Türkiyə ekspertləri İran-Türkiyə-Azərbaycan ittifaqının yaradıla biləcəyini proqnozlaşdırırlar

Türkiyə mətbuatı Azərbaycanın dövlət başçısı İlham Əliyevin İran səfərinə dair geniş yer verib.

İnformasiya mənbələri İ.Əliyevin İran prezidenti Həsən Ruhanilə görüşünü “önəmli görüş” sayaraq ikili münasibətlərdə “yeni dönəmin başlaması” kimi dəyərləndirirlər.

H. Ruhanilə görüşdə İ.Əliyevin Qarabağ məsələsində İranın dəstəyinin mühüm əhəmiyyətə malik olmasına, bunun qarşılığında H.Ruhaninin  “terrora və ifratçı cərəyanlara qarşı əməkdaşlığa önəm verməsi”nə xüsusi diqqət yetirilir.

İ.Əliyev iqtisadi məsələ ilə bağlı təbii qaz sahəsində əməkdaşlıq üçün əlverişli şəraitin olduğunu qeyd edib.  Eyni zamanda hərbi sahədə əməkdaşlığın genişlənməsi üçün yeni yolların axtarılmasını vurğulayıb, mədəni sahədə yaxınlığın davam etdirilməsini önəmli sayıb.  

Şərhlərdə Türkiyənin baş nazirinin Azərbaycana səfəri, Rusiyanın Krımı işğal etməsi, Kremlin Azərbaycana mətbuat üzərindən təhdidləri fonunda İ.Əliyevin səfərinin əhəmiyyətinin bir daha artdığı nəzərə çatdırılır.

Ekspertlərə görə, Rusiyanın müdaxiləsi olduğu halda Türkiyə ilə birgə hərəkətə qəti şəkildə baxan Azərbaycan iqtidarı Ərdoğanın tələbi üzərinə İranı da ittifaq içinə almağa çalışır.

Bu məsələdə Rusiyadan təbii qaz asılılığını aradan qaldırmaq üçün Avropa Birliyinin yeni mənbələr axtarışına çıxmağa sövq etməsi də diqqətdən kənarda qalmır. Azərbaycan və İranın enerji resurslarının İran üzərindən Türkiyə və Avropaya daşınması mövzusunun da gizli qapılar arxasında gündəmə gətirildiyi iddiaları var. Bu isə yeni regional ittifaqın yaradla bilməsi  düşüncəsini  ortaya qoyur.-05D-