RF HDD bazasının Kaspiysk şəhərinə köçürülməsi haqqında ekspertlərin fikirləri

Ehtiyatda olan podpolkovnik, MN-in mətbuat xidmətinin keçmiş rəhbəri Üzeyir Cəfərov hesab edir ki, Azərbaycan hazırlaşmalıdır.

"Bir 5-10 il sonra Xəzərdə Xəzəryanı ölkələrin maraqlarının çox böyük toqquşması olacaq. Təsadüfi deyil ki, Rusiya ilə yanaşı, Qazaxıstan və neytral Türkmənistan da tələsik şəkildə HDQ-lərini gücləndirirlər. Rusiya Xəzərlə bağlı uzaq gələcəyə yönəlmiş planlarını həyata keçirir. O, Xəzərdə ən güclü olmağa və bunun üçün öz statusunu təsbit etməyə çalışır. Kreml Xəzər hərbi donanmasının inkişafına böyük maliyyə vəsaiti yatıracaq. Moskvada bilirlər ki, gec ya tez Xəzəryanı ölkələr arasında Xəzərdə liderlik uğrunda güclü mübarizə olacaq. Burada iqtisadi və siyasi məsələlər də təhlükəsizlik probleminə qarışıb. Rusiya rəhbərliyi vaxt udmaq istəyir və onlar nə etdiklərini bilirlər. Azərbaycan üçün təhlükəyə gəlincə, RF SQ-nin olduğu hər yerdə həmişə gərgin vəziyyət olub və olacaq. Gələcəkdə bizi təkcə quru sərhədlərinin möhkəmləndirilməsi qayğısı gözləmir, həm də ölkənin dəniz gücü barədə ciddi şəkildə düşünmək lazım gələcək", deyə Üzeyir Cəfərov Turan-a açıqlamasında əlavə edib.

Hərbi ekspert, istefada olan polkovnik, AR ordu korpusunun keçmiş komandiri Şair Ramaldanov Turan-ın suallarını cavablandırıb.

- Rusiya HDD bazasının Həştərxandan Kaspiyskə köçürülməsi, bu şəhərdə böyük hərbi dəniz bazasının tikilməsi nə ilə əlaqədardır? Bu, Azərbaycanın təhlükəsizliyi üçün təhdid yaradır?

- Kaspiysk ərazi nöqteyi-nəzərdən HDD bazasının tikintisi üçün əlverişlidir, belə ki, bu şəhərdə boş ərazi çoxdur, ən əsası isə, Həştərxandan fərqli olaraq, Kaspiyskdə dəniz suyu qışda donmur və sahilə yaxın yerlər də kifayət qədər dərindir. Həştərxanda isə dəniz azsuludur. Buna görə dəniz gəmilərinin maneəsiz yerləşməsi üçün RF HDD bazasını daha cənuba yerləşdirmək qərarı verilib. Rusiyanın yeni gəmiləri var, dəniz piyadalarının sayı artıb, buna görə Dağıstanın Kaspiysk şəhəri bazanın yerləşməsi üçün münasib hesab olunub.

Azərbaycan üçün təhdid görmürəm, belə ki, Rusiya bizim strateji tərəfdaşımızdır, bizim RF ilə çox yaxşı münasibətlərimiz var. Rusiyanın Xəzərdə öz maraqları var. Bizim münasibətlərimiz ümumilikdə müsbətdir. Biz Qafqazda əsas silah alıcısıyıq, birgə energetika layihələrimiz var, buna görə Bazanın Həştərxandan Kaspiyskə köçürülməsini Azərbaycan üçün təhdid kimi qiymətləndirməzdim. Rusiya ilə münasibətlərimiz bundan sonra da uğurla inkişaf edəcək.

- Bu günlərdə Ermənistanda və Azərbaycanda Qarabağda 2016-cı il aprel döyüşlərinin ikinci ildönümü qeyd olunur. İki il ərzində Yerevan öz pilotsuz uçan kəşfiyyat və döyüş aparatlarını istehsal etməyə başlayıb. Onlar Yerevanda silah sərgisində nümayiş olunub. Ermənistan apreldəki məğlubiyyətdən nəticə çıxarıb, yeni müdafiə naziri təyin edilib. Bəs Azərbaycanda? Bəlkə ötən iki il ərzində iki düşmən ölkənin hərbi qüvvələri bərabərləşib?

- Ermənilər "erməni radiosu" ənənəsini davam etdirir, arzularını gerçəklik kimi qələmə verirlər.

Gəlin təhlil edək: döyüş qabiliyyətli pilotsuz uçan aparatların, ümumiyyətlə istənilən silahın seriyalarla istehsalı üçün ölkə inkişaf etmiş iqtisadi infrastruktura malik olmalıdır. Ermənistanda hansı iqtisadiyyat var? Yaralı döyüşçülərin müalicəsi üçün bu ölkə əhalidən pul yığır, müdafiə naziri guya öz vəsaitini yatırıb, sosial şəbəkələrdə pul yığırlar. Ermənistan Rusiyaya hərbi borcunu ödəməyə pul tapmaq üçün bütün dünyaya əl açır, diasporanı Azərbaycanın silahlanması haqqında söhbətlərlə qorxudur...

Son statistik məlumatlar göstərir ki, iki il ərzində Ermənistan 124 mln. dollarlıq silah alıb, eyni dövrdə Azərbaycan 551 mln. dollarlıq silah alıb. Həm də Azərbaycan İsraildən 21-ci əsrin ən yeni silahlarını alırsa, ermənilərə Rusiya silahları satılır. Sarkisyan aprel məğlubiyyətindən sonra etiraf edib ki, ölkə ordusu 70-ci illərin texnikası ilə silahlanıb.

Azərbaycanda olan zərbəçi pilotsuz uçan aparatlarından Rusiyada belə yoxdur. Bəlkə də ermənilər nə isə yaratmaq istəyirlər və sınaqdan çıxarırlar, amma ermənilərin İsrailin zərbəçi pilotsuz uçan aparatlarından istehsal etməsinə hələ çox var. Ötən il mətbuatda ermənilərin kustar pilotsuz uçan aparatı haqqında məlumat var idi. Bu aparatla onlar bizim əsgərlərə adi minalar atmağa çalışırdılar. Onların texniki səviyyəsi budur. Azərbaycan SQ erməni pilotsuz uçan aparatlarını zərərsizləşdirir və yerə endirir, ermənilər bu aparatları havaya qaldırmağa qorxurlar.

Azərbaycanın Müdafiə Nazirliyi və Müdafiə Sənayesi Nazirliyi dünyanın, demək olar ki, bütün silah sərgilərində iştirak edir. Biz 10-dan çox dövlətə öz silahlarımızı satırıq, ordumuz üçün təxminən 120 adda silah, o cümlədən optika, avtomobillər, zirehli texnika, atıcılıq silahları və s. istehsal edirik. Ermənistan nə istehsal edir, nə nümayiş etdirir və nə satır? Heç nə. Azərbaycanın və Ermənistanın silahlarını müqayisə etmək olmaz.

Azərbaycan dəfələrlə təlimlərdə təchizat səviyyəmizi nümayiş etdirib. Ermənistan ordusu isə indiyədək 20 il əvvəlki texnika ilə silahlanıb. Onların öyündüyü "İsgəndər"lərin kimə - ermənilərə, yoxsa ruslara məxsus olduğu məlum deyil.

Təbii ki, Ermənistan tərəfi Azərbaycana nə isə qarşı qoymalı, nə isə deməlidir, amma fakt faktdır: erməni radiosu yalan danışmağa davam edir, - deyə Ş.Ramaldanov qeyd edib.