Bayılda özlərini hakimiyyət işçiləri kimi qələmə verən dağıdıcılar ortaya çıxıb?

Onların özəlləşdirilmiş birmərtəbəli köhnə evi var. Qonşu əraziləri zibildən təmizləyən bacı-qardaş evi dağılmaqdan qorumaq üçün daşlardan sürüşməyə qarşı bir divar tikiblər. İrinanın kürəkəni - Yaşar Turan-a danışıb ki, onlar 2007-ci ildən daınmaz əmlak sənədlərinin yenilənməsi ilə bağlı dəfələrlə TİB-ə və Torpaq Komitəsinə müraciət ediblər. Hər dəfə onlara bildiriblər ki, bura sürüşmə zonasıdır və burada heç nə - hətta ölçmə belə həyata keçirmək olmaz ("rəsmi məktublar var"). Həqiqətən də, hökumətin bu sürüşmə ərazisində istənilən tikinti işlərini həyata keçirməyi qadağan edən sərəncamı var. Mixaylovlara evin qəbaləsi 1990-cı ildə verilib, daha sonra 1996-cı ildə yenilənib, bu, 2,57 sotluq torpaq sahəsi və 67 kv m. sahəsi olan zirzəmili ev üzərində mülkiyyət hüququ sənədləridir.

Sakinlərin tikdiyi müdafiə divarını (baxmayaraq ki, sürüşməyə qarşı tikililəri yerli icra hakimiyyətinin işçiləri tikməlidir) elə bu hakimiyyət söküb. İşçilər iki həftə, şənbə günləri gəlirdilər. "Bizi tezliklə hər şeyi sökəcəkləri və qazı və işığı kəsəcəkləri ilə hədələyərək qorxudurdular. Bu da bizim Konstitusiya... Həyat yoldaşımın nevroz vəziyyətində yazdığı audioyazını sizə göndərirəm. Bu yazıda icra komitəsi işçisinin, bu səs yayılarsa, necə hədələdiyi eşidilir", deyə Yaşar bildirib.

Mixaylovlar dövlətin birinci vitse-prezidentinə şikayət məktubu göndəriblər: "Artıq iki həftədir hər hansı sənədi olmayan, özlərini sözdə Səbail rayon icra hakimiyyətinin işçiləri kimi qələmə verən insanlar bizi Bayıl qəsəbəsində olan mənzilimizi tərk etməyə məcbur edirlər.

Əvvəlcə telefonla hədələyirdilər, daha sonra hansısa "elçilər" gəlirdi. Nəhayət, hər hansı xəbədarlıq və qərar olmadan, vəsiqə, sənəd və ya qərar təqdim etmədən, bir neçə nəfər əvvəlcə müdafiə divarını (yüksəkliyi 1 m), daha sonra isə hasarı da yıxmağa başladılar. Sakinlərin dəfələrlə söküntü haqqında qərarı göstərmək xahişlərinə baxmayaraq, bu insanlar abadlıq və təhlükəsizlik üçün tikilən hər şeyi sökməyə davam edirdilər. Onlar İH rəhbərliyinin və Səbail rayon prokurorluğunun əmrinə istinad edirdilər. Azərbaycanın sadə qanuna tabe olan vətəndaşlarının - 80 yaşlı köməksiz qadının və 68 yaşlı pensiyaçı həkim-terapevtin günahı nədir?", deyə Mixaylovlar M.Əliyevaya yazdıqları məktubda sual edirlər.

Dağıdıcıların dediyinə görə, yaşlı insanların evi, habelə bir sıra qonşu evlərin yerləşdiyi ərazi çoxdan Səbail rayon İcra Komitəsindəki bir şəxs tərəfindən "əldə olunub" və bu şəxs sizin ailənizə yaxın insandır. Açıqsözlülüyümüzə görə üzr istəyirik, amma bu insanlar bizə deyiblər ki, sakitcə evdən çıxmağa razılaşmaq hamı üçün yaxşı olardı. Pensiyaçılar izah ediblər ki, bu, sürüşmə zonasıdır və mərhum Azərbaycan prezidenti Heydər Əliyevin göstərişinə əsasən burada daşınmaz əmlaklarla bağlı istənilən əməliyyatlar qadağandır. Şənbə günü rayon prokurorluğunun, polisin hansısa nümayəndələri gəliblər. Onlar kənarda pıçıldaşırdılar və dağıtmağı əmr edirdilər. Baş verənlərin videogörüntüləri və telefonla hədələmələrin səs yazıları var.

Sakinlər polis çağırıblar, amma dağıdıcıların yerli mənzil kontorunun işçiləri olduğunu və ölümcül nəticə olmadığını görən polis çıxıb gedib.

Gələnlər hasarın bir hissəsini sökərək gediblər, bununla vətəndaşlara köçmək haqqında "düşünmək üçün vaxt" veriblər. İki gün sonra icra komitəsi işçilərindən biri gəlib və icra komitəsi adından həyasızcasına alver etməyə başlayıb, yaşlı insanların mənzil almaq problemini həll etməyəcək məbləğlə razılaşıb köçməyə hazır olub-olmadıqlarını soruşub. Yaşlı sakinlər köçürülmə haqqında vasitəçisiz, rəsmi və qanuni danışıqlar aparmağa razı olduqlarını deyiblər. Onlara deyiblər ki, icra komitəsi və bu insanlar tərəfindən "reket" davam edəcək, odur ki, qoy köçsünlər.

"Hörmətli Mehriban xanım, bu ruslar ömürləri boyunca Azərbaycanda vicdanla işləyiblər, ölkə qanunlarına və qaydalarına tabe olublar, indi isə onları qorxudurlar və doğma yerlərindən qovurlar. Xahiş edirik, bizə kömək edin", Mixaylovların məktubu belə yekunlaşır.

Turan-ın müxbiri Səbail rayon icra hakimiyyətinə israrlı zənglərin ikinci günündə İH tikinti-təsərrüfat şöbəsinin müşaviri Ruslan Həmzəyevlə danışmağa müvəffəq olub. Mixaylovların şikayətini dinləyən, onların ünvanını öyrənən müşavir bu ərazidə evlərin sökülməsi haqqında heç nə bilmədiyini deyib. Allaha and içərək, bu rayondakı hadisələr haqqında ilk dəfə eşitdiyini bildirib...

Həmzəyev səmimidirsə, ona inanmaq və Bayılda özbaşına vətəndaşları evlərindən qovan cinayətkar bir təşkilatın olduğu haqqında nəticəyə gəlmək qalır. Həm də polis bu cinayətkarları tanıyır və baş verənlərə müdaxilə etmir.

Ümid edirik ki, dövlətin vitse-prezidenti Mehriban Əliyeva və Bakının Səbail rayon icra hakimiyyətinin rəhbərliyi Azər Nəsirov küçəsindəki qəribə hadisələr haqqında öyrəndikdən sonra məsələni aydınlaşdıracaq və vətəndaşların rahatlığını pozanları onlardan əl çəkməyə vadar edəcək.