Azərbaycanda təmsil olunan dünya markaları sahiblərinə REAL Hərəkatının Müraciəti

Martın 14-də REAL hərəkatı Azərbaycanda təmsil olunan dünya markalarının və istehsalçılarının sahiblərinə çağırışla çıxış etdi. Sənəddə deyilir:

"Dünyanın ən nüfuzlu və böyük şirkətlərdən biri - 280 min işçisi, illik 100 milyard dollar dövriyyəsi və 10 milyard dollar gəliri, 150 ildən çox tarixi olan və dünyanın 100-dən çox ölkəsində təmsil olunan İsveçrənin Nestle şirkəti, mallarının Azərbaycana gətirilməsində ciddi gömrük rüşvətxorluğu ilə üzləşməsi səbəbilə ölkəmizlə ticarətini rəsmən dayandırdı.

Transparency International təşkilatının sıralamasında az qala 20 ildir ən aşağı yerlərdə məskunlaşmış Azərbaycan üçün bu addın, hansısa sivil toplum qurumunun “subyektiv” təhlili deyil.  Xəbər, gəlir axtarışına köklənmiş dünya şöhrətli şirkətdən gələn bir ümidsizliyk ifadəsidir, qayda-qanun.

Nestle’nin qərarından sonra, ölkəmizin yasaqçı iqtisadi iqlimində şirkət və markalarınızın işləməsi adınıza ləkə gətirir, çünki gömrüyün rüşvət tələbatını ödəmədiyinizə kimisə inandırmaq çətindir.

Azərbaycan elə bir ölkədir ki, burada tanınmış dünya markalarının birgə atacağı addım böyük dəyişiklik yarada bilər:  Avropa Şurasının üzvüyük, tarixçilərin tanıdığı demokratik ənənəyə sahibik, ictimai rəy ümumi siyasi və iqtisadi vəziyyətə təsir imkanındadır, çünki insanların böyük əksəriyyəti ali təhsillidirlər və nəzarətli TV-lərdən üz döndərərək yeni mediaya geniş şəkildə açıqdırlar.

Respublikaçı Alternativ (REAL) Hərəkatı olaraq, Sizi indiyədək görünməmiş qlobal korporativ həmrəylik kampanyasına çağırırıq.

Xahiş edirik, Nestle şirkəti kimi sizin şirkət də 2012-ci il mayın 1-dən gömrük orqanlarındakı rüşvət maneələri səbəbilə Azərbaycanla ticarətini dayandırdığını rəsmən elan etsin.

Yerli və beynəlxalq qanunların həll edə bilmədiyi problemi özəl biznesin dünya miqyaslı birgə əməli çözəndə, dünya iş adamlarının sosial məsuliyyəti tarixində yeni, şərəfli bir iz qoyacaqsınız.

Bu kampaniya, rüşvətin bastionu - gömrük xidmətini - ölkəmizdə sındırmaqla oxşar problemli başqa ölkələrə də əvvəllər mövcud olmayan bir dərs verəcək.

Rüşvətə qarşı qlobal mübarizənin yeni uğur təməlini qoymaq fürsəti qarşınızda açıqdır!"