Araşdırmaların əsl vaxtıdır

Azərbaycan hakimiyyətinin yaxın dostu və kriminal-korrupsioner rejimin AŞPA-da əsas dayaqlarından biri olan Pedro Aqramunt aprelin 24-də qurumun yaz sessiyasının açılışında iclasdan qaçdı. Deputatlar onun bu yaxınlarda özbaşına Suriyaya səfər etməsinin və Azərbaycandakı kimi hakimiyyəti atasından almış və öz xalqına qarşı soyqırım törətmiş Bəşər Əsədlə görüşünün hesabatını istəyir. Doğrusu Aqramunt Azərbaycan hakimiyyəti ilə natəmiz əlaqələrinə görə ilişməli idi. Amma Suriya məsələsi qabağa düşdü.

Luka Valenta kimi o, da Azərbaycan hakimiyyətinə xidmət edib. Korrupsioner və kriminal rejimin insan haqlarına cavabdeh olan Avropa təşkilatında əsas müdafiəçisi rolunda çıxış edib. Amma Valentadan fərqli olraq Aqramunt bizim ölkə üzrə həm məruzəçi olub. Həmin vaxt siyasi məhbus məsələləri ilə bağlı mən onunla görümüşəm. O, həmməruzəçi kimi (bu gün Azərbaycan korrupsiyasının qarışdırdığı Maltadan olan Qrexlə birlikdə) insan hüquqları ilə bağlı təsis edilmiş Avropa Şurasının təmsilçisindən daha çox Əliyev rejiminin vəkili kimi çıxış edib və Ştrasserin siyasi məhbuslarla bağlı məruzəsinin qarşısının alınmasında Luka Valentadan da çox çalışıb. Bunun üçün sadəcə olaraq onun Azərbaycandakı siyasi məhbus, seçkilər, demokratik təsisatlar, insan haqları və sair məsələlərlə bağlı hazırladığı hesabatlara və AŞPA sessiyalarında, komitə iclaslarındakı çıxışlarına baxmaq kifayətdir.

Yeri gəlmişkən Aqramunt AŞPA sədri kimi bütün vasitələrlə çalışdı ki, Luka Valentanın Azərbaycan hakimiyyətindən rüşvət alması faktı müstəqil komissiya tərəfindən araşdırılmasın. Çünki böyük ehtimalla özü də bu işin içindədir. O, Azərbaycan üzrə həmməruzəçi olarkən mən onunla iki dəfə görüşmüşəm və siyasi məhbuslardan daha çox korrupsiyalaşmış Azərbaycan hakimiyyətini müdafiə etdiyini nəzərinə çatdırmışam.  Siyasi məhbus və insan haqları ilə bağlı o, açıq-açığına Əliyev rejimin yanında dayandığı üçün özünə hörmət edən insan haqları təşkilatları və siyasi partiya təmsilçiləri doğru edərək sonda Aqramuntla və onun yandaşı Qrexlə görüşdən imtina etdilər.

İnsan haqları sahəsində ölkənin ən peşəkar və ən təcrübəli mübariz hüquq müdafiəçisi olan Leyla xanım Yunus Aqramuntun üzünə dedi ki, sən Əliyev rejiminə satılmısan və ölkədə siyasi məhbus məsələsinin belə fəlakətli həddə düşməsində günahkar olanlardan biri də sənsən. Leyla xanımın sözü özünü doğrultdu.  Cənab Aqramunt Azərbaycanda siyasi məhbusların olmadığını “əsaslandırmaq” üçün mümkün olan hər şeyi etdi. Ştrasserin məruzəsinin qarşısını almaqla Valenta, Aqramunt və məqsədli şəkildə məruzənin keçməmısinə səs vermiş Avropa Şurasının deputatları anti-humanist və natəmiz əməlləri ilə demokratik təsisatları əzmək, vətəndaş cəmiyyətini dağıtmaq, siyasi müxalifəti təqib etmək üçün İlham Əliyevə kart blanş vermiş oldular. 2013-cü ilin yanvarından sonra məhz bunun sayəsində İlham Əliyev bütün beynəlxalq tədbirlərdə bəyan  edirdi ki, Azərbaycanda siyasi məhbusların olmadığın AŞPA təsdiq edib.

AŞPA-nın müşahidə misyasında təmsil olunan deputatlarının fəaliyyəti ilə bağlı ayrıca danışmaq lazımdır. Cənab Aqramunt burada da Azərbaycan hakimiyyətinə yetərli qədər xidmət göstərib. Kiçik istisnalarla, Qross, Herkel kimi bəzi prinsipial parlamentarilər istisna olmaqla Azərbaycanda saxta seçkilərə müsbət rəy verməklə AŞPA sadə azərbaycanlılar gözündə öz simasını itirdi. Qəribə də olsa öz ölkələrində demokratik seçkilər yolu ilə seçilmiş AŞPA üzvləri nədən Azərbaycandakı saxta seçkiləri demokratiya nümunəsi hesab edirdilər? Əvvəllər AŞPA-nın komitə sədri olmuş Dick Marti 2010-cu ilin parlament seçkilərindən sonra keçirilən bir konfransda açıqca dedi ki, Azərbaycan lobbiçiləri ötən parlament seçkilərinə müşahidəçi kimi müsbət rəy vermək üçün mənə böyük məbləğdə qonorar (yəni rüşvət) təklif etdilər. Mən bundan imtina etdim, lakin əmin deyiləm ki, AŞPA-da bu təklifi alanların hamısı ondan imtina etdilər.

Avropa tarixində ilk dəfə olaraq məhz Azərbaycandakı 2013-cü il prezident seçkilərində AŞPA müşahidəçiləri rəsmi müşahidə mandatı olan ATƏT-in Demokratik Təsisatlar və İnsan Haqları  Bürosunun rəyinə qoşulmadılar. Çünki rəsmi mandatı olan ATƏT missiyası seçkilərdə 58 faiz saxtakarlıq olması haqqında rəy vermişdi. Sual olunur: daha mükəmməl, daha peşəkar, daha əhatəli və daha uzunmüddətli müşahidə ofisi olan ATƏT missiyasının rəyi AŞPA müşahidə missiyası tərəfindən niyə qəbul edilmədi? Niyə Avropa tarixində ilk dəfə olaraq Azərbaycandakı seçkilərdə AŞPA müşahidəçiləri ATƏT missiyasından fərqli rəylə çıxış etdilər?. Çünki kiçik istisnalarla AŞPA müşahidə missiyasının həm rəhbərliyi, həm də üzvlərinin böyük əksəriyyəti Azərbaycanın korrupsioner hökuməti ilə natəmiz əlaqələrə girmişdilər. Bax, indi bütün bunların araşdırılmasının əsl vaxtıdır.