Əvəz Həsənov: Hakimiyyət Qarabağ üzrə ekspertləri məhv edərək ermənilərə kömək edir

Jurnalist Rauf Mirqədirovun həbsi və ondan sonra QHT-lərdən erməni həmkarları  ilə əlaqələrə son qoymaq tələbləri Azərbaycan ictimaiyyətində çaşqınlıq yaradıb. Vətəndaş cəmiyyəti bilmir nə etsin - əvvəlki işi davam etdirsin, yoxsa özünü təhlükəyə atmamaq üçün bağlansın.

Bu sualları Humanitar Araşdırmalar Cəmiyyətinin rəhbəri Əvəz Həsənov cavablandırmağa çalışdı.

Sual: Azərbaycan və Fransa prezidentlərinin birgə mətbuat konfransında jurnalistlər Əliyevdən jurnalist Rauf Mirqədirovun həbsinin və hüquq müdafiəçisi Leyla Yunusun təqib edilməsinin səbəbini soruşublar. Cavabın mahiyyəti ondan ibarət idi ki, bu, Azərbaycanın daxili işidir. Siz bu barədə nə düşünürsünüz?

Cavab: Son vaxtlar insan hüquqlarını dövlətin daxili işi hesab etmək təmayülə çevrilib. Suriya prezidenti, Mərakeş prezidenti və digərləri beynəlxalq konvensiyada əksini tapmış insan hüquqlarının sərhədsiz müdafiəsi prinsipini pozmaq istəyərək, belə deyirdilər. Onlar insan hüquqlarının dövlətin daxili işi hesab olunmasını istəyirlər.

Mən hesab edirəm ki, insan hüquqları sərhəd tanımayan bir dəyərdir, Azərbaycan qanunvericiliyi isə ölkənin qoşulduğu insan hüquqlarının müdafiəsi haqqında konvensiyaya uyğun olaraq beynəlxalq hüquqla eyniləşdirilməlidir.

Əlbəttə, dövlətimiz bu məsələ ilə bağlı tənqid edilmək istəmir. Son 10 ildə Əliyev deyirdi ki, xalqın sosial vəziyyəti, dövlətin iqtisadi əsasları, iqtisadiyyatın inkişafı yaxşılaşana qədər, əhalinin həyat səviyyəsi yüksələnə qədər və digər problemlər həll edilənə qədər Azərbaycanda insan hüquqları haqqında danışmaq tezdir.

Mən isə əminəm ki, dövlət insan hüquqlarına diqqətlə yanaşsaydı, təminatlı sosial dövlət yaratmaq olardı. Əhalinin bütün hüquqlarını təmin edən bir dövlətdə kütləvi etirazlar yaratmaq, insanları küçələrə çıxarmaq olmaz. Bizim əhalimiz isə heç nədən müdafiə olunmayıb. Torpaqlarımızın 20%-i işğal altındadır, xalq isə hesab edir ki, dövlət onun bütün hüquqlarını pozur.

Sual: Cəmiyyətdə Mirqədirovun həbsi və L.Yunusun təqibi müzakirə olunur. Siz bu insanlarla tanışsınız, onlarla əməkdaşlıq etmisiniz. Rauf istintaq təcridxanasından məlumat göndərib ki, Rusiyanın göstərişi ilə həbs edilib.

Bu iş üzrə dindirilən jurnalist Azər Rəşidoğlu deyib ki, yeni həbslər olacaq. L.Yunus deyib ki, Mirqədirovun həbsi Azərbaycanda vətəndaş cəmiyyətinin ləğv edilməsi məqsədilə təşkil edilib. Mirqədirov erməni casusu ola bilərmi?

Cavab: Mirqədirov təcridxanadan vəkili vasitəsilə xəbər göndərib: məni həbsə atanlar buna görə Allah qarşısında cavab verəcəklər. Bu, o deməkdir ki, Rauf tamamilə təqsirsizdir.

Azərbaycanda Mirqədirov kimi düşmənlərimizi küncə sıxışdıran və xaricdə bu qədər çox oxunan və sitat gətirilən başqa bir jurnalist tapmaq çətindir.

Keçmiş Rusiya diplomatı, erməniyönlü politoloq Kazimirov Raufun bir yazısına üç məqalə ilə cavab verirdi.

Mən “Zerkalo”nu yalnız Mirqədirova və onun Qarabağ haqqında məqalələrinə görə oxuyurdum. O, bu mövzuda mövcud ədəbiyyatdan məharətlə istifadə edən yeganə jurnalistdir.

Mirqədirovu yaxşı tanıdığımı deməyəcəyəm. İki dəfə onunla birgə konfransda iştirak etmişəm. Amma deyə bilərəm ki, casusluq ittihamı cəfəngdir. Onu ona görə həbs ediblər ki, lazımsız vaxtda lazımsız yerdə olub – Ankarada yaşayaraq, Erdoğanı tənqid edib.

Mən türk jurnalistin tvitter statusunu oxudum ki, Mirqədirov Erdoğanı kəskin tənqid edən jurnalistdir və onun partiyası haqqında mənfi faktları üzə çıxarır.

Bundan başqa, Mirqədirov Putini tənqid edirdi, baxmayaraq ki, “Zerkalo” kifayət qədər balanslı qəzetdir. Onun son 10 məqaləsi (“Putin və Hitler” və s.) Raufun Rusiyanın göstərişi ilə saxlanıldığını göstərir.

Amma mən başa düşmürəm, o, Azərbaycanda kimə mane olurdu. O, İlham Əliyev haqqında çox nəzakətlə yazırdı, heç vaxt hakim ailəyə toxunmurdu, etik normalara riayət edirdi. Bu ölkədə Əliyevin tənqidinə görə həbs etsəydilər, ona qədər çoxları həbs edilməli idi.

Sual: Görünür, istintaq Mirqədirovun erməni hüquqşünas Laura Baqdasaryanla sıx əməkdaşlıq edən L.Yunusla əlaqələrini üzə çıxarmağa çalışır. Artıq Yunusun, onun tərəfdaşı Mətanət Əzizovanın ofislərində axtarış aparılıb.

Cavab: Mənə elə gəlir ki, onun hüquq müdafiə təşkilatlarının sifarişi ilə yazılmış məqalələri ittiham dəlili kimi irəli sürüləcək. Baxmayaraq ki, Rauf məqalələrdə yalnız açıq faktlardan istifadə edirdi.

Biz – hüquq müdafiəçiləri prezidentə Yunusun dəstəsinə təzyiq edənləri cəzalandırmaq xahişi ilə müraciət etmişik.

Sual: Vətəndaş cəmiyyəti xadimləri arasında həbslər mümkündürmü?

Cavab: Bəlkə də səhv edirəm, amma vətəndaş cəmiyyətində 20 illik iş təcrübəsi deyir ki, QHT xadimləri həbs edilməyəcək. Dövlət qeydiyyatı olmayan QHT-lərə təzyiq göstərirlər. Vaxtilə hökumət qeydiyyatdan keçməyən QHT-lərin işinin yolverilməz olduğu haqqında qanun qəbul edib, indi isə demək istəyir ki, QHT-lər dövlət qeydiyyatı olmadan işləməyəcək.

Yadınızdadırsa, casusluqda ittiham olunan Ruslan Bəşirlini və NİDA üzvlərini həbs etdikdə TV_də günlərlə onların ifadələri və gizli videoçəkilişlər yayımlandı. Raufun həbsindən bir ay keçib və hakimiyyət susmaqda davam edir. Yəni onun təqsirini sübut edən heç bir dəlil yoxdur.

Ola bilər ki, “dəlil” kimi onun, bəlkə də, layihə təşkilatçılarının sifarişi ilə yazılmış analitik hesabatlarından istifadə olunacaq. Amma şübhəsiz, bu materiallar yalnız açıq informasiyaya əsaslana bilər.

Sual: Raufun həbsi hakimiyyətin Azərbaycan QHT-lərindən erməni həmkarları ilə əlaqələrə son qoymağı tələb etməsi üçün bəhanə oldu. Və eyni zamanda, ATƏT-in Minsk Qrupu yenidən Tənzimlənmə Prinsiplərini irəli sürüb ki, Azərbaycan və erməni icmalarının əlaqələri onların tərkib hissəsidir. Rəsmi Bakı bu planı qəbul edib, onda ermənilərlə əlaqələrə qoyulan qadağanı necə başa düşək?

Cavab: Bizim Qarabağ məsələsində o qədər də çox səriştəli ekspertimiz yoxdur ki, onların bir hissəsini həbsə ataq və nüfuzdan salaq. Mən hakimiyyətdə ermənilərə cavab vermək iqtidarında olan orta səviyyəli ekspert belə tanımıram. Ermənilərin iştirakı ilə keçirilən istənilən səviyyəli foruma göndərilə biəcək hakimiyyəti təmsil edən bir neçə şəxsi xatırlaya bilirəm.

Bizim xaricdəki lobbiçilərimiz beynəlxalq auditoriyada iki cümlədən artıq danışa bilməyən populistlərdir. Belə olan halda, hakimiyyət tək-tük insanları niyə məhv edir? Ermənilərə kömək etmək üçün? -0-