Vəkil Fariz Namazlı DTX əməkdaşları tərəfindən 3 saat saxlanılıb

Vəkil Fariz Namazlı avqustun 31-də saat 21.00 radələrində Dövlət Təhlükəsizliyi Xidmətinin əməkdaşları tərəfindən saxlanılıb. O, üç saatdan sonra gecə yarısı buraxılıb.

E.Namazlının sözlərinə görə, o, cinayət işi üzrə şahid qismində dindirilib, amma hansı iş olduğu açıqlamayıb.

O, qeyd edib ki, iş günü başa çatdıqdan sonra saxlanılıb.

“Həmin cinayət işi ilə bağlı hər hansı məlumat verə bilməyəcəm, amma görünən odur ki, artıq yeni istiqamətə keçiblər. Ümid edirəm ki, mənim axşam, iş vaxtından sonra heç bir səbəb göstərilmədən idarəyə aparılmağım barədə Kollegiya rəhbərliyi və Baş Prokurorluğu məlumatlandırıblar. Çünki bu faktiki olaraq, tutulmağa bərabərdir. Vəkil tutulduqda dərhal həmin qurumlara məlumat verilməlidir. Digər tərəfdən, vəkilləri də artıq şahid qismində dindirməyə cəhd edirlər, bu da onların peşə fəaliyyətinin keyfiyyətli şəkildə həyata keçirməsinə mane olur”, - Namazlı Feysbukda yazıb.

Vəkil dövlətə xəyanətdə təqsirləndirilən talış tədqiqatçısı İqbal Əbilovun hüquqlarını müdafiə etdiyi məhkəmə iclasından bir neçə saat sonra saxlanılıb.

Eyni ittihamla gənc tədqiqatçı Bəhruz Səmədov həftədə 10 gün əvvəl həbs olunub.

Bu günlərdə Namazlı Feysbuk hesabında yazıb ki, indi Azərbaycanda sübut və dəlil olmadan istənilən şəxsi dövlətə xəyanət ittihamı ilə həbs edə bilərlər.

Vəkil Fariz Namazlı hüquq müdafiəçiləri tərəfindən siyasi məhbus kimi tanınan bir çox fəalların, jurnalistlərin, dindarların müdafiəsində iştirakı ilə tanınır.