Parlamentin buraxılması siyasi böhrandan xəbər vermir - YAP funksioneri

Bakı/06.12.19/Turan: Parlamentin buraxılması heç də hər hansı siyasi böhranla bağlı deyil, Yeni Azərbaycan Partiyasının (YAP) icraçı katibinin müavini Siyavuş Novruzov belə hesab edir.

Onun sözlərinə görə, YAP Siyasi Şurası ölkədəki islahatlara dəstək üçün parlamentin buraxılması təşəbbüsünü irəli sürüb.

"İcra strukturlarında, hüquq-mühafizə orqanlarında və məhkəmə-hüquq islahatlarının həyata keçirilməsi ilə yanaşı qanunverici orqanında da islahatların sürətləndirilməsi gedən islahatlara dəstəklə əlaqədardır", deyə o, Amerikanın Səsi-nə müsahibəsində bildirib.

Novruzov hesab edir ki, parlamentin vaxtından əvvəl buraxılması dünyada yayılmış təcrübədir. "Azərbaycanda yeni inkişaf mərhələsi başlayıb. Bu inkişaf mərhələsinə təkan verməkdən ötrü parlamentin buraxılıb yeni parlamentin seçilməsi və xalq tərəfindən oraya seçiləcək nümayəndələr, bu, islahatlara daha geniş şəkildə dəstək verərək, onun təbliği ilə məşğul olması, ona uyğun qanunlar qəbul etməsi və Azərbaycanı beynəlxalq aləmdə layiqincə təmsil etməsi vacibdir", deyə Novruzov bildirib.

Seçkilərdən sonra necə siyasi vəziyyət yaranacaq? Bu suala cavabda Novruzov deyib: "Ölkədə ictimai-siyasi sabitlik daha da möhkəmlənəcək. Bu, ictimai-siyasi sabitliyin daha da möhkəmlənməsinə xidmət edəcək. İqtisadiyyatın inkişafına, sosial problemlərin həll olunmasına, Azərbaycanda struktur islahatlarının davamlılığına xidmət edəcək".

Deputat mandatından imtina etmiş deputatlar yeni təyin edəiləcək parlament seçkilərində öz namizədliklərini irəli sürə biləcəklər? Novruzovun fikrincə, yaşı 18-ə çatmış, 10 il Azərbaycanda yaşamış Azərbaycan Respublikasının vətəndaşlarının hər biri parlament seçkilərində öz namizədliyini irəli sürə bilər. Bu, əvvəlki çağırış deputatlara da aiddir.

YAP öz namizədlərini irəli sürəcək və onların hansı dairədən namizədliyini irəli sürəcəyini müəyyən edəcək, onlar arasında buraxılan parlamentin üzvləri də ola bilər, deyə o bildirib.

Novruzov müxalif qüvvələrin seçki kampaniyası aparmaq imkanlarının məhdudlaşdırılması haqqında iddiaları ilə razı deyil. Deputatlığa namizədlər qeydiyyat üçün 40-45 min seçici arasında cəmi 450 imza yığmalıdır. Vaxtilə ən az 2 min imza toplanmalı idi.

Bundan başqa, hər bir dairə ərazisində təşviqat üçün seçicilərlə görüş yerləri yaradılır. Bununla yanaşı, qeydiyyatdan keçən namizəd seçki komissiyasına məşvərətçi səs hüquqlu üzv təyin edə bilər.

"Bütün bunlar göstərir ki, Azərbaycanda seçkilər üçün tam demokratik mühit var", Novruzov belə hesab edir. Onun fikrincə, müxalifətin layiqli namizədi yoxdur və o, uydurma bəhanələr irəli sürür. -06D-