Həbsdəki qadını şərləməklə iftar süfrəsi açan Rauf

Adnanla Emini xarici kəşfiyyata bağlamamışdımı həbs olunduqları zaman?! “Qrant yeyənlər” ittihamını da bu adam başlamadımı?

Həbsə atılan jurnalist Xədicə İsmayılın “istintaq”ı bitib, iş məhkəməyə gedəcək. Turalı intihar həddinə çatdırmaq ittihamı ictimai rəydə məsxərəyə çevrilib, “Azadlıq” radiosundakı fəaliyyətin maliyyə-vergi ittihamları isə tam absurddur. Bununla dünyaca məşhur bir jurnalisti həbsə atmaq üçün heç olmasa yerli ictimaiyyəti bir az çaşdırmaq gərəkdir və indi bu işə girişiblər. İşə də Rauf Arifoğlu ilə başladılar...

Rauf Arifoğluya hər işi gördürürlər son günlər. Cəmil Həsənliyə qarşı böhtan və təhqirlərə susmaq olardı bəlkə də, Zahid Orucun çaşıb açdığı kimi, onun rəhbərliyi ilə Milli Şura aydın obrazla güclənməkdədir, digərləri isə ara qata bilmirlər, parçala-qarışdır siyasətinə barmaqları girmir. Cəmil müəllimin ictimai meydanda hələ də qalması əngəlçi və təxribatçılara daha rahat oynamağa imkan vermir, istədikləri kimi rəqs edə bilmirlər. Odur ki, Cəmil müəllimə hücumların açıq hala keçməsi və intensivləşməsi gözlənilən idi. Təəccüblənmədik də...

Gözlənildiyi kimi, “Yeni Müsavat”da  çıxan yazı  və ya həmin yazının tezisləri dərhal bütün hakimiyyət mediasına, hətta TV-lərə ayaq açdı. İşin sistemli görüldüyü və bir mərkəzdən idarə olunduğu aydındır. Böhtan yazısının süjeti isə çox sadədir,  guya “Azadlıq” radiosunda maliyyə yeyintiləri, vergi yayınmaları doğrudan da olub, Xədicə də bunun içindədir, bunu  ABŞ-da da qəbul edirlər, ona görə radionun Azərbaycan xidmətinin rəhbəri Kənan Kazımoğlu işdən qovulub. Yəni Xədicə heçdən tutulmayıb.

Kənan radioda daha böyük vəzifəyə Xədicənin həbsindən əvvəl keçib. Radio da, radionun işinə hamilik edən ABŞ Yayım Şurası da bir neçə dəfə elan edib ki, Bakı bürosunun şəffaf fəaliyyətinə əmindir və büronu sonacan müdafiə edəcək. İndi də Rauf Arifoğlunun yaydığı hakimiyyət böhtanını təkzib etdilər, təxribat adlandırdılar. Rauf Arifoğlu nə dedi? Guya belə ciddi məlumatları dərc etməyə bilməyiblər. Hansı ciddi məlumatları - təxribat adlandırılan, Xədicənin məhkəməsinə hazırlıq təbliğatı olan yalanı? Bəs onda Xədicənin araşdırmalarındakı ciddi məlumatları niyə dərc etmirdiniz?

Hakimiyyətin təxribatlarını yayıb, “bu, qəzetçilikdir, hər cür məlumatları verməliyik” deyən bu dəstə  nədənsə hakimiyyətə, İlham Əliyevə, onun həssas məmurlarına aid ciddi məlumatları vermirlər. Bunların ciddi qəzetçiliyi həbsdə olanları, müxalifətçiləri, jurnalistləri əhatə edirmiş...

Bu adam Cəmil Həsənlini ittiham etdi ki, həbsdə olarkən qətldə şərlənən Fərhad Əliyevin müdafiəsi üçün qəzetlərə pul paylayıb. Cəmil bəyi şərlənərək həbsə atılan adamın müdafiəsində iştiraka görə ittiham edənsə həbsdə olanları şərləməklə məşğul olur və buna görə iftar süfrəsi açdığı pulları qazanır. Tək Xədicə deyil ki... Adnanla Emini xarici kəşfiyyata bağlamamışdımı həbs olunduqları zaman?! “Qrant yeyənlər” ittihamını da bu adam başlamadımı?

Aydındır ki, Cəmil bəyə qəzəbləri sonsuzdur. Onu təkcə tapşırığa görə vurmurlar. Müstəqil və müxalif  libası ilə rol oynaya bilmədiklərinə görədir həm də bu. Çünki Cəmil bəyin önə çıxması bunların oyununu pozdu. Cəmil bəyin önə çıxması ilə Rauf Arifoğlunun müdafiəsi üçün hər şeyə gedən İsa Qəmbərin cəlbediciliyi itdi, Pənah Hüseynin rolu bitdi. Cəmil bəy heç vaxt liderliyə can atmamışdı, amma bəlli oldu ki,  bir işi üzərinə götürürsə, onu imitasiya etmir, elə ürəkdən yerinə yetirir ki, nə vaxtsa camaat meydana çıxanda onun evdə oturmayacağına inanmağa başladı adamlar.  Adamlar inandı ki, bu adam öhdəsinə götürdüyü iş üçün çox şeydən keçər, hətta Rauf Arifoğlu kimilərindən gələn xeyirdən də!

Erməniyə ən böyük xidmət bilirsinizmi nədir? Ölkəni talayan, geri və zəif salan hakimiyyətə xidmət etmək!
Putinə arxalanmaq bilirsinizmi nədir? Putinə arxalanıb dünyaya meydan oxuya-oxuya Azərbaycan xalqını əzən bir hakimiyyətə qulluq etmək!
Azərbaycana xəyanət bilirsinizmi nədir? Həqiqətə xəyanət etmək! Hərçənd bunu dərk etmək üçün gərək ayrı bir ürəyin, ayrı bir qafan olsun!
Ən böyük dələduzluq bilirsinizmi nədir? Namuslu, fədakar  müsavatçıları şəxsi maraqların üçün istifadə etmək!
Xədicəyə gəldikdə isə, o artıq qalibdir! Ona atdığınız böhtanlar isə özünüzü ifşa edir və bununla cinayət etmiş sayılırsınız.