Hilal Məmmədovun bəyanatı

İlk öncə bildirmək istəyirəm ki, bilavasitə ictimai-siyasi fəaliyyətimlə bağlı olaraq sifarişli həbsim və barəmdə qaldırılan qondarma cinayət işinin (AR CM-nin 274 (dövlətə xəyanət) və 283.2.2. (milli-dini ayrıseçkilik salma) maddələri üzrə) qapalı məhkəmə prosesləri yekunlaşmış və CM-nin 234.4.3.(narkotik ticarət) maddəsi üzrə açıq məhkəmə iclasları işinə başlamışdır. 4-5 formal məhkəmə proseslərinin qapalı keçirilməsi – guya işimdə “dövlət sirrlərinin” mövcudluğu ilə izah edilsə də, əsil həqiqətdə mənə qarşı quraşdırılmış ittihamların heç bir hüquqi, məntiqi, əxlaqi normalara belə sığmayan və bir-birini təkzib edən cəfəngiyyatlardan ibarət olmasını ictimaiyyətdən gizlədilməsinə xidmət edirdi.

Məhkəmənin ilk açıq iclasında da hakimlərin mənə qarşı açıq-aşkar qərəzli və ədalətsiz mövqeyi onların bu açıq hissəni də başdansovdu, 1-2 formal proseslə yekunlaşdırmaq niyyətindən xəbər verir.

Bu bəyanatımda barəmdəki qondarma işin həm ölkəmizin beynəlxalq imicinə, həm də cəmi bəşəriyyətə qarşı yönəldilmiş və açıq-aşkar avantüra olduğunu bir neçə fakta istinad edərək bildirmək istəyirəm: Əvvəla barəmdə uydurulan cinayət işində istifadə olunan əsas “şahid” – 1973-cü ildən KGB-MTN sisteminin agenti kimi 40 ilə yaxın bir müddət ərzidə istifadə olunan, hal-hazırda isə ruhi-psixoloji durumu qüsurlu olan Elman Quliyev adlı bir xəstədir. O , 2007-ci ilin fevralında CM-nin 274-cü (dövlətə xəyanət) maddəsinə əsasən qondarma ittihamla həbs edilib, 10 il azadlıqdan məhrum edilmiş və sonra zindanda müəmmalı şəkildə vəfat etmiş “Tolışi Sədo” qəzetinin əvvəlki redaktoru, hüquqlarını müdafiə etdiyim prof. Novruzəli Məmmədovun da üzünə dayandırılan əsas şahid idi. Elə özü də bu işdə müqəssir bilinirək 6 il azadlıqdan məhrum edilmişdi. Lakin həbsdə olduğu vaxtlarda da hakimiyyət orqanları ondan öz çirkin məqsədləri naminə az istifadə etməmişlər. Məhz həbsimdən iki gün öncə (19.06.2012) də DİN-in göstərişiylə ona yazdırılmış “könüllü”-“zəhmətkeş” ərizədə mənim guya, 1992-ci ildən İran Xüsusu Xidmət Orqanları (İXXO) ilə əməkdaşlıq edərək, müvafiq tapşırıqlarının əvəzində onlardan pul və külli miqdarda narkotik vasitə aldığım bildirilmişdir. Həmin ərizəyə istinadən mən guya 7 il öncə bir çayxanada bunları ona etiraf etmiş və guya bildirmişəm ki, “İran XXO-nın əməkdaşları təkidlə tapşırıblar ki, onların verdikləri pula və narkotik maddə satışından əldə etdiyimiz pula biz talış millətindən olan şəxsləri Müdafiə, Xarici İşlər Nazirliyi və digər nazirliklərə (növbəti ərizəsində - Milli Məclis, Milli Təhlükəsizlik Nazirliyinin adlarını da əlavə edir) işə düzəltməliyik”. Son dərəcə pimitiv cəfəngiyyatlardan ibarət bu “faktların” doğruluğunun “sübut” etdirilməsi DİN-nin Baş Narkotika İdarəsinə tapşırılır. Onlar da 21.06.2012-ci il tarixində (yəni yazdırılmış ərizədən 2 gün sonra) ciblərimə nümayişkarənə şəkildə narkotik qoyub, məni həbs edirlər. Başqa sözlə desək, guya 7 il sonra öncəki “etiraflarım” təsdiqini tapır və “ifşa” olunuram.

Sonra, bu hədsiz pimitiv və rüsvayçı olayın davamı Respublika Baş Prokurorluğuna həvalə edilir. Bu dəfə onların nümayəndələri artıq həbsimdən sonra, 25.06.2012 və 30.06.2012-ci il tarixlərdə Elman Quliyevin saxlandığı 7 saylı CÇM-nə gedərək, ondan eyni məzmunda daha geniş ərizə və ifadələr alırlar. Bilavasitə bu ərizə və ifadələr əsasında 28.06.2012-ci ildə Nizami rayon polis idarəsi, 29.06.2012-ci ildə isə Azərbaycan Respublikası Baş Prokuroru Zakir Qaralov müvafiq qərarlarıyla barəmdə aşağıdakı cəfəng xarakterli iddiaları sürmüşlər: “Məmmədov Hilal... xarici dövlətin xüsusi xidmət orqanları ilə sıx əlaqədə olmaqla həmin orqanların tapşırıqları əsasında AR-nın ərazi toxunulmazlığı və dövlət təhlükəsizliyi zərərinə fəaliyyət göstərərək AR-nın ərazisində KİV-dən istifadə edilməklə milli düşmənçiliyin salınmasına yönələn hərəkətlər edilməsini təmin etmək məqsədi ilə bir qrup şəxslə qabaqcadan əlbir olub cinayət əlaqəsinə girərək ayrı-ayrı vaxtlarda müxtəlif növ narkotik vasitələri İran İslam Respublikasının ərazisində qanunsuz olaraq əldə edib, daşıyıb, saxlamaqla qaçaqmalçılıq yolu ilə Azərbaycan Respublikasının ərazisinə keçirilməsini və satışını təşkil edərək, əldə olunmuş pul vəsaitlərini qeyd olunan məqsədlər üçün xarici ölkələrdə antiazərbaycan məzmunlu kitabların, qəzetlərin nəşr edilməsinə sərf etməsi, ölkə xaricində AR-nı parçalamaq, daxili sabitliyi pozmaq mövzularında çıxışlar” (Z.Qaralov, qərar 00000723, 29 iyun 2012-ci il) etmişdir...

4 iyul 2012-ci il tarixdə, yəni həbsimdən 2 həftə sonra isə DİN və Respublika Prokurorluğu yuxarıda qeyd olunan cəfəng iddiaları və Elman Quliyevin uydurmaları əsasında birgə bəyanat yayaraq “cinayətimin” artıq sübuta yetirildiyini bildirməklə, nəinki təqsirsizlik prezumpsiyası hüquqlarımı kobud şəkildə pozmuş, həm də bu sifarişli həbsimin bilavasitə iştirakçıları olduqlarını gizlətməmişlər.

Bütün yuxarıda deyilənləri nəzərə alaraq, tam qətiyyətlə bildirmək olar ki, hüquq-mühafizə orqanları əslində məni yox, bir daha özlərini, o cümlədən bu sifarişli oyunlarının başlarında duran hakimiyyət orqanlarının çirkab əməllərini ifşa etmişlər. Belə ki onlar bir tərəfdən bir daha dünya ictimaiyyətinə bəyan edirlər ki, Azərbaycanda Milli Məclisə və digər hakimiyyət orqanlarına vəzifə bölgüləri pul və narkotik gəlirə əsaslanan rüşvət və korrupsiya vasitəçiliyi ilə həyata keçirilir; digər tərəfdən isə onlar İXXO olan “Ettelat”ın narkotik ticarətdə vasitəçiliyi ilə nəinki Azərbaycanda, Rusiya və digər xarici ölkələrdə də milli zəmində fitnə-fəsad törətməsi barədə son dərəcə ciddi ittihamla Azərbaycan Respublikası və İran İslam Respublikası arasında qarşılıqlı dost və qonşuluq münasibətlərinin ən kobud formada pozulmasına rəvac verirlər.

Barəmdəki heç bir hüquqi və əxlaqi məntiqə sığışmayan 234.4.3. (narkotik ticarət) maddəsinin puçluğu, əslində ona ciddi şəkildə bağlı olan digər iki (274 və 283.2.2.) maddələrinin də hüquqi və məntiqi qiymətini puça çıxardır – belə ki, əgər narkotik alveriylə məşğuliyyətim cəfəngdirsə, demək bundan gələn gəlir də olmamış və nəticədə yuxarıda sadalanan qeyri-qanuni əməllərə də yol verilməmişdir...

Yuxarıda qeyd olunan rüsvayçılıqları dünya ictimaiyyətinin, beynəlxalq rəsmi qurumların, beynəlxalq qeyri-hökümət təşkilatların nəzərinə çatdırmaqla yanaşı, bir daha ümidvar olmaq istərdim ki, onlar ölkəmizin hakimiyyət orqanları tərəfindən yalnız vətəndaşlarımızın insan haqlarına qarşı deyil, cəmi bəşəri dəyərlərə qarşı yönəldilmiş bu dəhşətli cinayətlərinə göz yummayacaq və bütün mümkün hüquqi imkanları çərçivəsində ölkəmizin cəmi haqqsevər, demokratik mübarizlərinə, o cümlədən haqsız zindan əzablarını yaşayan siyasi məhbuslarımızın müdafiəsində əllərindən gələni əsirgəməyəcəklər.

Hormətlə,

Hilal Məmmədov,

İsaxan Aşurov mükafatı laureatı,siyasi məhbus