İnsan haqları günü münasibətilə təbrik edirəm!

"İnsan haqqı" öz təməlini haqdan alır. Haqq təbiidir, yaradılışla bağlıdır. Doğulduğu andan bu haqq insana təbii qazandırılıb. Hüquq isə veriləndir — parlamentlərin bizə rəva gördüyü həddə. Parlamentin haqqı nə qədər təmsil etdiyi, nə qədər ədalətli olduğu hər zaman mübahisəlidir.

Bunu ona görə xatırladıram ki, müstəqil Azərbaycanda həm haqqın, həm də hüququn ən çox pozulduğu, boğulduğu, böhranlı dövrünü yaşayırıq. Təəssüf ki, ölkədə əksər vətəndaşlarımız hüquqsuzluqdan əziyyət çəkir. Həbsxanalarda məhkumluq həyatı yaşayan insanların çoxu təqsirsizdir.

Ölkədə balanslı, müstəqil media nümunələri ağır sınaqla üzləşib. Həm tənqidi xarakterini qorumaq, həm də balanslı olmaq asan deyil. Buna cəhd edən jurnalistlərin çoxu hazırda həbsxana divarları arasındadır. Peşəkar mediaların qapısına kilid vurulduqca, tənqidçi jurnalistlər susdurulduqca, vətəndaş cəmiyyəti fəalları təqib olunduqca, boşalan meydanı dolduranlar qeyri-peşəkarlar olacaq və söyüş ritorikasının miqyası artacaq.

İnsan haqları günü ərəfəsində siyasi motivli həbs dalğasının artması olduqca üzücüdür. Saxta sübutlarla, qondarma ittihamlarla son vaxtlar həbs olunan şəxslərin əksəriyyəti bu ölkənin ən dəyərli insanlarıdır. Baş verənlər dövlət və cəmiyyət üçün normal hal deyil. Dərhal, yaralar dərinləşmədən bu prosesi durdurmaq zəruridir. Plüralist bir cəmiyyətdən uzaqlaşmaq vətəndaşlarımıza və dövlətimizə nəzərəçarpacaq zərərlər vurur və vuracaq. Dövlət sükanını əllərində tutanlar insan ləyaqətini qoruyan universal dəyərlərin təminatçısı olduqlarını unutmamalıdır.

İnsanın təməl haqlarının doğuşdan olduğuna, heç kim tərəfindən verilmədiyinə inananları, bu haqqa inandıqları üçün azadlığı əlindən alınanları, insanlığa dəyər verən, insan haqlarına sayğı göstərən və insan haqlarını qoruyan hər bir dəyərli insanı İnsan haqları günü münasibətilə təbrik edirəm. Haqq nazilər, amma üzülməz!

Ələsgər Məmmədli

Ələsgər Əhməd oğlu Məmmədli (24 may 1968-ci il, Ağdam rayonu, Quzanlı kəndi) — Azərbaycanlı hüquqşünas, media hüququ üzrə ekspert, Media Hüququ İnstitutunun həmtəsisçisi və "Toplum TV"nin qurucusudur. İstanbul Universitetinin Hüquq fakültəsini bitirən Məmmədli, eyni zamanda Türkiyə və Orta Şərq İdarəçilik İnstitutunda (TODAİE) Hüquq və İdarəçilik üzrə magistr dərəcəsi alıb.

2002-ci ildən bəri Ələsgər Məmmədli jurnalistlərin hüquqlarını müdafiə etməklə və Azərbaycanda müstəqil medianın inkişafını təşviq etməklə fəal məşğul olub. O, hüquqşünaslar və jurnalistlər üçün çoxsaylı təlimlər keçirib, Internews və IREX kimi beynəlxalq təşkilatlarla əməkdaşlıq edib və 2016-cı ildə "Vətəndaş Cəmiyyəti Platforması"nın yaradılmasında iştirak edib.

8 mart 2024-cü ildə Ələsgər Məmmədli qaçaqmalçılıqda ittiham olunaraq (Azərbaycan Respublikası Cinayət Məcəlləsinin 206.3.2-ci maddəsi) həbs edilib. Yerli və beynəlxalq insan hüquqları təşkilatları onu siyasi məhbus kimi tanıyıb və azad olunmasını tələb edib. Hazırda o, Ədliyyə Nazirliyinin Penitensiar Xidmətinin istintaq təcridxanasında saxlanılır.

Ələsgər Məmmədli media hüququ, seçki hüququ, eləcə də insanın konstitusiya hüquq və azadlıqları üzrə bir sıra kitab və elmi məqalələrin müəllifidir. Onun əsərləri həm yerli, həm də beynəlxalq nəşrlərdə çap olunub.