi fəaliyyət gətirilir. Siyasi fəaliyyət birləşmə və ifadə azadlığından qaynaqlansa da. Əlbəttə ki, bu azadlıqlar mütləq deyil və məhdudlaşdırıla bilər, ancaq sosial məqsədəuyğunluqdan qaynaqlanmalıdır. Məhdudiyyətlər adekvat və mütənasib olmalıdır", - ekspert deyib.

O, partiya üzvlərinin reyestrinin yaradılmasını da tənqid edib.

Çünki Azərbaycan reallıqlarında dövlət orqanlarının partiya üzvləri haqqında məlumat alması siyasi fəaliyyətdən imtina etmək üçün onlara təzyiqlərə səbəb ola bilər.

Ümumilikdə, onun fikrincə, Azərbaycan hakimiyyəti təkcə "siyasi partiyalar haqqında" qanunla deyil, həm də "KİV haqqında" və "QHT haqqında" qanunlarla icazəli mühit yaradır.

“Yəni, icazəli vətəndaş cəmiyyəti, icazəli media, icazəli siyasi partiyaları yaradırlar. Beləliklə, İcazəli siyasət formalaşdırırlar ki, vətəndaşlar orada hakimiyyət tərəfindən müəyyən edilmiş çərçivədə iştirak edə bilsin ",- ekspert hesab edir.

Yanvarın 11-də qüvvəyə minən partiyalar haqqında yeni qanun bir çox müxalifətyönlü siyasi partiyanın kəskin tənqidinə səbəb olub . Onlar hesab edirlər ki, yeni qanun siyasi fəaliyyətin məhdudlaşdırılmasına və müxalifət partiyalarının ləğvinə yönəlib.

Azərbaycanın yerli müstəqil ekspertləri hesab edirlər ki, yeni qəbul edilmiş qanun demokratik standartlara uyğun deyil və dəyişdirilməlidir. Avropa Şurası Venesiya Komissiyası və ATƏT Demokratik Təsisatlar və İnsan Hüquqları Bürosu da bu sənədə mənfi ekspert rəyi verib.16D