Yazıçıya görə, İraq türkmənləri yanlış siyasətin qurbanıdırlar

İraq türkmən şair-yazıçısı Şəmsəddin Güzeçi İraqdakı son durumla bağlı cümə axşamı BMM-də mətbuat konfransı keçirib.

Yazıçı Azərbaycana dəvətli olaraq Azərbaycan yazıçılar Birliyinin qurultayında iştirak etmək üçün gəlib. Daha sonra İraqda son 10 gündə baş verən hadisələrin mahiyyəti haqda açıqlama verib.

“İraq Şam İslam Dövləti” (İŞİD) terror qruplaşmasının son 10 ildə yarandığı deyilib və qruplaşma ilə vaxtilə Səddam Hüseynin rəhbəri olduğu BƏƏS partiyası arasında paralel aparıb. Vaxtilə BƏƏS-in siyasi iddialarla ortaya çıxdığı kimi, indi də İŞİD-in dini iddialarla ortaya çıxdığı iddia edilib.

İŞİD-in İraqdakı hərbi əməliyyatlarda üstünlük qazanması bu qruplaşmanın hərbi baxımdan güclü olması yox, sadəcə sünni məzhəbli İraq əsgərlərinin İŞİD qüvvələrinə müqavimət göstərməməsi ilə əlaqələndirilib. Bu məsələdə beynəlxalq güclərin İraqı üç federal hissəyə bölməsi iddiasının aparıcı yer tutduğu nəzərə çatdırılıb. “Bu ideya gerçəkləşərsə, sünni, şiə və kürd İraqı bölgələrinin müxtarlığı təmin edilər, zərər görən, əraziləri əlindən alınan ancaq türkmənlər olar”, - deyə Ş.Güzeçi İrqadakı son hadisələrin İraq türkmənlərinə xoş heç nə vəd etmədiyini nəzərə çatdırıb.

İraq türkmənlərinin bütün İraqda 3 milyon nəfərdən çox olduğu və əsas hissəsinin Kərkükdə yaşadığı qeyd olunub. İraq türkmənlərinin yarıbayarı sünni və şiə məzhəbinə aid olduqları, buna görə də sünni türkmənlərin Türkiyəyə, şiə türkmənlərin isə İrana etimadla yanaşdıqları deyilib.

İraq türkmənlərinin indiki ağır duruma düşməsində Türkiyənin 2003-cü ildə ABŞ-la birgə İraqa girməsindən imtina etməsinin həlledici rol oynaması iddia edilib. Belə ki, ABŞ kürdləri, İran İraqın şiə əhalisini himayəyə alıb. İraq türkmənləri isə belə himayədən məhrum oldular. Türkiyənin İraq siyasətinin kürd bölgəsindəki neftin Türkiyə vasitəsilə dünya bazarına daşınmasından, türkmənlərə kürdlərlə mehriban yola getmək tövsiyələrindən ibarət olduğu açıqlanıb. “Türkiyənin türkmənlərə vahid türk toplumu kimi yox, məzhəb bucağından yanaşması yanlışlıqdır və buna görə də bu yöndə Türkiyə siyasəti uğur qazana bilmir”, - deyə Ş.Güzeçi Türkiyənin İraq və İraq türkmənlərinə münasibət siyasətini tənqidə məruz qoyub.

Hazırda İraq türkmənlərinə aid Telafer şəhərinin və Səlahəddin bölgəsindəki 200-ə yaxın türkmən kəndindən 10-15-nin İŞİD-in nəzarətinə keçdiyi nəzərə çatdırılıb. Kürd silahlı birləşmələrinin (peşmərgə) Kərkükü qorumasının heç də xoş niyyətdən yox, fürsət var ikən bu əraziləri ələ keçirərək kürd əraziləri etmək niyyətindən doğduğu ortaya qoyulub. “İraq Türkmən elində türkmənlərin durumu hələlik belədir, biz var gücümüzlə müdafiə olunacağıq, amma tək bizim gücümüzə bu məsələ həll olunmaz, türk dünyasının, türk dünyası siyasətçilərinin ciddi dəstəyi lazımdır”, deyə Ş.Güzeçi türkmənlər üçün durumun mürəkkəbliyini anladıb. -05C-