3 milyonumu qaytarın!

Bakının Sabunçu rayon məhkəməsində MTN-in Energetika və Nəqliyyat sahəsində Təhlükəsizlik Baş İdarəsinin keçmiş rəisi, general-mayor Akif Çovdarov və digərlərinin cinayət işi üzrə məhkəmə prosesi davam edir. Bu hadisəyə ictimai maraq zəifləmir.

Təkcə ona görə yox ki, dinləmələr zamanı ölkənin xüsusi xidmətlərinin yüksək vəzifəli zabitlərinin cinayət fəaliyyəti mexanizminin üstü açılır, həm də yüksək vəzifəli məmurlar haqqında kifayət qədər maraqlı faktlar aşkar edilir. Bütün bu kriminal hadisə dövlət səviyyəsində reketi xatırladır. Qurban seçirlər, onu izləyirlər, telefon danışıqlarını dinləyirlər. Qurbanla bağlı bütün materiallar yığıldıqda isə onun üstünə gedirlər və təzyiq göstərirlər. Reketirlər isə qanuni oğrular və ya kriminal avtoritetlər deyil, MTN generalları idi.

Amma dinləmələr zamanı səslənən, poqonlu cinayətkarlara ödənilən rüşvət və pulların məbləği də böyük təəccüb doğurur. Bakı Hərbi Məhkəməsinin sədri Həbib Həsənovun rəhbərliyi altında keçirilən növbəti məhkəmə iclasında Bakı Metropoliteni ASC-nin keçmiş rəisi Tağı Əhmədov ifadə verib. Vəkillər hər hansı tələblərinin olub-olmadığını soruşduqda o, ona dəymiş 3 milyon manat ziyanın ödənilməsi istəyini dilə gətirib. İclasdan sonra T.Əhmədov jurnalistlərin suallarını cavablandırmaqdan imtina edib.

Onun xahişinin təmin edilib-edilməyəcəyi böyük sual altındadır. Prosesdə hakim Həbib Həsənov nədənsə işin baş fiqurantı Akif Çovdarovun vəkillərinin T.Əhmədova "sövdələşmə" zamanı 3,2 milyon dollara bərabər olan 3 milyon manatın mənşəyi haqqında qarşı suallar verməsinə imkan verməyib.

"Biz bu pulun necə qazanıldığını soruşmaq istəyirdik. 3 mln. manat Əhmədovun 44 illik əməkhaqqı həcminə bərabərdir! Bizdə Tağı Əhmədovun Bakı Metropoliteninin rəisi olduğu zaman aldığı əməkhaqqının məbləği haqqında mühasibat çıxarışı var. Sənədə əsasən, onun illik əməkhaqqının məbləği 20-25 min manat təşkil edir. Onun paytaxtın yeraltı təsərrüfatına rəhbərlik etməyə başladığı 2006-cı ildən etibarən bu məbləğləri toplasaq, 200, uzaqbaşı 300 min manat edər, 3 milyon deyil! Amma bu şəxsin bu qədər pulu haradan aldığını aydınlaşdıra bilmədik", deyə vəkil Sadiq Rəsulov jurnalistlərə bildirib.

Bu iş üzrə təqsirləndirilən Rabitə və Yüksək Texnologiyalar Nazirliyinin keçmiş aparat rəhbəri Vidadi Zeynalova da eyni sualları ünvanlamaq yerində olardı. O, bir neçə gün əvvəl dövlətə dəymiş 2 milyon manat ziyan məbləğini ödəyib. Hazırda ödənilməmiş ziyan məbləği 4 milyon 220 min manat təşkil edir. Bir müddət əvvəl iş üzrə digər fiqurant, "Bakı Telefon Rabitəsi" İstehsalat Birliyinin keçmiş sədri Beytulla Hüseynov da 10 milyon manat ölçüsündə vurulmuş ziyanı ödəyib.

Məhkəmə prosesində səslənən məmurlardan və biznesmenlərdən tələb olunan məbləğlər güclü təsir bağışlayır və Azərbaycanda korupsiyanın həcminə aydınlıq gətirir. Bu, aysberqin görünən tərəfidir. Bəs onun sualtı hissəsində nə var?

Tağı Əhmədovun məhkəmədə ifadə verməsi haqqında məlumat sosial şəbəkələrdə səs-səda doğurub. Nə təəssüf, nə zərərçəkmişə dəstək ifadə olunmur, yalnız suallar var...