Veteranlar Ukraynada həbs olunan Misir Qasımlının azadlığa buraxılmasını tələb edirlər

Bakı/16.08.22/Turan: Bu gün bir qrup veteran İkinci Qarabağ Müharibəsinin iştirakçısı Misir Qasımlıya qarşı cinayət təqibinə son qoyulması tələbilə Ukraynanın Azərbaycandakı səfirliyinin binasının önündə etiraz aksiyası keçirməyə cəhd edib.

Polis toplaşanların səfirliyin binasına yaxınlaşmasına icazə verməyib, ona görə də iştirakçılar diplomatik missiyanın binasından bir neçə yüz metr aralıda bəyanat oxuyublar.

Aksiya iştirakçılarının sözlərinə görə, Qasımlı uydurma ittihamla həbs edilib. O, bir il öncə hansısa erməni ilə baş vermiş insidentlə əlaqədar təqib olunur.

Qasımlının müraciət edənə güc tətbiq etməsinə dair heç bir sübutun olmamasına baxmayaraq, o həbs edilib və iş hazırda Apellyasiya Məhkəməsindədir.

Aksiya iştirakçıların fikrincə, Qasımlının əsassız təqib olunması Ukraynanın ədalət mühakiməsinə kölgə salır, Azərbaycan- Ukrayna münasibətlərinə xələl gətirir. Onlar Qasımlının dərhal azadlığa buraxılmasını və cinayət işinə xitam verilməsini tələb ediblər.

Qasımlının anası məhkəmənin işə qərəzli baxdığını qeyd edib. Onun sözlərinə görə, məhkəmə iclasları zamanı oğlunu başqa otaqda saxlayırlar. Bundan əlavə, Misir Qasımlının vəkillərinə təzyiq və təhdidlər var.

Aksiyanın qətnaməsi Ukrayna səfirliyinə təqdim edilib. -30B06-