Türkiyə hərbi-texniki əməkdaşlıq sahəsində Azərbaycanın bir nömrəli tərəfdaşı olacaq

Bakı/13.08.20/Turan:  Prezident İlham Əliyev əmin olduğunu bildirib ki, yaxın zamanlarda Türkiyə hərbi-texniki əməkdaşlıq sahəsində Azərbaycanın bir nömrəli tərəfdaşı olacaq. Bu barədə İ.Əliyev cümə axşamı Bakıda Türkiyənin hərbi rəhbərlərindən ibarət nümayəndə heyəti ilə görüşündə  bildirib.  

Əsasən görüşdə Türkiyənin milli müdafiə naziri Hulusi Akarı, Türkiyə Silahlı Qüvvələrinin Baş Qərargah rəisi Yaşar Gülər, Türkiyə Quru Qoşunları, HHQ və HDQ komandanları və digər yüksək vəzifəli hərbçilər iştirak edib. Bu barədə Azərbaycan prezidentinin saytında dərc edilmiş məlumatda deyilir.

“Bu gün Türkiyə-Azərbaycan birgə hərbi təlimlərinin son günüdür. Hərbi təlimlərin birinci mərhələsi başa çatır. Bu, çox əlamətdar hadisədir, bizim birliyimizi, qardaşlığımızı bir daha göstərir”, - İ.Əliyev deyib.

“Hər il həm Azərbaycanda, həm də Türkiyədə 10-dan çox birgə təlim keçirilir. Ona görə bu təlimlərin keçirilməsi adi haldır. Burada hansısa bir fövqəladə hal axtarmaq lüzumsuzdur. Biz də müşahidə edirik ki, bu təlimlər bəzi ölkələrdə narahatlıq doğurur. Ancaq buna heç bir əsas yoxdur. Bu, Türkiyə-Azərbaycan birliyinin, qardaşlığının növbəti təzahürüdür”, - İ.Əliyev bildirib.

O, hərbi və hərbi-texniki sahədə də ikitərəfli əməkdaşlığın sürətlə inkişafını qeyd edib. 

“Sirr deyil ki, Türkiyənin hazırda çox güclü hərbi sənaye potensialı var və biz də bu potensialdan faydalanırıq. Biz çox sevinirik ki, Türkiyə bu gün ən müasir silahlar, hərbi texnika istehsal edir. Biz əlbəttə ki, bu günə qədər olduğu kimi, bundan sonra da bu imkanlardan faydalanmaq istəyirik. Əminəm ki, yaxın zamanlarda Türkiyə bütün başqa sahələrdə olduğu kimi, hərbi-texniki əməkdaşlıq sahəsində də bizim üçün bir nömrəli tərəfdaş olacaq”, - prezident vurğulayıb.

İ.Əliyev iyulun ortalarında “Ermənistan Silahlı Qüvvələrinin Azərbaycana növbəti hücumu” zaman Türkiyənin Azərbaycana dəstəyini qeyd edib.  

“Bizi ilk və birmənalı şəkildə dəstəkləyən ölkə Türkiyə oldu. Əziz qardaşım, hörmətli cümhurbaşqanı Rəcəb Tayyib Ərdoğan, hörmətli cənab nazir, siz, xarici İşlər naziri, digər vəzifəli şəxslər bir neçə dəfə çox kəskin və ciddi açıqlamalar vermisiniz ki, Türkiyə hər zaman Azərbaycanın yanındadır və hər zaman Azərbaycanla bir yerdə olacaq. Bu, bizi daha da ruhlandırır və yenə də bizim bir-birimizə nə qədər yaxın olduğumuzu göstərir”, - İ.Əliyev deyib.

O qeyd edib ki, bu intensiv birgə təlimlər gələcəkdə də davam edəcək.

“Tovuzdakı son hücumu ilk gündən cənab prezidentimiz başda olmaqla bütün 83 milyonluq xalqımız nifrətlə qınayır. Bu təxribatların böyük hücum və beynəlxalq hüquqa zidd olduğunu, Xocalı qətliamından, Dağlıq Qarabağın işğalından etibarən cinayətkar hərəkətlərin davamı olduğunu görürük. Buna qarşı bizim mövqeyimizi bilirsiniz. Azərbaycan bizim qardaşımızdır, bir ananın iki ayrı övladıyıq”, - Türkiyənin milli müdafiə naziri Hulusi Akar deyib.

O qeyd edib ki, Türkiyə bundan sonra da Azərbaycanla hərbi əməkdaşlığı inkişaf etdirəcək.  

“Bizim hərbi çərçivə müqavilələrimiz, hərbi təhsil sahəsində əməkdaşlığa dair razılaşmalarımız, müdafiə sənayesi sahəsində əməkdaşlığımız var. Bütövlükdə bunların məntiqi nəticəsi olaraq, 2010-cu ildə imzalanan strateji əməkdaşlıq sazişimiz var. Beləliklə, bu müqavilələr çərçivəsində bizim buraya səfərlərimiz, əlaqələrimiz, təlimlərdə bərabər iştirakımız son dərəcə təbii bir fəaliyyətdir. Biz ölkələrimizin suverenliyi, müstəqilliyi və təhlükəsizliyi üçün lazım olan nə varsa bu günə qədər etdik və bundan sonra da etməyə davam edəcəyik”, - H.Akar vurğulayıb.  06D-