Bakı Ağır Cinayətlər Məhkəməsinə təqsirləndirilən şəxs Məmmədov Hilal Əlif oğlu tərəfindən ərizə

Qanunun mənə verdiyi imkanlara əsasən,mən istənilən vaxt hüquqlarımın müdafiəsiylə

əlaqədar olaraq,vəkillərim – Yalçın İmanov,Ramiz Məmmədov,Anar Qasımlı,Cavad Cavadov,

Xalid Bağırovun səlahiyyətlərini tam və ya qismən məhdudlaşdıra bilərəm.

Barəmdəki “cinayət işində” AR CM-nin 234.4.3.,274,283.2.2 maddələriylə mənə elan 

olunmuş və bir-birini təkzib edən ittihamlar hər hansı məntiqi,hüquqi və əxlaqi əsaslara sığışmayan saxtakarlıq olduğundan və elmi – pedaqoji,ictimai – siyasi fəaliyyətimin həmişə

tam şəffav müstəvidə qurulduğunu dəfələrlə bəyan etməyimə rəğmən,məhkəmə prosesinin

tam şəkildə açıq keçməsini tələb etmişəm: mənim Azərbaycan Xalqından,hökumət ya qeyri-

-hökumət birlik və təşkilatlarından,KİV – dən və digərlərindən bu yol gizlədiləsi heç bir sirrim ya problemim olmamışdır. 

Dəfələrlə rəsmən bəyan etdiyim kimi,bir daha bildirirəm ki,mənim bu şəffav fəaliyyətim Azərbaycan Respublikasının Konstitusiyası və dövlətimizin qoşulduğu Beynəlxalq hüquq

normaları çərçivəsində olub,insan haqqlarının və hüquqlarının və azadlıqlarının müdafiəsinə

həsr edilmişdir.

O cümlədən, Azərbaycan xalqının ayrılmaz parçası olan, nümayəndəsi olduğum Talış xalqının da ən elementar bəşəri hüquqlarının təmin olunması ilə bağlı fəaliyyətim də məhz bu ümumbəşəri və vətəndaşlıq prinsipindən irəli gəlmişdir.

Lakin,AR Konstitusiyası tərəfindən qorunulmasına zəmanət verildiyi bu elementar hüquqların,məsələn xalqın mövcud yeganə qəzeti olan “Tolışi Sədo”(“Talışın Səsi”)-ya

redaktorluq etmək və orada söz və fikir azadlığını ifadə etmək; Respublika Talış Mədəniyyət

Mərkəzi (RTMM) rəhbərliyinin son 20 ildəki saysız - hesabsız müraciətlərinə baxmayaraq   rəsmi fəaliyyətinə; Bakıda və regionlarda filiallarının açılmasına cəhd göstərmək; RTMM-nin bu və ya digər yığıncaqlarını,o cümlədən son 20 ildə keçirilməsinə bir dəfə də olsa imkan verilməyən talış- folklor  gecələrini; elmi konfranslarını keçirtmək; qonşu dövlətdə yaşayan soydaşlarımızla milli – mədəni ünsiyyəti yaratmaq; talış dilinin və mədəniyyətinin təbliğinə və tədqiqinə həsr edilmiş bu və ya digər elmi konfransları keçirtmək; yerli tele-radio proqramlarında  ana dilində bir kəlmə belə  işlətmək və i.a. təşəbbüslərimizin həyata keçirilməsinə göstərilən istənilən cəhd – “Dövlətə xəyanət”,”cəsusluq”, “milli-dini ayrıseçkilik salma”, “narkotik istifadəsi və satılması” və i.a. cəfəng və absurd ittihamlarla qarşılanmışdır.

2007-ci ilin fevral ayında Azərbaycanın görkəmli dilşünas alimi , AMEA-nın Dilçilik İnstitunun “roman-german dilləri bolməsinin” müdiri,hələm keçən əsrin 70-ci illərindən dünyada yeganə talışşünas alim kimi tanınan, “Tolışi Sədo”-nın və RTMM-nin təsisçisi və rəhbəri prof.N.Məmmədov da “dövlətə xəyanət”,”İrana casusluq” kimi uydurma bəhanələrlə həbs edildikdə, hakimiyyət orqanlarının bütün hədə və qorxularına baxmayaraq,onun hüquqlarının müdafiə komitəsini yaradıb ona rəhbərlik etməyi və məhkəmə proseslərinin açıq keçirilməsinin tələbini vicdan və mənəvi borcumuz hesab etdik.Hərçənd ki,bir gün bu haqq mübarizəmizin eyni qondarma ittihamlarla özümüzə qarşı da nəticələnə biləcəyini istisna etmirdik.

Amma aldadılaraq müəlliminin üzünə dayandırılan və sonralar elə həmin uydurma ittihamlarla da 6 il azadlıqdan mərhum edilmiş şahid Elman Quliyevin guya ərizəsinə istinadən açıq məhkəmə prosesində onun həyatına guya təcavüz oluna biləcək təhlükəni nəzərə alaraq,bütün məhkəmə iclasları qapalı keçirildi. Bu oyuncaq məhkəmə proseslərinin ən kobud və ən qeyri-qanuni addımı isə son iclasın, onlara hökm oxunulması səhnəsinin də qapalı şəkildə keçirdilməsi və orada hətta vəkilinin belə iştirakına imkan verilməməsi idi... Son nəticədə prof. N.Məmmədov 10 il azadlıqdan məhrum edilərək zindanda qətlə yetirildi və ailə üzvləri də şəhid edildi. O vaxtlar N. Məmmədovun Hüquqlarının Müdafiə Komitəsinin sədri kimi, hakimiyyət orqanları tərəfindən təşkil olunmuş bu dəhşətli və amansız vəhşilikləri istər Azərbaycan, istərsə də cəmi dünya ictimayyətinə imkanlarımız çərçivəsində çatdırmağa cəhd etsək də, məhkəmə proseslərinin qapalı keçirilməsi bu cəhdlərimizin kifayət qədər müsbət nəticələr verməsinə imkan vermədi. Başqa sözlə desək, prof. N. Məmmədovun ailəsinin bu dəhşətli faciəsinə yalnız istintaq orqanları deyil, həm də Ağır Cinayətlər Məhkəməsi baiskar oldu.

Yenə də artıq 6 il məhkumluq həyatını yaşayan həmin Elman Quliyevin həbsimdən 2 gün öncə DİN-ə barəmdə yazdığı “şikayət” ərizəsinə əsasən mən 234.4.3 maddəsiylə həbs edilir və növbəti 2 ərizəsinə istinadən isə barəmdə daha 2 qondarma (274; 283.2.2) ittiham irəli sürülür.

Bu dəfə mənim məhkəmə proseslərimin qismən, əslində isə tam şəkildə qapalı keçirilməsi, guya “cinayət” işində “dövlət sirrinin” mövcudluğu ilə izah olunur. Halbuki,işdə iki vəkilimdən alınmış iltizamdan başqa,olmayan “dövlət sirrinin”yayımlanmaması barədə nə digər 3 vəkildən,nə istintaq qrupunun üzvlərindən,nə prosesual rəhbərliyi həyata keşirdən prokurordan,nə məhkəmə nəzarəti qaydasında işə baxan hakimlərdən və katiblərdən, nə hal-hazırdakı məhkəmə tərkibindən,nə də prosesdə iştirak edən ittihamçıdan(istinad olunan “sirlərin”yayımlanmaması barədə) heç bir iltizam alınmamış və işə əlavə edilməmişdır.Yuxarıda qeyd olunan iki müqayisəli məhkəmə səhnələri – istər öz işimizdə,istərsə də mərhum prof.N.Məmmədovun işində ümumiyyətlə heç bir “sirrin” olmadığını aşkar etməklə yanaşı əsil reallıqların,yəni,bilavasitə ictimai fəaliyyətimizlə bağlı olaraq,Bizə qarşı sifarişlə qurulmuş bu iyrənc oyunların Azərbaycan İctimaiyyətindən,beynəlxalq hüquq-müdafiə təşkilatlatlarından,ölkəmizdəki xarici dövlətlərin rəsmi nümayəndəliklərindən,ölkə daxili və xarici mediyadan gizlətmək məqsədiylə məhkəmə proseslərinin qapalı keçirilməsinə xidmət edir.

Bu qədər açıq-aşkar özbaşınalıq – işimizi aparan istintaq orqanları kimi,artıq Məhkəmə Prosesinin də həbsimizə sifariş vermiş eyni bir mənbədən idarə olunduğuna qətiyyən şəkk qoymur.  

Bütün yuxarıda deyilənləri nəzərə alaraq, mən Məhkəmə Prosesinin tam şəkildə açıq keçirilməsi barədə qərar qəbul  edilənəcən hüquqlarımın müdafiəsiylə bağlı olaraq vəkillərimin səlahiyyətlərini məhdudlaşdırır və onların Məhkəmə Prosesi tam açıq keçirilənəcən orada iştirakını qadağan edirəm. Lakin, bu, onlardan imtina kimi qiymətləndirilməməlidir.

Eyni zamanda bu ərizəmi nəzərə alaraq, Məhkəmə proseslərinin tam  açıq elan edilənəcən, məni  Məhkəməyə çağırmayasınız! Əks təqdirdə, üzümü əks tərəfə çevirib Məhkəmənin bütün tələblərini rədd etmək məcburiyyətində olacağam. 

Məhkəmənin qərəzli qərar qəbul etməsini nəzərə alaraq məhkəmənin bütün tərkibinə də etiraz edirəm.

Barəmdə də istənilən vaxt,istənilən hökmü istənilən şəraitdə elan edə bilərsiniz.

30 yanvar 2013-cü il.                           Hörmətlə:                /Məmmədov Hilal Əlif o./