Vəkil istintaq təcridxanasında Anar Məmmədli ilə görüşüb

Bu gün vəkil Elmar Süleymanov 1 saylı Bakı İstintaq Təcridxanasında Seçkilərin Monitorinqi və Demokratiyanın Tədrisi Mərkəzinin rəhbəri Anar Məmmədli ilə görüşüb.

Vəkilinin Turana verdiyi məlumata görə, Məmmədli karantinə yerləşdirilib.

Vəkilin sözlərinə görə, Məmmədli özünü normal hiss edir.

Eyni zamanda, Məmmədli ona qarşı irəli sürülən ittihamları rədd edir.

Məmmədlinin başına torba taxılaraq məhkəməyə gətirilməsinə dair yayılan məlumatlara münasibət bildirən vəkil bildirib ki, hüquq müdafiəçisi bu məlumatı təsdiqləməyib.

“Anar Məmmədli bildirdi ki, o məhkəməyə əllərinə arxadan qandal vurulu, başı aşağı əyilmiş halda gətirib aparıblar. Lakin başına torba  taxılmayıb”, vəkil qeyd edib.

Məmmədli istintaq təcridxanasında rəftardan şikayəti olmasa da, karantində antisanitar şəraitin olduğunu qeyd edib.

Vəkil qeyd edib ki, müdafiə tərəfi Məmmədlinin həbsindən mayın 2-də apellyasiya şikayəti verməyi planlaşdırır.

Anar Məmmədli aprelin 29-da “Abzas Media” işi üzrə saxlanılıb.  Aprelin 30-da məhkəmə onun barəsində 4 ay müddətinə həbs qətimkan tədbiri seçib.