DTİHB Azərbaycanda prezident seçkilərinin monitorinqinə hazırdır

ATƏT-in Demokratik Təsisatlar və İnsan Hüquqları Bürosu (DTİHB) digər 6 ölkədə - Gürcüstan, Almaniya, Norveç, Avstriya, Tacikistan və Türkmənistanda olduğu kimi bu ilin sonunda Azərbaycanda keçiriləcək seçkilərin monitorinqinin aparılmasını “səbirsizliklə gözləyir”. 

“Biz ATƏT regionunda seçkiqabağı hadisələrin müşahidəsi üzrə səyləri davam etdiririk. Hazırda DTİHB ATƏT-in 57 ölkəsindən 56-da monitorinq həyata keçirir”, - təşkilatın direktoru, səfir Yanez Lenarçiç Turan-ın Vaşinqton müxbirinə müsahibəsində bildirib. O qeyd edib ki, monitorinqdən kənarda yalnız Rusiya qalır.

Bu il DTİHB onadək ölkədə monitorinq üzrə fəaliyyətini genişləndirib. Lakin oktyabrda keçiriləcək prezident seçkilərinin monitorinqi ilə bağlı indiyədək Azərbaycandan dəvətin  gəlməməsi narahatlıq yaradır.

Ötən həftə Vyanada ATƏT-in Daimi Şurasında çıxış edən XİN rəhbəri Elmar Məmmədyarov öz ölkəsinin ATƏT qarşısındakı öhdəliklərə uyğun olaraq monitorinqə tərəfdar olduğunu bildirib. Eyni zamanda Bakı ATƏT ofisinin mandatının texniki səviyyəyədək endirilməsini təklif edib.

Buna cavab olaraq Aİ və ABŞ Azərbaycanda daxili siyasi vəziyyətlə bağlı narahatlıqlarını bildiriblər. Belə ki,  bu durum nəinki ATƏT qarşısındakı öhdəlikləri pozur, həm də ikitərəfli münasibətlərə təsir göstərir.

Belə ki, Avropa İttifaqının bəyanatında deyilirdi ki, “2013-cü ilin prezident seçkiləri Azərbaycanın  demokratik inkişafı üçün vacibdir. Ölkə beynəlxalq standartlara uyğun olaraq azad, ədalətli və şəffaf seçkilər keçirməlidir. Müxalifət namizədlərinə öz baxışlarını və proqramlarını təqdim etmək üçün real platforma verilməlidir və onlar bərabər əsaslarla rəqabət aparmalıdır.

Biz seçkilərin, o cümlədən seçkiqabağı kampaniyanın monitorinqi məqsədilə ATƏT DTİHB və digər beynəlxalq müşahidəçilər üçün vaxtında və məhdudiyyətsiz dəvəti səbirsizliklə gözləyirik”.

Öz növbəsində ABŞ-ın ATƏT-dəki səfiri Yan Kelli bildirib ki, onun ölkəsi ümid edir ki, Azərbaycan ATƏT-i prezident seçkilərinin müşahidəsi üçün tammiqyaslı monitorinq missiyasını genişləndirməyə dəvət edəcək. 

Vaşinqtonda ABŞ ATƏt çərçivəsində razılaşmaların reallaşmasına müşahidə üzrə Helsinki Komissiyası bəzi ölkələrin DTİHB-nin işini məhdudlaşdırmaq cəhdlərindən narahatlığını bildirib.

“Biz öz regionunda seçkilərin müşahidəsi və insan hüquqlarının müdafiəsi baxımından DTİHB-nin fəaliyyətini dəstəkləyirik”, - Helsinki Komissiyasının rəhbəri senator Bencamin Karden vurğulayıb.

DTİHB-nin rəhbəri, səfir Lenarçiç hesab edir ki, bəzi ölkələrdə hüquq müdafiəçilərinin sərbəst fəaliyyətinə məhdudiyyətlər qoyulur. Həmçinin  ATƏT üzvü olan bəzi ölkələrdə əsas hüquq və azadlıqların ifadə olunması üçün məkan daralır. Bunun nəticəsi olaraq qanunvericiliyin məhdudlaşdırılması, vətəndaş cəmiyyətinin fəaliyyətinə nəzarət baş verir.

Digər həyəcan siqnalı vətəndaş cəmiyyəti üzvlərinə, dinc nümayişçilərə “ekstremist” və ya “xarici casus” damğasının vurulmasıdır. 

Hazırda DTİHB birləşmə azadlığı üzrə rəhbər prinsiplərin hazırlanması ilə bağlı Avropa Şurası Venesiya Komissiyası ilə birgə fəaliyyətə başlayır. Bu, dövlətlərə mövcud prinsiplərə əlavə olaraq dinc toplaşma azadlığı üzrə öz öhdəliklərini yerinə yetirməyə imkan verəcək.-25V-