Türk siyasətçi: ”Avrasiya bölgəsinin hər yerində qardaş bələdiyyələrimizin olmasını istəyirəm”

Aktivliyi ilə təkcə Türkiyədə deyil,Avropa və Asiyanın bəzi ölkələrində də yaxından tanından İstanbulun Maltepe rayonunun  bələdiyyə sədri Ali Kılıçın Turan İnformasiya Agentliyinə müsahibəsi        

Turan: Son 10 ildə  Türkiyə-AB münasibətləri ciddi zədələr alsa da partiyanız və xüsusilə,bələdiyyə sədri kimi siz AB üzvlüyü məsələsindən geri addım  atmadınız. 3-5 iyunda Türkiyə-AB münasibətləriylə bağlı keçirdiyiniz forum bunun örnəklərindən  biri idi. Forumu təşkil edən bir rayonun bələdiyyə sədri kimi nələr demək istəyərdiniz? 

Kılıç: Cümhuriyyətimizin qurucusu Mustafa Kamal Atatürkün göstərdiyi yol olan `müasir mədəniyyətlər`  hədəfinə çatmaaq üçün Avropa ölkələriylə  yaxın münasibətlər yaradıb inkişaf etdirmək məcburiyyətindəyik. Əlbəttə,Türkiyə Cümhuriyyəti  təkbaşına da müasir mədəniyyətin normalarına öz islahatları sayəsində çata  və  bunu həyatın hər sahəsinə tətbiq edə bilər. Bunun üçün hər hansı əsaya ehtiyacımız yoxdur, istəməyimi və bunun üçün çalışmağımız kifayətdir.

Beynəlxalq münasibətlər nöqteyi-nəzərindən baxanda sərhədimizin o  tərəfində bizə ən yaxın ölkələrin  Avropa Birliyi olduğunu görürük,mədəniyyət sahəsindəki oxşarlıqlarımız Balkan yarımadasına qədər  gedib çıxır, Avropada yaşayan insanlarımız ənənələrimizi Britaniyaya qədər aparır,tələbələrimiz Bolqarıstandan İsveçə qədər universitetlərdə təhsil  alır,mühacirlərimiz  yaşadıqları ölkələrin iqtisadi baxımdan inkişafına öz  töhfələrini verir,gənclərimiz Avropanın siyasi həyatında yaxından iştirak edirlər.

Örnəklərin sayını daha da artırdıqca 10 illərdən bəri Avropanın  hər yerində və həyatın hər tərəfində güclü imzalarımızın olduğunu görəcəyik. AKP iqtidarının  həyata keçirdiyi  beynəlxalq münasibətlər siyasətini bir tərəfə oyun, hətta Türkiyə daxilindəki siyasət də Avropa Birliyinin üz-gözünü turşutmasına səbəb  olur. Biz sosial-demokrat siyasətçilər Avropa  Birliyinin bizə baxanda üzünün gülməsiüçün yox, vətəndaşlarımızın ən təbii haqlarının verilməsi üçün siyasət sahəsində var gücümüzlə çalışırıq. Bundan başqa   bir inadımız da var: biz Avropanın bir hissəsiyik. Ona görə bu gün gördüyümüz işləri sabahlara hazırlıq kimi qiymətləndirə bilərsiniz. Belə ki,5 milyondan artıq insanımız 60 ildən bəri Avropa Birliyi vətəndaşı kimi oranın əhalisinin bir parçası olmuşdur. Biz də AB-yə üzvlük prosesimiz başlayanda insan hüquqlarına hörmət edən demokratik bir Türkiyə Cümhuriyyəti kimi qapıları silkələmədən ittifaqa üzv olacağımıza inanıram. AB bizdən, biz də AB-dən daha çox şey öyrənəcəyik. Buna görə, Maltepe bələdiyyəsi olaraq siyasətçimizdən alimlərimizə qədər bir yerə topladığımız mütəxəssislər vasisətiylə münasibətlərimizi canlı və hərarətli saxlayan işlər görməyə davam edirik.

Turan: AB hədəfinizdən əlavə siyasi şəxsiyyət və bələdiyyə sədri kimi Avrasiya ölkələriylə yaxın münasibətlər yaratmağa çalışırsınız. Bu sahədə haraya qədər irəliləyə bilmisiniz?

Kılıç: `Millət ittifaqı`na daxil olan partiyaların xarici siyasətə özlərinə məxsus baxışları vardır. İctimayyətin `Altıtərəfli masa` kimi gördüyü bu siyasi ittifaqın iqtidara gəlməsindən başqa bir alternativ görünmür. İqtidar gələndə isə müştərək  düşüncə tərzinin məhsulu olan  xarici siyasət və AB-yə tam hüquqlu üzvlük məsələsi  reallaşdırılacaqdır.Yerli özünüidarə orqanının rəhbəri kimi bu sahədəki təcrübəmi, əlbəttə ki, mərkəzi hakimiyyətlə bölüşməyə  hazır olacağam.

Turan: Fəallığınız partiyanızın xarici siyasətində nə dərəcədə öz əksini tapır?

Kılıç: 3-5 iyun tarixlərində Maltepedə kçirdiyimiz `Yeni dövrdə AB və Türkiyə` mövzusundakı forumunda partiyamızın sədri Kamal Kılıçdaroğlunun iştirakı, elə bilirəm  ki, sualınıza cavabdır. Bundan əlavə, böyük nəzakət örnəyi göstərərək Albaniya prezidenti də  forumumuza təşrif gətirmişdir, bundan şərəf duyduq. Türkiyənin ana müxalifət partiyasının sədri ilə başqa bir ölkənin prezidentinin bir araya gəlməsini xarici siyasət zəminindəki bir görüş kimi  də dəyərləndirə bilərsiniz. CHP`nin xarici ölkələrdəki  birlikləri partiyamızın siyasi dünyabaxışını o  ölkələrin  ictimaiyyətinə və  siyasət dünyasına çatdıraraq beynəlxalq miqyasda nüfuz qazanmağımıza kömək edirlər.

Turan: Ən gec 12 aydan sonra keçiriləcək prezident və millət vəkili seçkilərində partiyanızın liderlik etdiyi `Millət ittifaqı` və `Altıtərəfli masa`nın qalib gələcəyi iddia edilməkdədir. Partiyanızın başında durduğu bir ittifaqın mərkəzi  hakimiyyətə gəlməsi halında, xüsusilə,Avrasiya coğrafiyası üçün hazırladığınız  layihə və planları  həyata keçirmək üçün daha geniş imkan əldə edəcəyinizə inanırsınızmı? 

Kılıç: Mənim nöqeyi-nəzərimdən Avrasiyanın ən önəmli xüsusiyyəti əsrlər əvvəl bir çıxış yeri olmasıdır. Yəni, millətimizin Anadoludan əvvəlki yaşayış yeri olması baxımından  o  torpaqlar mənim diqqətimi çox çəkir. Mənşəyimizdən bəhs edirəm. Nə qədər dərinlərə ensək, o qədər çox məlumat sahibi oluruq. Ona görə Türk Cümhuriyyətlərindən Çinə qədər gedərək müştərək  xüsusiyyətlərimizi görmək və bölüşmək istəyirəm. İranda və hətta Çində qardaşlıq protokolu imzaladığımız bələdiyyələr var. Türkan Saylan adına Mədəniyyət mərkəzimizdə 7 ölkənin biraraya gələrək yaratdığı Avrasiya  Teatrlar Birliyinin ofisini açmışıq. Eyni yerdə İran və Çin mədəniyyət həftələri keçirdik. Maltepe bələdiyyəsi Avrasiya ölkələrinin hamısında qardaş rayonlar taparaq protokollar imzalamaq istəyirik. Ancaq mən yerli özünü idarə orqanının rəhbəriyəm. Maddi imkanlarımız və səlahiyyətlərimiz qarşıya qoyduğumuz  məqsədlərin hamısını yerinə yetirməyə imkan vermir. Ən böyük problem də budur. Yoksa Maltepedə göstərdiyimiz təşəbbüslərlə ölkəmizi hər yerdə təmsil etmək istəyərdik.