Türkiyə prezidenti təhlükəsizlik qüvvələrini həssas olmağa çağırıb

Türkiyə prezidenti Abdulla Gül ölkə şəhərlərlində baş verən etiraz aksiyaları ilə bağlı bəyanat yayıb. 

Prezident demokratiya, plüralizm və hüququn aliliyinə söykənən Türkiyədə belə fərqli düşüncələrin, baxışların olmasını, önəmli mövzularda fərqli mövqe və  yanaşmaların ortaya çıxmasını təbii adlandırıb. “Bu, demokratik cəmiyyətin ən böyük zənginliyidir”-,  A.Gül bəyan edib. 

Onun fikrincə, əsas məsələ sivil diskussiya apara bilmək, dialoqa açıq olmaq, müxtəlif mövqeləri dinləməyi bacarmaqdır.  Cümhur başqanı demokratik cəmiyyətdə etirazların qayda-qanuna uyğun ifadə olunmalı olduğunu nəzərə çatdırıb. İqtidarı isə fərqli düşüncə və narahatlıqlara diqqətlə yanaşmağa çağırıb.      

A.Gül İstanbulun “Taksim” meydanında bir neçə gündən bəri davam edən aksiyalara təəssüf edib. İyunun 2-dən hadisələrin narahatedici səviyyəyə gəldiyini deyən prezident bu olaylara son qoymaq üçün hamını təmkinə çağırıb.    

Prezident təhlükəsizlik qüvvələrini vəzifələrini yerinə yetirərkən hər zamankından daha çox həssas olmağa, müdaxilə edərkən adekvat davranmağa və üzücü görüntülərin meydana gəlməsinə imkan verməməyə çağırıb. A.Gül baş nazir və digər səlahiyyətli şəxslərlə əlaqə saxlayaraq bu məqamları onlara da söylədiyini bildirib. -05D-