Vəkil F.Qasımova qarşı cinayət işinin qərəzli və əsassız olduğunu bildirib

Alim-iqtisadçı Qubad İbadoğlunun cinayət işi üzrə həbs edilən Fazil Qasımov iyunun 14-dən istintaq təcridxanasında başlayan aclıq aksiyasını davam etdirir.

Bu barədə Turana iyunun 20-də F.Qasımovla görüşmüş vəkil Telman Qasımov məlumat verib.

Vəkil qeyd edib ki, F.Qasımov həbs olunduqdan sonra ona fiziki təzyiqlərə məruz qaldığını deyib.

“O dedi ki, hələ də başında ağrı və zədələr var. O, stress, psixi sarsıntı keçirib”, – vəkil bildirib.

O qeyd edib ki, F.Qasımov cinayət təqibi dayandırılana qədər aclıq aksiyasını davam etdirmək niyyətindədir. “Əlbəttə, mən ondan aclıq aksiyasını dayandırmasını xahiş etdim, çünki bu, səhhətinə ziyandır. Amma o, aclıq aksiyasını davam etdirəcəyini bildirdi və bu, onun hüququdur”, - deyə vəkil T.Qasımov bildirib.

Vəkilin şəxsi fikrincə, F.Qasımova qarşı cinayət işi “qərəzli və əsassızdır”.

“O, üç il Türkiyədə yaşayıb və birdən onu Bakıya gəlib kiməsə “saxta dollar satmaq”da ittiham edirlər...” vəkil davam edib.

O, ümid edir ki, gec-tez F.Qasımovun işinə xitam veriləcək, çünki qanun nöqteyi-nəzərindən ona qarşı ittihamları əsassızdır.

Penitensiar Xidmətdən şərh almaq mümkün olmayıb.

Bir müddət əvvəl hüquq müdafiəçisi Rüfət Səfərov bildirib ki, Qasımov saxlanılarkən və sonradan işgəncələrə, ləyaqəti alçaldan davranışa məruz qalıb və İbadoğluna iftira atmaq məcburiyyətində qalıb. Sonradan o, İbadoğluna qarşı verdiyi ifadələrdən imtina edib.

İqtisadçı Fazil Qasımov ötən ilin avqustunda Türkiyədə saxlanılıb və Azərbaycana gətirilib, burada saxta pul hazırlamaqda ittiham olunub. Həmin vaxt hakimiyyətyönlü KİV onun həbsinin bənzər ittihamlarla həbs olunmuş müxalif siyasətçi Qubad İbadoğlunun işi ilə bağlı olduğu haqqında məlumat yayıb.