İdrak Abbasov ölkəni tərk etmək niyyətində deyil

“Ailəmin və şəxsən mənim ünvanıma hədələrin artmasına baxmayaraq, Azərbaycanı tərk etmək niyyətində deyiləm”, - “Ayna-Zerkalo” qəzetinin müxbiri İdrak Abbasov “Obyektiv TV”yə (obyektiv.tv) müsahibəsində deyib.

İki ay əvvəl onun azyaşlı uşağını qəsdən avtomobil vurub, həkimlər onu möcüzə nəticəsində xilas ediblər. İ.Abbasovun həyat yoldaşı uşaqları bağçaya aparanda qonşuların pis münasibəti ilə üzləşir, evlərini daşa basırlar. Bu günlərdə həyatının böyük hissəsini həbsdə keçirmiş bir qonşusu jurnalistə “özünü yaxşı aparmırsan” deyərək hədə-qorxu gəlib. Aprelin 18-də Sulutəpə qəsəbəsində evlərin sökülməsi zamanı Dövlət Neft Şirkətinin (ARDNŞ) əməkdaşları tərəfindən İ.Abbasovun və digər bir neçə jurnalistin döyülməsindən sonra hadisələr bu cür inkişaf edir. İ.Abbasovun iki qabırğası sınıb, bədəninin müxtəlif yerləri zədələnib, əsasən sağ gözünə ziyan dəyib. Xəstəxanada uzun müddət müalicə alsa da, görmə qabiliyyəti bərpa olunmayıb.

ARDNŞ baş verənlərlə bağlı daxili araşdırma aparıb, DİN cinayət işi qaldırıb. Lakin jurnalist istintaqın gedişindən razı deyil və onu “perspektivsiz oyun” sayır. Neft şirkətinin daxili araşdırmasının yekunlarına görə, təhlükəsizlik xidməti “silahlı adamların” hücumlarından müdafiə olunmalı idi.

İ.Abbasov DİN-in qərəzliliyindən də razı deyil. Belə ki, polis CM-in 163-cü maddəsi (jurnalistin qanuni peşə fəaliyyətinə mane olmaq) üzrə cinayət işi qaldırmayıb. Halbuki, redaksiya tərəfindən hadisə yerinə göndərilən İ.Abbasovun əynində üzərində “mətbuat” sözü yazılan jilet olub.

Öncə müstəntiq ona heç zərərçəkən statusu da verməyib, lakin ABŞ dövlət katibi Hillari Klintonun səfərindən, İ.Abbasov, X,İsmayılova kimi jurnalistlərə təzyiqlərdə bağlı narahatlığını ifadə etdikdən sonra bu baş verib.

“Jurnalistlər Elmar Hüseynovun və Rafiq Tağının qətlinin sifarişçiləri və icraçıları indiyədək tapılmayıb. Novruzəli Məmmədovun və digər fəalların ölümü indiyədək müəmmalı qalır. Hesab edirəm ki, hüquq-mühafizə orqanları bu işi də ört-basdır edərək unudacaqlar. Onlar üçün fərqi yoxdur – bir qurban çoxdur ya azdır. Siyasi hakimiyyət onların “hoqqalarına” göz yumur”, - İ Abbasov vurğulayıb. --17D—