Vəkil Aslan İsmayılov DİN Baş Mütəşəkkil Cinayətkarlığa Qarşı Mübarizə İdarəsində ölümlə hədələnib

 Cümə axşamı vəkil Aslan İsmayılov DİN Baş Mütəşəkkil Cinayətkarlığa Qarşı Mübarizə İdarəsində hədə-qorxulara məruz qalıb. Ona bildirilib ki, əgər daxili işlər naziri Ramil Usubovu tənqidə son qoymasa onunla fiziki haqq-hesab çəkiləcək.

Bu barədə Turan-a A.İsmayılov özü məlumat verib. Onun sözlərinə görə, qətlə yetirilmiş həkim-kardioloqun işi üzrə zərərçəkmişin nümayəndəsi kimi cümə axşamı Nərimanov Rayon Prokurorluğunda olub. Saat 17.00-a yaxın BMCQMİ-nin müstəntiqi Canpolad Daanov ona telefon edərək israrla “bir məsələ ilə bağlı” bir neçə dəqiqəliyə idarəyə gəlməsini xahiş edib. 

A.İsmayılov həmin müstəntiqi tanıdığından xahişini yerə salmayıb.

Lakin idarəyə daxil olan kimi onu zirzəmiyə aparıblar. Daanov onu təhqir edib, Ramil Usubovu tənqid etdiyinə görə ona şillə vurub və bildirib ki, BMCQMİ-də bloger Rəşad Ağəddinə işgəncə verilib. Vəkilə bildirilib ki, “əgər yaşamaq istəyirsə, özünü yaxşı aparsın, bu, ona xəbərdarlıqdır”.

Xatırladaq ki, mayın 17-də mətbuat konfransında A.İsmayılov BMCQMİ-də R. Ağəddinə işgəncə verildiyini bildirib və DİN rəhbəri R.Usubovun istefasını tələb edib.

Vəkil buraxıldıqdan sonra Bakı Prokurorluğuna şikayətlə müraciət edib və Baş Prokurorluğun “qaynar xətt”inə zəng edib.

Bundan əlavə, A.İsmayılov baş verənlər barədə ABŞ səfirliyinə məlumat verib.

“İş onda deyil ki, məni vurdular və təhqir etdilər. Bu, Azərbaycanda özbaşınalığın son həddidir. Əgər mənə bir şey olarsa, məsuliyyəti DİN rəhbəri Ramil Usubov daşıyacaq. Çünki məni onun adından hədələdilər”, - A.İsmayılov bildirib.

Onun fikrincə, ölkədə vəziyyət kritik nöqtəyə çatıb, həqiqəti söyləyən hər kəs repressiya maşınının altına düşə bilər. Odur ki, cəmiyyət bu özbaşınalığa etirazını bildirməlidir.

A.İsmayılov deyib ki, hədə-qorxulardan və ölümdən qorxmur və onun özbaşınalığa qarşı mübarizəsini heç kim dayandıra bilməz.

Xatırladaq ki, mayın 8-də Vəkillər Kollegiyasının Rəyasət Heyəti A.İsmayılovun vəkil fəaliyyətinin dayandırılması və onun barəsində məhkəmə iddiasının qaldırılması, onun Vəkillər Kollegiyasından xaric edilməsi  ilə bağlı qərarlar  qəbul edib.

A.İsmayılov hesab edir ki, bu qərarlar onun korrupsiya, insan hüquqlarının pozulması faktlarını, məhkəmə-hüquq sistemi işçilərinin özbaşınalığını tənqid etməsilə bağlıdır.—06D—