Son olaylarla bağlı DAH-ın bəyanatı

Son zamanlar Azərbaycanda baş verən xoşagəlməz olaylar xaricdə yaşamağımıza baxmayaraq, bizləri də ciddi şəkildə narahat etmişdir. Xüsusilə qeyd edək ki, dünyada digər dövlətlərin demokratiya sahəsində yeni-yeni irəliləyişlər etməsinin qarşılığında, Azərbaycanda demokratiyanın tam məhv edilməsini müşahidə etmək ağırdır. Bu sırada ictimai xadim, hüquq-müdafiəçisi, Sülh və Demokratiya İnstitutunun direktoru Leyla Yunusun həbs edilməsi çox sarsıdıcıdır. Bu, demokratiyaya vurulan bir zərbədir. Çünki Leyla Yunus təkcə sıradan bir hüquq müdafiəçisi deyil, həm də Azərbaycan ictimaiyyətini xarici tədbirlərdə ləyaqətlə təmsil edən bir nümayəndədir. Eyni zamanda 60 yaşında ağır diabet xəstəliyindən əziyyət çəkən bir insanı zorla həbs edərək ağır maddələrlə ittiham etmək, Azərbaycan hakimiyyətinin qisasçılıq məqsədindən xəbər verir. Artıq istər xaricdə, istər daxildə heç kəs şübhə etmir ki, Leyla Yunus məhz Azərbyacan hakimiyyətini açıq tənqid etdiyi üçün həbs edilib. Onunla bağlı hakimiyyət tərəfindən müxtəlif şəxslərin adıyla verilən bəyanatlar da bunu sübut edir. Bütün bu addımlar isə təksə Azərbaycan hakimiyyətinin qisasçılıq mahiyyətini ortaya qoymur, eyni zamanda Azərbaycan dövlətini və xalqını beynəlxalq ictimaiyyət qarşısında nüfuzdan salır. Ölkədə represiyalar gücləndikcə, beynəlxalq ictimaiyyət Qarabağın ermənilər tərəfindən işğalına haqq qazandırır.

Leyla Yunusun həbsindən dərhal sonra Azərbaycan Nəşriyyatının 20 min manat borc məsələsinə görə, "Azadlıq" qəzetinin çapından imtina etməsi isə Azərbaycanda azad medianın tam olaraq məhv edilmək ərəfəsində olduğunu təsdiqləyir. Çünki "Azadlıq" qəzetinin satışdan əldə etdiyi 70 min manat pul "Qasid" firması tərəfindən verilmir. Hakimiyyətin göstərişilə bir firma qəzetin satışdan əldə edilən pulunu vermir, nəşriyyat isə bu üzdən yaranan borca görə qəzetin çapından imtina edir. Bu prosesin özü açıq şəkildə ortaya qoyur ki, "Azadlıq"ın çapından imtina edilməsi məhz siyasi hakimiyyətin sifarişilə həyata keçirilib. Ölkədə az qala fəaliyyətsiz KİV-lərə belə KİV-ə Dövlət Dəstəyi Fondundan yüz minlərlə manat yardım ayrıldığı halda, "Azadlıq" qəzetinin çapının 20 min manata görəD dayandırılması absurddur. Və bu sifarişin məhz siyasi hakimiyyət tərəfindən verildiyini göstərir.

Bunları qeyd edərək, biz xaricdə yaşayan azərbaycanlılar olaraq, eyni zamanda Azərbaycan hakimiyyətini işğal olunmuş Kəlbəcər rayonunda əsir götürülmüş Dilqəm Əsgərovun, Şahbaz Quliyevin taleyinə biganə yanaşmaq da qınayırıq. Həmçinin öldürülmüş Həsən Həsənovun cənazəsinin alınmaması üçün də heç bir ciddi addım atmamasına təəssüfümüzü bildiririk. Atəşkəs rejiminin davamlı pozulması nəticəsində son bir gün içərisində 10-dan çox Azərbaycan əsgərinin şəhid olması da bizi dərindən sarsıtdı. Ölkəmizin bu problemlərdən yeganə xilası isə məhz demokratik bir dövlət sisteminin qurulmasıdır. Qarabağın azadlığı da, insan hüquqlarının qorunması da, azad mətbuatın yaşaması da məhz demokratiyadan, ədalətli cəmiyyət quruculuğundan asılıdır. Biz xaricdə yaşayan azərbaycanlılar olaraq, hakimiyyəti repressiv əməllərdən çəkinməyə çağırmaqla yanaşı bildiririk ki, Azərbaycanda demokratik cəmiyyət qurulması üçün lazım olan bütün hüquqi mübarizə formalarından istifadə edəcəyik. Biz Azərbaycandan kənarda olsaq da, Azərbaycan bizdən kənarda deyil. O bizim əzəli və əbədi vətənimizdir. Onu hamılıqla zülmdən və zülmkardan xilas etməliyik.

Demokratik Azərbaycan Hərəkatı

01.08.2014

Avropa