Xocalı faciəsi İstanbulun şəhər nəqliyatında anılacaq

İstanbul/25.02.20/Turan: Erməni terrorçularının 26 fevral 1992-ci ildə Azərbaycanın Qarabağ bölgəsinin Xocalı qəsəbəsində  müdafiəsiz dinc əhaliyə qarşı həyata keçirdikləri soyqırım İstanbulun şəhər nəqliyyatında anılmağa başlanıb.

Azərbaycanın İstanbul Baş konsulluğunun təşəbbüsüylə hazırlanan və Xocalı soyqırımının əsas fraqmentlərini əks etdirən 15 saniyəlik video material fevralın 24-dən başlayaraq  metrobuslarda və avtobuslarda quraşdırılan Modyo TV-də nümayiş etdirilir.

Baş konsulluqdan Turan agentliyinə daxil olan məlumatda qeyd edilib ki,Xocalı faciəsinin  28-ci ildönümündə video görüntülərin şəhər nəqliyyatının TV-sində nümayiş etdirilməsi üçün  2 aydan bəri İstanbul metropol bələdiyyəsi ilə yazışmalar aparılaraq razılıq əldə edilib.Video görüntülər şəhər nəqliyyatında martın 1-nə qədər nümayiş etdiriləcək.

Bundan əlavə, Baş konsulluğun hazırlatdırdığı və Xocalı soyqırımının əks olunduğu afişalar metobus və avtobuslardakı çərçivə stendlərə yerləşdirilib.

Şəhər nəqliyyatında ilk dəfə həyata keçirilən bu işlə bağlı Baş konsulluqdan Turan agentliyinə  bildiriblər ki,Xocalı soyqırımının daha geniş kütlələrə çatdırılması üçün şəhər nəqliyyatının TV kanalından və afişa bölmələrindən istifa etmək ən optimal yollardan biri olduğuna görə,bu yolu məqsədə uyğun hesab edilib.

Baş konsulluq tərəfindən hazırlanan Xocalı soyqırımı sərgisi isə fevralın 24-də İstanbul metrosunun Yenikapı stansiyasında açılıb.Sərgi fevralın 27-nə qədər davam edəcək.—0—