Sumqayıtda seçkiqabağı təşviqat üçün yararsız yerlər ayrılıb

Hakimiyyətin seçkiqabağı mitinqlər və prezidentliyə namizədlərin seçicilərlə görüşlər üçün ayırdığı yerlərin siyahısından belə görünür ki, hazırki prezident İlham Əliyev, çətin ki, həmin yerlərə getsin. Siyahıda Əliyevin prezident olduğu 10 ildə heç olmasa bircə dəfə getdiyi yerlərin olmamasını başqa heç cürə izah etmək olmaz. Bu yerlərin əksəriyyəti şəhərlərin mərkəzlərindən uzaqda, nəqliyyat nöqteyi-nəzərdən çətin gedilən, viranə vəziyyətində olan yerlərdir. 

Məsələn, Turan-ın müxbiri Sumqayıt şəhərində “İnşaatçılar” stadionunda və “Nizami” kinoteatrında olub. Stadion 1970-ci illərdə inşaatından sonra təmir edilməyib. Stadion ərazisində təxminən 10 məcburi köçkün ailəsi yaşayır. Burada çoxdan idman yarışları keçirilmir və sahə viranə vəziyyətindədir.

“Nizami” kinoteatrı da bu xarakterli tədbirlərin təşkili üçün yararsız vəziyyətdədir. Ventilyasiya sistemi işləmir, zalın işıqandırılması aşağı səviyyədədir, kanalizasiya isə sıradan çıxıb. Bütün bu şərtlərə baxmayaraq, hakim “Yeni Azərbaycan” Partiyası bu günlər ərzində öz namizədinin xeyrinə seçicilərlə iki görüş keçirməyə müvəffəq olub.

Qeyd edək ki, son bir neçə ildə Sumqayıtda Dövlət Bayrağı Meydanı tikilib, Heydər Əliyev parkı salınıb, bələdiyyə parkı və M.Hüseynzadə adına stadion təmir edilib, Paralimpiya Mərkəzi, Olimpiya Kompleksi və digər obyektlər tikilib. Lakin hakimiyyət prezidentliyə namizədlərə bu yerlərdə seçicilərlə görüşmək imkanı yaratmağı lazım görməyiblər.

Müsavat Partiyasının Aparat rəhbəri Arif Hacılı KİV-ə bildirib ki, hakimiyyət “kütləvi aksiyalar üçün ən uğursuz yerləri ayırmağa çalışıblar”. -08B-