Ukrayna və ABŞ təhlükəsizlik sahəsində yardımı və Şimali Koreyanın müharibədə iştirakını müzakirə ediblər

Çərşənbə axşamı Vaşinqtonda Ukrayna prezidentinin baş köməkçisi və Bayden administrasiyasının yüksək vəzifəli şəxsləri ABŞ-ın Ukraynaya yardımını və Rusiyanın Kiyevə qarşı müharibəsində Şimali Koreyanın ehtimal olunan iştirakını müzakirə ediblər, - Turan-ın Vaşinqton müxbiri bildirib.

"Rusiyaya qarşı sanksiyalar və Moskvanın müttəfiqlərinə təzyiqin artması həlledici əhəmiyyətə malikdir", - prezident Zelenski administrasiyasının rəhbəri Andrey Yermak ABŞ-ın milli təhlükəsizlik üzrə müşaviri Ceyk Sallivan ilə görüşdən sonra bildirib.

"Biz Ukraynanın qələbə planını, sülh formulunun həyata keçirilməsini, cəbhə xəttini, silahları və Rusiyanın müharibəyə hazırladığı Şimali Koreya əsgərlərini müzakirə etdik", - o əlavə edib.

Səfər Şimali Koreyanın müharibəyə qoşulması halında Vaşinqtonun Ukraynanın Amerika silahlarından istifadəsinə məhdudiyyət qoymayacağı barədə xəbərlər fonunda baş tutub.

Çərşənbə axşamı Vaşinqton və NATO nümayəndələri Şimali Koreya hərbçilərinin artıq Rusiyanın Kursk vilayətində yerləşdirildiyini təsdiqləyiblər.

"Mən narahatam", - çərşənbə axşamı prezident Co Bayden Kurskdakı Şimali Koreya qoşunları ilə bağlı sualı cavablandırarkən jurnalistlərə deyib. “Ukraynalılar cavab zərbəsi endirməlidirmi?” sualına Bayden belə  cavab verib:"Əgər onlar Ukrayna ərazisinə keçərsə, bəli".

Andrey Yermak dövlət katibi Entoni Blinkenlə görüş zamanı ABŞ-ın hərbi və iqtisadi yardımını müzakirə edib, Dövlət Departamenti bildirib.