Dostlar! Iki gün əvvəl “Əli və Nino” kitab mağazaları şəbəkəsinin sahibi Nigar xanım Köçərli Nəsimi Rayon Polis İdarəsinin rəisi, polis-polkovniki Musa Musayev tərəfindən təhqirlərə məruz qalması haqqında öz fece səhifəsində məlumat yaymışdı. Bakı şəhərinin mərkəzində yerləşən bir polis idarəsində vətəndaşa qarşı, iş adamına qarşı, nəhayət ziyalı bir xanıma qarşı baş verənlər insanı heyrətə salır.
Ötən ilin payızında ofisində baş vermiş oğurluq hadisəsi ilə bağlı Nəsimi rayon polis idarəsinə müraciət edən Nigar xanım baş vermiş oğurluq hadisəsi ilə bağlı heç bir nəticə olmadığından Prezident apartına müraciət etməli olmuş, bu hadisə isə polis rəisinin hiddətinə səbəb olmuşdur.
Maraqlıdır oğurluq faktına aylardır biganə yanaşan rayon polis idarəsi işlə bağlı deyil, məhz polis idarəsinin səhlənkarlığı ilə bağlı prezident apartına müraciət etmiş Nigar xanımı dərhal idarəyə, özü də birbaşa rəis Musayevin qəbuluna dəvət etmişdir. Bu görüş haqqında Nigar Köçərli yazır: “ İdarə rəisi Musa Musayev kobud tərzdə məndən soruşdu ki, niyə onlardan şikayət etmişəm. Mənə xas olan nəzakətli tərzdə izah etdim ki, mənim başqa yolum yox idi. Buna cavab olaraq Musa Musayev üstümə qışqırmağa və məni təhqir etməyə başladı. Mən onun qışqırıq və söyüşlərindən şoka düşmüş halda otaqdan çıxmaq üçün ayağa qalxdım. Çıxışıma mane olaraq yolumu kəsdilər. Musa Musayev dəhşətli sözlərlə təhqir edərək və hədələyərək məni kabinetə qaytarmağa çalışdı. Çətinliklə idarədən çıxa bildim”.
Bax budur polis orqanlarındakı vəziyyət, vətəndaşa münasibət, xidməti intizam və mənəvi durum. Gözləmək olardı ki, Daxili İşlər Nazirliyi baş verən hadisə ilə bağlı xidməti araşdırma aparıb iş adamını təhqir etdiyinə görə lazımı ölçü götürəcəkdir. Lakin təəssüflər olsun ki, rəis Musayevdən daha dəhşətli bir yanaşmanı DİN rəhbərliyi sərgilədi. Hadisədən bir gün sonra rəsmi açıqlama ilə çıxış edən Daxili İşlər Nazirliyi Mətbuat Xidməti bildirdi ki, “bilərəkdən özünü ictimai rəyə mədəni, İdarə rəhbərliyini guya kobud şəkildə təqdim etməyə çalışan xanım öz əsassız və məntiqsiz ittihamları ilə növbəti dəfə əsib-coşub və belə "mədəni" davranışı ilə təcrübəli polis əməkdaşlarını sözün həqiqi mənasında şoka salıb. Söhbət əsnasında N.Köçərli özünə nəzarəti itirib, səsinin tonunu qaldıraraq rəis müavini N.
Aslanov barəsində etikadan kənar, normal, mədəni davranışla bir araya sığmayan təhqiramiz ifadələr işlədib və beləliklə, hansı səviyyənin yiyəsi olduğunu ortaya qoyub. İdarənin rəisi isə bu xanımı etikaya, intizama dəvət etməyə çalışsa da N.Köçərli yenə öz ampluasında olub, sayğısızcasına, nümayəşkaranə şəkildə kabineti tərk edib. Ona görə N.Köçərlinin Nəsimi RPİ-də guya təhqirə məruz qalması, təhdid olunması barədə söylədiklərinin heç bir əsası yoxdur Onun qabaqdan gəlmişlik edərək məlum görüş barədə həqiqəti təhrif etməsi də ictimai rəyi aldatmağa hesablanıb”.
DİN-in mətbuat xidmətinin bu açıqlaması ilə tanış olduqdan sonra düşünürsən ki, nə əcəb möhtərəm rəisi, onun müavinini, şöbənin cinayət-axtarış şöbəsinin rəisini Nigar Köçərlinin əlindən qurtarmaq üçün nazirlik idarəyə çevik polis alayı, post-patrul xidməti göndərməyib. Daha sonra düşünməyə məcbur olursan ki, əgər Nigar Köçərli kimi mədəni, savadlı, işgüzar, maarifpərvər, özünə və başqalarına hörmətlə yanaşan gənc bir xanımla belə rəftar edən yüksək vəzifəli polis işçiləri gör yüzlərlə sadə ölkə vətəndaşlara münasibətdə necə hərəkət edirlər? Nigar Köçərli nəcib bir işlə məşğul olur. “Əli və Nino” adlı cəlbedici bir kitab şəbəkəsi yaradıb vətəndaşlarımızın maariflənməsi işinə böyük töhfə verir. Hər kəsə aydındır ki, kitab ticarəti o qədər də gəlirli, iş adamı üçün sərfəli bir sahə deyil. Amma buna baxmayaraq Nigar böyük fədakarlıq göstərir, zəmanəmizdə gözdən salınmış kitaba olan münasibəti dəyişmək üçün bütün istedad və bacarığını ortaya qoyur, böyük maarifçilik missiyası həyata keçirir. Bir neçə il əvvəl onun təşkil etdiyi “Milli kitab mükafatı” ədəbiyyata dəstək baxımından, bədi əsərlərin təbliği baxımından mühüm hadisə oldu.
Oxucu marağının cəlb edilməsi, oxucuların mütaliə dairəsinin genişləndirilməsi, gənc yazarların bədi nümunələrinin cəmiyyətə çatdırılması, kitaba münasibət baxımından Nigar sözün tam mənasında təqdirə layiq bir işlə məşğul olur, işsizliyin geniş yayıldığı bir vaxtda onlarla ailəni işlə, dolanışıqla təmin edir. DİN-in məlumatına görə polis rəisi ilə görüşdə “mədəni davranışla bir araya sığmayan təhqiramiz ifadələr işlədən” bu xanımla beşcə dəqiqə söhbət etmək lazımdır ki, onun hansı mədəniyyətin, hansı intellektin, hansı əxlaqın sahibi olduğunu kəmali ehtiramla etiraf edəsən. Nigarın böyük mütaliəsi var və bəlkə onu kitaba bağlayan, kitab maarifçiliyinə cəlb edən də elə budur.
O, Azərbaycanda elm və ictimai fikrin inkişafına təkan vermiş bir ailənin yetirməsidir. DİN-in açıqlamasında insanı heyrətə salan budur ki, öz xalqını savadlı görmək üçün həyatını kitab təbliğinə, maarifçiliyə sərf etmiş bir xanıma qarşı baş vermiş qanunsusluğa, ömründə bəlkə də bir kitabı belə axıra qədər oxumayan, rütbəsi mədəniyyətindən böyük olan bir polis rəisinin ədəbsiz hərəkətlərinə bəraət qazandırılır.
Biz yaxın keçmişdə MTN-nin iş adamlarına qarşı, ayrı-ayrı vətəndaşlaraq qarşı belə açıqlamalarına adət etmişdik və həmin qurumun taleyini də gördük. İndi siz deyin: DİN-in nəyi keçmiş MTN-in hərəkətlərindən fərqlənir. İş adamlarına münasibətdə “Bandotdel”lə keçmiş MTN-in antiterror idarəsinin fərqi nədir? Qəribədir eyni hadisə ilə bağlı iki məlumat yayılıb: bir tərəfdən “Əli və Nino” kitab şəbəkəsinin sahibi, öz mədəniyyəti, tərbiyəsi və mənəvi keyfiyyətləri ilə seçilən Nigar xanım Köçərli ona qarşı polis idarəsində heç bir əxlaqi anlayışlara sığmayan mədəniyyətsizlikdən, təhqirdən, kobudluqdan şoka düşdüyünü yazır, digər tərədən öz aparatında uşaq oğurluğu, insan qətlləri ilə məşğul olan Hacı Məmmədov dəstəsini yetişdirmiş, son aylarda minlərlə iş adamını “Bandotdel”dən keçirmiş, öz vətəndaşının cibinə narkotika atmaqla namuslu vətəndaşlara saxta günah toru toxuyan DİN öz açıqlamasında bir çox mənəvi keyfiyyətinə görə cəmiyyətə nümunə ola biləcək Nigar xanımın guya öz “davranışı ilə təcrübəli polis əməkdaşlarını sözün həqiqi mənasında şoka saldığnı” iddia edir. Əslində isə, ən böyük şok ağır kadr böhranı keçirən ölkənin daxili işlər orqanlarının indiki acınacaqlı duruma düşməsidir.
Söz istəyirəm
-
Bu gün 2014-cü ilin fevralında başlayan rusiya təcavüzünün Ukraynaya qarşı genişmiqyaslı müharibəyə çevrilməsindən 1000 gün ötür. Min gün davam edən ağrı, itki, göz yaşı...
-
Dörd il əvvəl 7 minə yaxın insanın həlak olduğu İkinci Qarabağ müharibəsi başa çatdı. Daha sonra ermənilər Azərbaycanın "antiterror əməliyyatları" adlandırdığı döyüşlər nəticəsində Qarabağı tərk etdilər.
-
Ukraynada Rusiya təcavüzünün səbəb olduğu vəhşi, qanlı müharibə davam edir, bu müharibə hər gün insan həyatına son qoyur, evləri, infrastrukturu dağıdır, ekologiyaya və ətraf təbii mühitdə saysız-hesabsız itkilərə səbəb olur. Ukrayna bu dünyada hər kəsdən çox sülhə can atır, çünki bu Rusiya-Ukrayna müharibəsinin vəhşiliyini hər gün hiss edən bizik. Biz yaşamaq hüququ, azadlıq və ədalət uğrunda mübarizənin önündəyik. Ukrayna Avropanın və dünyanın sabit gələcəyi üçün etibarlı əsasa çevriləcək ədalətli sülh axtarır və buna yeganə alternativ yol Ukrayna Prezidenti Volodımır Zelenskinin Sülh Formulasıdır (Ukrayna Sülh Formulası).
-
Sıra nömrəsindən asılı olmayaraq, ümumdünya COP tədbiri yalnız iqlim dəyişikliyinə deyil, həm də humanizmə xidmət edən bir aksiyadır. COP keçirən ölkədə siyasi məhbus ola bilməz, COP keçirən ölkə insan haqlarına hörmət etməlidir.
Rəy yaz