Ş.Mustafayev: Bakının Brüssellə münasibəti strateji əhəmiyyət daşıyır

Avqustun 28-29-da Azərbaycanın iqtisadi inkişaf naziri və Avrointeqrasiya üzrə Dövlət Komissiyasının rəhbəri Şahin Mustafayev genişlənmə və Avropa qonşuluğu üzrə Avropa komissarı Ştefan Fülenin dəvəti ilə Brüsseldə səfərdə olub.

Səfər zamanı Mustafayev Avropa İttifaqının vitse-prezidenti, nəqliyyat üzrə Avropa komissarı S.Kallas, Ştefan Füle və Avropa İnkişaf Bankının vitse-prezidenti V.Moltererlə görüşüb.

Azərbaycanın Belçikadakı səfirliyinin press-relizində deyilir ki, Kallasla görüşdə Bakı-Tbilisi-Qars dəmir yolu layihəsinin həyata keçirilməsi və Qafqazda regional əməkdaşlıq məsələləri müzakirə olunub.

Mustafayev qeyd edib ki, tam regional inkişaf və əməkdaşlıq yalnız Ermənistan tərəfindən işğal edilmiş Azərbaycan ərazilərinin azad edilməsindən sonra mümkün ola bilər. 

Avropa Komissarı Kallass regionda sabitləşdirici rol oynayacaq bu layihəyə tam dəstək ifadə edib.

Füle ilə görüşdə Azərbaycan və Aİ arasında münasibətlərin inkişaf perspektivləri müzakirə olunub.

Mustafayev bildirib ki, Aİ ilə münasibətlərin möhkəmləndirilməsi Azərbaycanın xarici siyasətinin strateji istiqamətlərindən biridir. Aİ Azərbaycanın əsas iqtisadi tərəfdaşlarından və ən böyük investorlardan biridir.

Daha sonra Mustafayev və Füle Aİ – Azərbaycan 2012-ci il Fəaliyyət Planı üzrə Maliyyələşdirmə Sazişi imzalayıblar.

AİB-nin vitse-prezidenti Moltererlə görüş zamanı bankın Azərbaycanla əməkdaşlığı haqqında fikir mübadiləsi aparılıb və bu məsələ üzrə çərçivə sazişi imzalanıb. -02D-