![Xalq da bilir, Avropa da](https://turan.az/resized/750/500/resize/media/2015/main/091600129689.jpg)
- Söz istəyirəm
- 16 Sentyabr 2015, 16:46
- 33
Xalq da bilir, Avropa da
Şahvələd Çobanoğlu
Əsl komediyadır! Milli Məclisin sədri postunu tutan Oqtay Əsədov deyir ki, Avropadakı mənzərəni görəndə ürəyi ağrıyır. Təsəvvür edin ki, bunu ürək ağrısına görə Avropada həkimə gedən biriləri deyir və gözəl bilirlər ki, onun bu sözləri hamıda gülüş doğurur.
YAP təmsilçilərini, deputatları dinlədiniz, halları bəllidir sizə. Bəs sizcə Azərbaycan hakimiyyətini təmsil edənlər niyə bu qədər isterika içindədir, niyə bu qədər gülməli hala salırlar özlərini? Mən qətnamədən düzgün nəticə çıxarıb doğru addım atmalarını demirəm, bu, gözlənilən də deyil, heç olmasa Avropa Parlamentinin ölkəmizlə bağlı 10 sentyabr qətnaməsinə ciddi və saymazyana münasibət göstərə bilməzdilərmi? Rus bayrağı ilə təşkil olunan o cür etiraz aksiyası, parlamentdəki çıxışlar, uzağa getməyək, elə ölkə içində də bunları, daha da bayağı, aciz və mənfur göstərir. Bəli, Avropa Parlamentinin qətnaməsi olduqca sərtdir, olduqca sərt dönəmin başladığını bildirir, amma sərt də olsa ciddi cavablar vermək olmazdımı?
Bunu ona görə sormuram ki, gözləntilər vardı. Bunu ona görə soruram ki, bu hakimiyyətin mahiyyətini bir daha yada salasınız. Mən hələ onu demirəm ki, Rusiya Ermənistana ciddi partiyalarla silah-sursat verəndə bu adamların heç birinin səsi öz qulağına çatmırdı.
Işin başqa tərəfi var. Ən vacib tərəfi! Avropa Parlamentinin Azərbaycanla bağlı 10 sentyabr qətnaməsi məhz onunla sərtdir ki, orada yazılanlar HƏQIQƏTDIR. Çünki yalan olsaydı, qərəzli olsaydı, bu qədər əhəmiyyət də verməzdilər. Əksinə, sevinib deyərdilər ki, görürsünüz, yalan danışırlar. Yalan isə yoxdur, hamısı həqiqətdir. Ona görə də çalışırlar bu qətnaməni Azərbaycana qarşı qəbul edilmiş bir sənəd kimi qələmə versinlər, halbuki sənəd hakimiyyətin mahiyyəti və əməlləri barədədir.
Qətnamə qəbul olunduqdan sonra hakimiyyəti müdafiə edənlərin bir neçəsi bəyan etdi ki, sənəd Azərbaycanda hazırlanıb. Bu, çox incə məqam idi. Bu o demək idi ki, Avropa sənəddəki məqamların hamısını belə dəqiqliklə bilə bilməz, onu yalnız buradan yazıblar. Əslində, etiraf idi bu cür münasibətlər, orada yazılanların Azərbaycanda bilinən həqiqət odluğunun etirafı idi. Sadəcə, Avropaya necə bu dəqiqliklə çatdığına inana bilmirdilər.
Amma çox ciddi şəkildə yanılırlar, ölkədə baş verənləri, hakimiyyətdəkilərin nələrlə məşğul olduğunu bilməyən yoxdur. Xalq da bilir, Avropa da. Hətta bunları dilə gətirməyəndə də bilirdilər hər şeyi. Sadəcə, o qədər ağ elədilər ki, artıq susa bilmədilər…
Avropa Parlamentinin 10 sentyabr qətnaməsi tarixi sənəddir. Illərlə Azərbaycandakı zülmə susqun qalmış Avropanın əl-üzünü tamam yumasa da, yeni tarixi mərhələnin başlamasını özündə əks etdirir. Tarixin gedişini anlamayanlar isə həşir qaldırmaqda davam edirlər. Amma xeyri varmı?
Bir neçə il əvvəl kimin ağlına gələrdi ki, hakimiyyət öyündüyü büdcəni ciddi şəkildə kəsə bilər?
Bir neçə il öncə kim qəbul edərdi ki, manatı endirəcəklər?
Bir neçə il öncə kim deyə bilərdi ki, Avropada bu cür açıq sənədlər qəbul ediləcək bu rejimin əməlləri barədə!
Nə baş verdiyini analiz etmək, nəticə çıxarmaq mürəkkəb iş deyil. Sabahı görmək, onu təsvir etmək üçün sözlər seçmək mümkünsüz deyil. Anlamaq çətin deyil. Azərbaycanın ən dəyərli övladlarına şər məhkəmələrində hökm oxumaqla təntənə yaşayanlara tarix hökm oxumağa hazırlaşır.
-
- İqtisadiyyat
- 16 Sentyabr 2015 16:42
-
- Cəmiyyət
- 16 Sentyabr 2015 17:22
Söz istəyirəm
-
Gəncə şəhərində ünvanlı sosial yardımın təyinatı ilə bağlı yubanmalar yarandığı deyilir. Gəncə şəhərində yaşayan Hacıyev Vüqar Turana bildirib ki, artıq bir aydan çoxdur ki, ünvanlı dövət sosial yardım üçün Dövlət Sosial Müdafiə Fondunun Gəncə vahid əlaqələndirmə mərkəzinə müraciət etsə də, ona nə müsbət cavab, nə də imtina cavabı verilmir: "Əlaqəndirmə mərkəzinə zəng vurub soruşanda deyirlər ki, VEMTAS sistemi işləmir deyə, müraciətlərə baxılması və cavabların verilməsi mümkün deyil. Bir aydan çoxdur ki, Gəncədən müraciət edən adamlar konkret cavab ala bilmir".
-
Çin hökümətinin başlatdığı Bir yol, bir kəmər layihəsi Çinin müasir tarixinin əsas uğuruna çevrilib. Çin Xalq Respublikasının təşəbbüskarı olan layihəyə tərəfdaş ölkələrdəki fəaliyyəti yalnız ikitərəfli iqtisadi yüksəlişlə məhdudlaşmır, həmçinin Bir yol, bir kəmər-ə üzv olan dövlətlərdə Çinin xarici siyaəstinə dəstəkdir. Əlavə olaraq layihədə üzvlüyü olan ölkələr Çin üçün mühüm təbii resurs mənbəyidir. Azərbaycan da Çinin rəhbərlik etdiyi Bir yol, bir kəmər layihəsinin iştirakçılarından biri olaraq ikitərəfli münasibətlərin tərəqqisində mühüm rol oynayır. Belə ki, Rusiya-Ukrayna müharibəsinin başlanması ilə Rusiya ərazisinin Qərbə çıxışının bağlanmasından sonra Trans-Xəzər Beynəlxalq Nəqliyyat yolu Azərbaycanı əsas ticarət marşurut xətti edib. Həmçinin yaranan şərait qeyri-neft sektorun artırmaq və İkinci Qarabağ Müharibəsindən sonra xarici investisiyanın ölkəyə axınını planlaşdıran Azərbaycan üçün xeyirli nəticələnə bilər. Lakin, Çinlə münasibətlərdəki yalnış siyasət bir çox mənfi təsirlər də vəd edir.
-
İki il əvvəl Biləsuvar Rayon İcra Hakimiyyətinin və Əmək və Əhalinin Sosial Müdafiəsi Nazirliyinin nümayəndələri Birinci Qarabağ müharibəsinin qəhrəmanı, şəhid Şaiq Kəlbiyevin evinə gəliblər və hakimiyyətin bu ailə üçün yeni ev tikmək niyyətində olduğunu bildiriblər.
-
Dəyərli media mənsublarını, peşəkar və vicdanlı jurnalistləri məhbəsdən salamlayıram.
Rəy yaz