İki gündür mətbuat 4 saylı ...

İki gündür mətbuat 4 saylı qadın cəzaçəkmə müəssisəndə məhkum Lamiyə Quliyevanın uşaq dünyaya gətirməsi barədə yazır. Xatırladım ki, bu həmin Lamiyədir ki, 2003-cü ilin martında nişanlısı Vüqar Əliyevlə birlikdə o zaman Şəmkir RİH-nın başçısı olan Aslan Aslanovun oğlu Ruslanı qətlə yetirmişdi. Qətlə səbəb isə Ruslanın kafedə insanların yanında Vüqara nişanlısı Lamiyə haqqında nalayiq sözlər deməsi olmuşdu. Ruslan və onun Şəmkirdə törətdiyi əməllər haqqında yazmaq fikrim yoxdur, çünki atasının layiqli balası artıq haqq dünyasına qovuşub, amma bu hadisədən sonra icra başçısı (sonra isə kənd təsərrüfatı nazırınin müavini) Aslan Aslanovun qisasçılığı haqqında bir neçə kəlməyə ehtiyac olduğunu düşünürəm. Əslində, Ruslanı vuran Lamiyə olsa da, Aslan Aslanov imkan, səlahiyyət və qohumluq əlaqələrindən istifadə edərək, istintaqın və məhkəmənin onun qisasçılıq ambisiyalarına uyğun qərarlar verməsinə nail oldu. Mədəni, intellektual və idarəçilik səviyyəsi xeyli suallar doğuran Aslan Aslanovun qohumluq və digər əlaqələrinə isə xeyli məmur həsəd apara bilərdi. Belə ki, qərb bölgəsində "de facto" qubernatorluq edən Aslanov müdafiə naziri Səfər Əbiyevlə kirvə, eyni zamanda "Azərneftyağ" birliyinin mərhum direktoru Ramiz Mirzəyevin qaynı idi. Bütün bu imkanlarından istifadə edən Aslanovun qisasçılığı bununla bitmədi. Vüqar Əliyevin ailəsinin Şəmkirdəki evi buldozerlərin qabağına verilərək dağıdıldı, Şəmkirdə sakinlərə oğlu Ruslanın sürdüyü qara rəngdə VAZ-2107 markalı maşını olmaq faktiki qadağan edildi. Ruslanın qətlinin ildönümü günü oğluna toy edən rayon sakini şərlənərək həbsə atıldı. İndi isə məlum olur ki, dünyaya uşaq gətirən Lamiyə Quliyevanın 2013-cü ildə cəza müddəti bitməli olsa da, 2 il əvvəl CM-nin 317-ci (cəzaçəkmə müəssisəsinin və ya istintaq təcridxanasının normal fəaliyyətini pozma) maddəsi ilə onun cəzası 5 il 6 ay artırılıb. Sizi əmin edirəm ki, bu yazdıqlarım Aslan Aslanovun hikkəli özbaşınalıq və cinayətlərinin çox cüzi bir hissəsdir. Əslində belə bir məxluqun haqqında yazmağa da dəyməzdi bəlkə, amma iki səbəbdən buna ehtiyac duydum:
1. Bütün bu özbaşınalığın arxasında insanların taleyinin durması;
2. Adi bir icra başçısının hikkəli qisasçılığının baş verdiyi ölkədəki insan haqları və qanunçuluq haqqında İlham Əliyevin dünən Berlindəki mətbuat konfransında danışdıqları. 
Bu, Azərbaycan reallığında baş verən sıradan hadisələrdən biridir və əminəm ki, bütün bu kriminal maşın Aslan Aslanovun çoxsaylı cinayət əməllərini bugünədək cəzasız buraxdığı kimi, Lamiyə Quliyevanın uşaq dünyaya gətirməsi faktını da ya gündəmdən çıxaracaq, ya da ağlımıza gətirə bilmədiyimiz iyrənc bir versiya üzərində qapadacaq.