AMAY Abdulla: Coxlarının şərəf və ləyaqətini qorumuşuq

Bakı Ağır Cinayətlər Məhkəməsində vətəndaşlara münasibətdə milyon manat həcmində ziyan vuran Aygün Akimova və daha bir neçə nəfərə qarşı dələduzuq ittihamı ilə bağlı məhkəmə prosesi gedir.

Bu prosesdə zərərçəkənlərdən biri deyib ki, A.Akimova onları həyat yoldaşının AMAY şirkətinin sahibi Abdulla Abdullayev olması ilə də aldadıb. Amma A.Akimova özü birbaşa həyat yoldaşının A.Abdullayev olduğunu təsdiqləməyib,“bunun heç kəsə dəxli yoxdur ki, mənim həyat yoldaşım kim olub”cavabı verib .

Günahim yox, səhvim var

Bu məsələni araşdırmaq üçün AMAY şirkətinin qurucusu A.Abdullayevlə görüşdük və iş adamı məsələni belə aydınlaşdırır:“Bu çoxdankı məsələdir, yəqin ki, bununla bağlı istintaq materiallarının mediada işıq üzü görən hissəsini oxumusunuz, həmin ifadə hissəsi bütün suallara cavab verir. Bununla belə bildirimək istəyirəm ki, bu məsələdə mənim günahım yox, səhvim var. Çox təəssüf ki, insanın kamilləşməsi səhvlərindən keçir”-deyə A.Abdullayev söhbətə başlayıb.

A.Abdullayev deyir ki, A.Akimova bir müddət AMAY-da xadimə işləyib, sonra da yaramaz əməlinə görə, dəlil-sübutla şirkətdən xaric olunub.

İş adamı A.Akimovanın onun həyat yoldaşı olması və AMAY şirkətini idarə etməsi barədə sualları cavablandıraraq deyib ki, bu adam nəinki onun həyat yoldaşı olmayıb, hətta bunun təsəvvürə gəlməsi belə mümkün deyil.

Bizim ailəmiz zəhmətkeş və mühafizəkardır

İş adamı bunun səbəbini belə izah edir: “Mən zəhmətkeş ailədə böyümüşəm, ailəmiz də mühafizəkar olub, milli və mənəvi dəyərlərə üstünlük verib, bu dəyərlərə diqqətlə yanaşıb. Bu mənada özüm də mühafizəkaram. Hətta bu mühafizəkarlıq o həddədir ki, ailəm nə bir yerdə işləyib, nə də neçə 10 illərdir  Bakıda yaşasa da, şəhəri tanıyır. Eyni zamanda qızımı 4-cü sinifdə məktəbdən çıxarmışam, ev şəraitində təhslini alıb, bu mühfizəkarlığıma isə ailəm daxilində etiraz olmayıb”.

“Şeyx nəvəsiyəm” deməsinə aldandım

A.Abullayev A.Akimova məsələsində özünün və AMAY-ın adının hallandırılması barədə deyir: “12,bəlkə də 13 il öncə idi. Bu qızın anası yanıma gəldi. Özünü şeyxülislam nəvəsi kimi təqdim etdi, qızının başına oyun gəldiyini və həmin adamı qızı ilə evləndirməyə məcbur etməyimi istədi, buna mənfi cavab verdim. Sonra xahiş etdi ki, xaricdə fəaliyyət göstərən zavodlarımdan birində ona iş verim, dedim ki, xaricdə olan zavodlarım fəaliyyətini dayandırıb. Daha sonra bu qız özü gəldi ki, mənə iş ver, savadsız adam idi, odur ki, onu xadimə olaraq işə götürdüm”. 

A.Abdullayev deyir ki, daha sonra şirkətin işlərilə məşğul olub və bir də əməkdaşlardan biri ona deyib ki, bu qız hamilədir: “Zaman keçdi, yenə də qızın anası gəldi ki, bizi xilas et, uşaq anadan olub, biz bilmirik nə edək, uşağın atası olaraq kimi göstərək, yaxınlarım qızımı öldürəcək, rüsvay olacağıq, bu şərəfimizə toxunan məsələdir. İczaə ver, sənin adını göstərək ki, uşağın atası sənsən. Bu məsələdə mən onun şeyx nəvəsi olduğunu deməsinə aldandım, düşündüm ki, hadisədir olub, dindar ailədir, bir insan həyatını xilas edək. Bax, bu məsələdə mən bu addımın nəticəsini, sabah mənə neçəyə başa gələcəyini hesablamadan razılıq verdim. Bir az əvvəl bu məsələdə günahım yox, səhvim olduğunu deyəndə bu məqamı nəzərdə tuturdum. İndi haqqında bu qədər hay-küy qaldırılan və bu qədər çox yazılan məsələnin bütün mahiyyəti bundan ibarətdir”.

Elə layiq olmayanları qorumuşam ki...

Amma A.Abdullayev deyir ki, tək bu hadisədə yox, çox hallarda kimlərisə xilas etmək üçün addım atıb, sonra görüb ki, bu adamlar buna layiq deyil: “Heç kəsin şərəf və ləyaqətinə əl uzatmamışıq, uzatmarıq da, bu bizlik deyil. Amma çox olub ki, atdığım addımlarla  çox şərəfsizləri pula, imtiyaza, çörəyə çatdırmışam, çox şərəfsizlərin layiq olmadıqları halda belə şərəf və ləyaqətlərini qorumuşam, heç kəsin edə bilmədiyini etmişəm, adımdan belə istifadə ediblər və nə edəsən ki, bizə salam verənlər adımızdan da belə istifadə edirlər. Əvəzində isə özümü güdəza vermişəm və bütün niyyətim də sadəcə hər cür təmənnadan uzaq kimlərinsə şərəf və ləyaqətini qorumaq olub. Bilməmişəm ki, onlar da maraqlara xidmət edən adamlar kimi, şərəfsiz çıxacaqlar”.

A.Abdullayev deyir ki, 2012-ci ildə adının A.Akimovanın uşağının atası kimi yazılması məsələsinə xitam vermək üçün məhkəməyə müraciət edib. Amma  bir tərəfdən şirkətdə yaranan probemlər, digər tərəfdən xaricə getməsi, sonra isə həbsi bütün bu işləri yarımçıq qoyub: “Amma, bu məsələni bitirəcəyəm”-deyə A.Abdullayev bildirib.

A.Abdullayev çox zaman insanların zamandan gileyli olduqlarını, zamanın mənəvi dəyərləri məhv etmələrindən şikayətlənmələrinə cavab olaraq isə deyib: “Zaman dəyərləri yox, insanlar dəyərləri məhv edirlər, dəyərlər məhv olduqca isə insanlıq özünü fəlakətə tərəf sürükləyir”. 

AMAY 5-10 nəfərdən ibarət şirkət deyil ki...

Şirkət sahibi A.Akimovanın istintaqda AMAY şirkətini idarə etməsi haqda dediklərini də dəyərləndirib: “Bu da yalandır, AMAY 5-10 nəfərdən ibarət bir müəssisə deyil ki, hər yoldan keçən gəlib onu idarə edə bilsin. Bu şirkətin əməkdaş sayı elə haradasa 5-6 min nəfər olub, kollegial rəhbərlik fəaliyyət göstərir. Müavinlik sistemi var, hər sahəyə cavab verən müavin öz işini görür. Hətta mən həbsdə olanda belə müavinlik şirkəti idarə edib, odur ki, bu adamın dedikləri başdan ayağa yalandır”.