Xankəndi elektrik enerjisini Azərbaycanın infrastrukturundan alır

Bakı/25.02.21/Turan: Rusiya sülhməramlıları Azərbaycanın Laçın rayonunun ərazisindəki su elektrik stansiyasının işə salınmasına kömək edib, bu barədə bu gün RF Müdafiə Nazirliyi məlumat yayıb.

Əldə olunmuş razılaşma nəticəsində Laçın Su Elektrik Stansiyasının turbin salonu Rusiya sülhməramlılarının məsuliyyət zonasında, ərazidəki su elektrik stansiyasının bəndi isə Azərbaycanın nəzarətindədir.

Rus sülhməramlı kontingentinin komandanlığının köməyi ilə hidroelektrik stansiyanın istismarı bərpa edilib. Hazırda rus sülhməramlıları enerji bloklarında və sistemlərində texniki xidmət işləri aparmaq üçün mühəndislərin təhlükəsizliyini və maneəsiz qəbulunu təmin edirlər, deyə Naziliyin məlumatında bildirilir.

“Bu stansiya Stepanakert şəhərinin (Xankəndi – Turan-ın qeydi) və ona yaxın yaşayış məntəqələrini elektrik enerjisi ilə təminatına imkan verir”, deyə məlumatda qeyd edilir.

Amma SES-in binası üzərində Rusiya bayrağının dalğalanması, bina üzərində erməni dilində yazının qalması sual doğurur. -0-