«Siz bu «simasız quldurlar»ın prezidentiziniz, yoxsa bütövlükdə Azərbaycan xalqının?!»
Sabiq müdafiə naziri Rəhim Qazıyev ölkə başçısı Ilham Əliyevə açıq məktub yazıb. Məktubunu olduğu kimi təqdim edirik:
“Siz həm bir kişi, həm də dövlət başçısı kimi verdiyiniz sözün üstündə durmağa həm məcbur, həm də məhkumsunuz”
Vətəndaş Ilham Əliyev!
Başçılıq etdiyiniz, sizin təbirinizcə desək, “anoloqu olmayan” ölkəmizdə baş verən anoloqsuz qanunsuzluqlar, qudurğan məmurların və onların özlərindən də qudurğan balalarının normal insan təfəkkürünə sığmayan harınlıqları barəsində ünvanınıza çoxsaylı məktublar göndərmişəm. Heç birinə də cavab almamışam. Ətrafınızdakı nadan və yaltaq məmurlar isə, sizin millətə olan qayğı və diqqətinizin bariz nümunəsi kimi, Dağlıq Qarabağdan olan erməni əsilli 13 yaşlı Azərbaycan vətəndaşının ünvanınıza göndərdiyi məktuba cavabınızı bütün aləmə təkrar-təkrar bəyan etdilər. Burada bir xalq məsəlini xatırlatmaq çox yerinə düşərdi: “Birinə deyirlər ki, xalan gəzəyəndi, o isə cavabında deyir ki, o gəzəyən olsaydı, heç olmasa, bir dəfə də bizə gələrdi”.
Başçılıq etdiyiniz ölkə əhalisinin tükürpədən, çoxsaylı ağlagəlməz problemlərinə olan laqeyid münasibətinizin danılmaz təzahürü kimi, 10 il hakimiyyətdə olduğunuz müddətdə, bir dəfə də olsun vətəndaşlarınızla birbaşa, üz-üzə durub, onlarla təmasda olmadığınızı qeyd etmək kifayətdir.
Vətəndaş Ilham Əliyev!
Bundan öncə ünvanınıza göndərdiyim müraciətin sonuncu olacağını bildirsəm də, məmləkətimizdə artıq ərşə dayanan zülmün və zillətin qarşısında vicdanımın məni rahat buraxmadığını hiss elədim və belə bir şəraitdə susmağın özünün də, əz azı sizin və qudurğan məmurlarınınzın bitib-tükənmək bilməyən nəfsinə, harınlığına, eləcə də illərdi ki, artan xətlə davam edən cinayət xarakterli əməllərinə şəriklik qədər ağır günah olduğunu dərk elədim. Bu nədənlə, sizin başçısı olduğunuz ölkədə yaşayan qeyri-qanuni, qeyri-insani problemləri görüb dərk edən və həmin ağrı-acılarla yaşayan bir vətədaş olaraq, bu problemləri həll etməyə borclu olan səlahiyyət sahibi kimi sizdən cavab alana kimi, yazmaqda davam edəcəyəmə qərar verdim!!! Ən azı ona görə ki, siz bu ali vəzifənin icrasına başlayan gün müqəddəs Qurani-Kərimə əl basıb, ölkə konstitusiyasının bütün bəndlərinin qarantı olacağınıza təntənəli surətdə and içib, söz veribsiniz! Siz həm bir kişi, həm də dövlət başçısı kimi verdiyinz sözün üstündə durmağa həm məcbur, hə də məhkumsunuz.
“Siz bu qudurğan məmurları cəzalandırmaq əvəzinə, onlara himayədarlıq edirsiniz”
Vətəndaş Ilham Əliyev!
Əgər bir məmləkətdə müəllim, həkim, hakim rüşvət alırsa, o məmləkət məhvə məhkumdur.
Unutmayın ki, başçısı olduğunuz ölkə əhalisinin başına, qürurla dediyiniz kimi (12.02.2013), sizin vəzifəyə təyin etdiyiniz qudurğan məmurlar olmazın oyunlar açır. Siz bu qudurğan məmurları cəzalandırmaq əvəzinə, onlara himayədarlıq edirsiniz. Çalışacağam ki, konkret faktlarla bu anoloqu olmayan məmur nadanlıqlarını(ən yaxşı halda) diqqətinizə çatdırım.
12.01.2013 - cü il tarixində orduda məlum olmayan səbəblərdən, qeyri-döyüş şəraitində, (bir il ərzində 97 nəfər) əsgər ölümlərinə qarşı etirazını bildirən çoxsaylı insanlara “anti-milli ünsürlər” dediniz və bu aksiyanın sabitliyi pozmaq istəyən radikal müxalifət tərəfindən təşkil edildiyini qeyd etdiniz. Bununla da, övladları nadan hərbi hissə komandirlərinin cinayətkar əməlləri nəticəsində öldürülən əsgər valideynlərini təhqir etmiş oldunuz.
Vətəndaş Ilham Əliyev!
Unutmayın ki, sizin Ali Baş Komandan olaraq, öz komandirləri tərəfindən öldürülən əsgərimizin taleyinə, anoloqu olmayan bu münasibətiniz, həm öldürülən əsgərimizin ruhuna, həm də onun doğmalarına qarşı etdiyiniz çox ağır utanc gətirən hörmətsizlikdir. Aşağıdakı sətirləri yazmaq mənə nə qədər ağır olsa da, həmin mövqeyimi sizə bildirəcəyəm.
Vətəndaş Ilham Əliyev!
Bir anlığa da olsa, təsəvvür edin ki, döyülərək öldürülüb tabutda villanıza gətirilən əsgər, sizin doğma balanız Heydər Ilham oğlu Əliyevdir. Siz, Ilham və Mehriban Əliyevlər, əlinizdən heç nə gəlməyən adi bir vətəndaşlardan biri olaraq, nə vəziyyətə düşərsiniz və bu cinayətin qarşısını almalı olan prezident - Ali Baş Komandan barəsində nə düşünərsiniz və fəryadlar içndə ona da, balanızın qatillərinə də Uca Allahdan hansı cəza verilməsini diləyərsiniz?! Oysa, illərdi ki, qətlə yetirilən, öldürülən, müəmmalı şəkildə canlarına guya qəsd edən hər bir əsgərin faciəsini öz doğma balanızın faciəsi kimi qəbul etmək mükəlləfliyiniz olduğunu da sizə xatırlatmağı vacib sayıram.
“Siz ad gününüzü qaçqınlarla keçirdiyinizi deyəndə, 50 və 51 metrlik tortların kəsilməsini unutmuşdunuz?”
Son bir ildə Qubada, Ismayıllıda və respublikanın digər rayonlarında haqsızlıqlardan bezmiş insanlar kəskin etirazlarını bildirib, bu qudurğan mikro prezidentlərin cəzalandırılmasını tələb etdilər. Vətəndaş Ilham Əliyev, bu dəfə də rayonlarda əhalinin “dərisini soyub” onları təhqir edən qudurmuş “simasız quldurlar”ı (ifadə hörmətli Sirus Təbrizlinindir) müdafiə etdiniz. Burada da bir xalq deyiminin yeri görünür. Yəni, obrazlı desək, vətəndaş Ilham Əliyev, deyə bilərsinizmi, siz bu “simasız quldurlar”ın prezidentiziniz, yoxsa bütövlükdə Azərbaycan xalqının?! Hətta, 12.02.2013-cü tarixində keçirdiyiniz müşavirədə, bir çox məmurları və onların övladlarını “qudurğan və harın” adlandırdınız.
Bununla belə, heç olmasa, guya tutduqları vəzifələrə rəğmən, dövlətin verdiyi məvaciblə yaşayan bu harın, qudurğan məmurların və onların balalarının, məbləği astronomik rəqəmlərlə ölçülən varidatlara sahib olmaları, bu cür görünməmiş varlanmanın maliyyə mənbəyinin haradan olması barədə, görüntü xatirinə də olsa, bircə ritotik sual belə vermədiniz. Lakin siz onlara sizin kimi sadə həyat sürməyi, sizdən nümunə götürməyi məsləhət gördünüz. Ad gününüzü Ağcabədidə qaçqınlarla keçirdiyinizi xatırlatdınız. Təssüflər olsun ki, həmin məqamda müşavirədə qarşınızda əyləşdirdiyiniz məmurların üzündəki istehzalı təbəssümləri, arxayınçılıqları hiss etmədiniz və ya görməməzliyə vurdunuz.
Vətəndaş Ilham Əliyev! Siz ad gününüzü qaçqınlarla keçirdiyinizi deyəndə, yəqin ki, 2011-ci ilin dekabrın 24-də və 2012 - ci ilin həmin tarixində Sumqayıtda eyni bir şəxsin - şəhər IH-in başçısı Eldar Əzizovun yaltaqcasına canfəşanlığı ilə hazırladığı, müvafiq olaraq da, 50 və 51 metrlik anoloqu olmayan tortların təntənəli şəkildə kəsilməsini unutmuşdunuz?.. Amma,
Vətəndaş Ilham Əliyev!
Görəsən heç olmasa, etika xatirinə də olsa, o “simasız quldurlar”dan biri olan və “məvaciblə dolanan” Eldar Əzizovdan həmin tortlar üçün pulu haradan aldığını sual etdinizmi? Sizin kimi yaşamağı, təyin etdiyiniz harın məmurlara tövsiyyə etdiyiniz məqamda, şübhə etmirəm ki, dillərdə dastan kimi deyilən tikdirdiyiniz çoxsaylı villaların, iqamətgahların insanları heyrətə salan dəbdəbəli büsatını, ətrafını orta əsrlərdəki kimi hördürdüyünüz hasarları, hələ bu da azmış kimi, çoxsaylı 5-20 mərtəbəli yaşayış üçün tam yararlı binaları yerlə-yeksan etdirdiyinizi, hələ bunlarla da kifayətlənməyərək, Azərbaycandan çox-çox uzaqlarda astronomik maliyyə vəsaitinə aldırdığınız və bəlkə də sayını özünüzün də unutduğunuz malikanələri məmnunluq və özünüzdən razılıq hissi ilə xəyalınızda canlandırırdınız. Şübhəsiz ki, sizin təyin etdiyiniz, sizin tövsiyyələrinizlə işləyən, “məvaciblə yaşayan”, harın, qudurğan məmurlar, hökmən özlərini az və ya çox şəkildə sizə oxşatmağa çalışırlar və göründüyü kimi, bu istiqamətdə həsəd aparılacaq həddə uğur qazanlblar. ..
“Sənə, xalq kömək edə bilər, xalqdan oğurlanaraq, xarici banklara yığılan milyardlarla pullar yox!”
Vətəndaş Ilham Əliyev!
Bu növbəti məktubumda qeyd etdiyim bir neçə fakt, ölkədə baş alıb gedən, sizin təbirinizcə desək, anoloqu olmayan harın, qudurğan məmur özbaşnalıqlarının adi gözlə görünən hissəsinin çox kiçik, mikroskopik bir zərrəsidir. Qərəzsiz, iddiasız, heç bir məqsəd güdmədən sizə göndərəcəyim bu məktubu, diqqətlə oxuyun. Burada ünvanınıza yazdığım çox ürək ağrıdan və səmimi tənqidlərdən nəticə çıxarmaq birinci növbədə özünüz üçün və eyni zamanda, başçılıq etdiyiniz vətən, millət üçün çox xeyirli olardı. Mən əminəm ki, istər ətrafınıza yığdığınız harın, qudurğan, gözləri doymaq bilməyən yaltaq məmurlar və əyləşdiyiniz hakimiyyət kürsüsü naminə, hər şeyi qurban verməyə hazır olan müxalifət liderlərinin çox böyük bir hissəsi, bu səmimiyyətlə və bu cəsarətlə sizin eyiblərinizi, səhvlərinizi, zamanı gələndə sizə ağır cinayətlər kimi veriləcək ittihamları üzünüzə deməyəcəklər.
Gərək ki, indiyədək siz bunları görmüş və bilmiş olaydınız. Ən azı ona görə ki, atanız Heydər Əliyevin birinci, ikinci və nəhayət üçüncü - sonuncu bölümündən dərs alaydınız və nəticə çıxaraydınız. Axı sənin özün də, biz də, Heydər Əliyevin 1969-1987 - ci illərdə ətrafına yığılan şərəfsiz yaltaqların, 1987-1992-ci illərdə onu necə təhqir edib, alçaltdığının canlı şahidiyik. Təbii ki, öz xislətinə, təbiətinə uyğun şəkildə, həmçinin də təcrübəsinə arxayın olaraq, o, ikinci dəfə hakimiyyətə gələndə, yenə də həmin yaltaqların böyük əksəriyyətini yanına yığdı. Heydər Əliyev onları istədiyi qədər alçaldırdı və ürəyi istədiyi kimi də onlardan istifadə edirdi. Ona görə ki, o, həmin məmurları çox yaxşı tanıyırdı, onların hamısı Heydər Əliyevdən qorxurdular və onun mütləq mənada qulu idilər.
Vətəndaş Ilham Əliyev!
Unutma ki, sən yalnızca onun oğlusan, Heydər Əliyev deyilsən və ola da bilməzsən. Unutma ki, ətrafındakı, artıq balinaya, akulaya çevrilmiş, oliqarx məmurlar, nazirlər, icra başçıları və digərləri, sənin üçün çox qısa zamanda ən dəhşətli, qəddar və amansız müxalif qüvvəyə çevriləcəklər. Bu zaman çox da uzaqda deyil. Ilham Əliyev, sənin yeganə çıxış yolun, Haqqa üz tutub, illərdi Heydər Əliyevin və sənin bilərəkdən və ya bilməyərəkdən çox ağır zülmlər etdiyiniz, pisliyi çox tez unudan, kiçicik bir yaxşılığı şişirdib, qat-qat dəyərləndirən, artıq on ilə yaxın bir müddətdə başçısı olduğunuz xalqdan üzr istəyib, ona arxalanmaqdır. Zaman isə çox azdır. Sənə, bundan sonra, bir olan Uca Allah və bir də səmimi və sadəlövh xalq kömək edə bilər, xalqdan oğurlanaraq, xarici banklara yığılan milyardlarla pullar yox!
Vətəndaş Ilham Əliyev!
Siz Azərbaycan dilini pis bildiyinizdəndir ki, onun şifahi xalq ədəbiyyatından da bixəbərsiniz. Ilham Əliyev, başçılıq etdiyiniz bu xalq, pisi də, yaxşını da görür, bilir və qiymətləndirməyi bacarır, üzdə sezilməyən izləri belə görür. Bu mənada, sizə yazdığım məktuba bizim xalqın nə qədər həssas olduğunu sərgiləyən bir bayatı da əlavə edirəm
Əzizim baxtı yarım,
Baxtımın taxtı yarım.
Üzündə göz izi var,
Sənə kim baxdı yarım.
“Məgər doğma balalarımızı öldürməyə həmin şərəfsiz komandirləri, müxalifət liderləri təhrik edir?!”
Vətəndaş Ilham Əliyev!
Məgər sizin təyin etdiyiniz və sizin tapşırığınızla işləyən məmurların da, məmur balalarının da, elə özünüz tərəfindən etiraf olunan qudurğanlıqlarını və harınlamalarını da Ilqar Məmmədovla Tofiq Yaqublumu təşkil etmişdilər???!!! Ictimai-siyasi fəallarla, müstəqil və tənqidçi media mənsubları ilə, sizin təyin etdiyiniz və sizin tapşırıqlarınızla fəaliyyət göstərən hüquq-mühafizə orqanlarında, həmçinin də məhkəmələrdə oynanan oyunlardan, yaşanan rəzalət və biabırçılıqlardan xəbəriniz varmı?
Qısa zaman kəsiyində, qətiyyən dəxli olmayan qondarma maddələrlə ağır ittihamlara məruz qoyulan və faktiki olaraq şərlənərək uzun müddətli həbs cəzası alan (Nemət Pənahlı - 6 il, Ramiz Tağıyev - 8 il, Fərəməz Allahverdiyev - 4 il 6 ay, Əvəz Zeynallı - 9 il və sair. Ayrıca, Ilqar Məmmədovla Tofiq Yaqublunu da eyni aqibətin gözlədiyini indidən söyləmək mümkündür) Azərbaycan vətəndaşlarının belə kobudcasına pozulan hüquqlarının bütün günah və babalının sizin boynunuza düşdüyünün fərqindəsinizmi?! Qurana əl basıb and içəndə, onların da vətəndaş hüquqlarını qoruyacağınıza söz verməmişdinizmi?!
Vətəndaş Ali Baş Komandan!
Valideyn çox ağır əzab-əziyyətlə övlad böyüdüb, onu vətənin müdafiəsinə yola salır. Əgər bu övlad vətən uğrunda döyüşlərdə Şəhidlik və ya sağlamlığının bir hissəsini itirərək, Qazilik zirvəsinə ucalırsa, bu ağır itkiyə nə qədər yanqılı olsa da, valideyn qürur hissi ilə dözür və mətanətlə, ürəkdən yana-yana davam gətirir. Indi siz təsəvvür edin, əsgərə vətənpərvərlik hissi aşılamalı, döyüş təlimi keçməli, qəhrəmanlıq nümunəsi göstərməyə borclu olan zabitlər, (komandirlər) onu, məlum olmayan (əslində məlum olan) səbəblərdən, qeyri-insani şəkildə məhv edirsə, siz də ona müəyyən mənada haqq qazandırırsınızsa, belə çıxır ki, vətəndaşlar bu nadanlığa dözməli və susmalıdı? Məgər doğma balalarımızı öldürməyə də həmin şərəfsiz komandirləri, müxalifət liderləri təhrik edir, bitib-tükənmək bilməyən əsgər ölümlərini də onlar təşkil edirlər?!
Bir də, sizin dövlət başçısı kimi davranışlarınıza, idarəetmə üslubunuza və bir insan kimi hərəkətlərinizə kənardan baxanda, adamda belə təəssürat yaranır ki, özünüzü əzəli və əbədi sayır, dünya durduqca yaşayacağınızı düşünürsünüz. Amma unutmayın ki, siz də bütün insanlar kimi Uca Tanrının lütf edərək müvəqqəti hayat bağışladığı milyonlarla ölümlü bəndələrdən birisiniz.
Söz istəyirəm
-
Gəncə şəhərində ünvanlı sosial yardımın təyinatı ilə bağlı yubanmalar yarandığı deyilir. Gəncə şəhərində yaşayan Hacıyev Vüqar Turana bildirib ki, artıq bir aydan çoxdur ki, ünvanlı dövət sosial yardım üçün Dövlət Sosial Müdafiə Fondunun Gəncə vahid əlaqələndirmə mərkəzinə müraciət etsə də, ona nə müsbət cavab, nə də imtina cavabı verilmir: "Əlaqəndirmə mərkəzinə zəng vurub soruşanda deyirlər ki, VEMTAS sistemi işləmir deyə, müraciətlərə baxılması və cavabların verilməsi mümkün deyil. Bir aydan çoxdur ki, Gəncədən müraciət edən adamlar konkret cavab ala bilmir".
-
Çin hökümətinin başlatdığı Bir yol, bir kəmər layihəsi Çinin müasir tarixinin əsas uğuruna çevrilib. Çin Xalq Respublikasının təşəbbüskarı olan layihəyə tərəfdaş ölkələrdəki fəaliyyəti yalnız ikitərəfli iqtisadi yüksəlişlə məhdudlaşmır, həmçinin Bir yol, bir kəmər-ə üzv olan dövlətlərdə Çinin xarici siyaəstinə dəstəkdir. Əlavə olaraq layihədə üzvlüyü olan ölkələr Çin üçün mühüm təbii resurs mənbəyidir. Azərbaycan da Çinin rəhbərlik etdiyi Bir yol, bir kəmər layihəsinin iştirakçılarından biri olaraq ikitərəfli münasibətlərin tərəqqisində mühüm rol oynayır. Belə ki, Rusiya-Ukrayna müharibəsinin başlanması ilə Rusiya ərazisinin Qərbə çıxışının bağlanmasından sonra Trans-Xəzər Beynəlxalq Nəqliyyat yolu Azərbaycanı əsas ticarət marşurut xətti edib. Həmçinin yaranan şərait qeyri-neft sektorun artırmaq və İkinci Qarabağ Müharibəsindən sonra xarici investisiyanın ölkəyə axınını planlaşdıran Azərbaycan üçün xeyirli nəticələnə bilər. Lakin, Çinlə münasibətlərdəki yalnış siyasət bir çox mənfi təsirlər də vəd edir.
-
İki il əvvəl Biləsuvar Rayon İcra Hakimiyyətinin və Əmək və Əhalinin Sosial Müdafiəsi Nazirliyinin nümayəndələri Birinci Qarabağ müharibəsinin qəhrəmanı, şəhid Şaiq Kəlbiyevin evinə gəliblər və hakimiyyətin bu ailə üçün yeni ev tikmək niyyətində olduğunu bildiriblər.
-
Dəyərli media mənsublarını, peşəkar və vicdanlı jurnalistləri məhbəsdən salamlayıram.
Rəy yaz