Rusiya hüquq müdafiəçiləri Saxarov mükafatının Leyla və Arif Yunuslara verilməsini xahiş edirlər

Rusiyanın tanınmış hüquq müdafiəçiləri Lyudmila Alekseyeva, Svetlana Qannuşkina, Sergey Kovalyov və Oleq Orlov Avropa Parlamentinə müraciət göndərərək 2014-cü il üçün Saxarov mükafatının həbsdə olan azərbaycanlı hüquq müdafiəçiləri Leyla və Arif Yunuslara verilməsinə çağırıblar.

“Son nəsil sovet dissidentlərinin nümayəndələri və Andrey Saxarovun ardıcılları kimi biz öz ölkəsində insan hüquqlarını müdafiə etdiyinə görə əziyyət çəkən azərbaycanlı həmkarlarımızı dəstəkləyirik”, - müraciətdə deyilir.

Leyla Yunus və onun həyat yoldaşı Ariflə biz 1989-cu ildən - bir qrup vətəndaşın Azərbaycanın müstəqilliyi uğrunda mübarizəyə başladığı vaxtdan əməkdaşlıq edirik.

Məhz onların köməyilə Svetlana Qannuşkina Ermənistandan olan azərbaycanlı qaçqınlarla görüşə bilib. 1990-cı ilin yanvarında Bakıda qırğınlar olanda, şəhərə qoşun yeridiləndə və onlarla dinc sakin qətlə yetiriləndə yalnız Yunuslar ailəsindən adekvat məlumat almaq mümkün idi.

1992-ci ilin yanvarında L.Yunus Azərbaycan və Ermənistan ziyalılarının ilk görüşünün koordinatoru olub. Münaqişənin kəskin mərhələsində bu görüş tarixi əhəmiyyət daşıyıb. Qafqazın tanınmış ziyalıları Qrant Matevosyan və Əkrəm Əylisli bu görüşdə iştirak ediblər.

Hazırda Ə.Əylisli “Daş yuxular” romanına görə amansız təqiblərə məruz qalıb. O, kitabda 1990-cı il faciəvi yanvar hadisələrini və ermənilərlə azərbaycanlıların dinc yaşadıqları  doğma kəndi Əylisi təsvir edir. Yazıçını müdafiəyə qalxan azsaylı insanların arasında Leyla və Arif Yunuslar da var idi. Bu sülhməramlı hərəkət onların adına günah kimi, vətənə xəyanət kimi yazılır.

Sonra müəlliflər qeyd edirlər ki, 1996-cı ildə L.Yunus Sülh və Demokratiya İnstitutu qeyri-hökumət təşkilatını yaardıb. Bu illər ərzində SDİ vətəndaşların hüquqlarını müdafiə edib.

L.Yunusun fəaliyyəti bütün dünyaya bəllidir və dəfələrlə beynəlxalq mükafatlara layiq görülüb. O, Fransanın Fəxri Legion Ordeni kavaleridir.

2003-cü ildə gənc prezident İlham Əliyevin hakimiyyətə gəlişi  cəmiyyətin demokratikləşməsinə və hüquq müdafiəçilərinə qarşı mübarizə metodlarının yumşaldılmasına ümidləri doğrultmadı. Onlara qarşı mübarizə  ən kəskin və yolverilməz forma aldı, hətta hüquq müdafiəçilərinin uşaqlarına qarşı təqiblər başladı. Məhz bu səbəbdən Leyla və Arif Yunusun qızı Almaniyada sığınacaq almağa məcbur oldu.

Siyasi məhbuslara dair siyahının dərcindən sonra Yunuslar ailəsinə yeni təzyiqlər dalğası başladı. İndi bu siyahıda onların da adları var.

Aprelin sonlarında L. və A.Yunusların Azərbaycandan çıxmasına icazə verilməyib. Onlar aeroportda saxlanılıb, pasportları alınıb, evlərində axtarış aparılıb.

İyulun 30-da L.Yunus həbs olunub. A.Yunus əvvəlcə azadlıqda olub, sonra o da həbs edilib. Onlara qarşı  dövlətə xəyanət, dələduzluq, vergidən yayınma, sənədlərin saxtalaşdırılması kimi ağır ittihamlar irəli sürülüb. Onları 15 il azadlıqdan məhrumetmədən tutmuş ömürlük həbsə kimi cəza gözləyir. Həmin maddələr üzrə proseslər ictimaiyyət üçün qapalı rejimdə keçirilir.

Təcridxanadan daxil olan məlumatlara görə, onların yanına vəkil buraxılmır, şəkər xəstəsi olan L.Yunusa dərman və ərzaq verilmir. Son məlumata görə, Leyla həbsxanada döyülüb.

“Hörmətli, Avropa Parlamentinin üzvləri. Leyla Yunus və onun həyat yoldaşı Arif Yunus uzun illərdir ki, insan hüquqları, demokratiyanın inkişafı, milli azlıqlara qarşı ayrı-seçkiliyin aradan qaldırılması sahəsində fəaliyyət göstəriblər.

Onlar Andrey Saxarov mükafatının laureatları adını qazanmağa layiqdirlər.

Bu mükafatın onlara verilməsi bəlkə də onu, Arifi və 96 siyasi məhbusu gələcək təqiblərdən qoruyar, eyni zamanda Avropa Şurasına üzv  ölkələrdən biri olan Azərbaycanda insan hüquqlarının vəziyyətinə diqqəti yönəldər.

Bu mükafat bəlkə də nə qədər gec deyil Azərbaycanda ümumi vəziyyətə təsir göstərər”, -müraciətdə bildirilir. -02D-