Qəza ilə bağlı istintaq işi yubadılır

Bakı/31.07.17/Turan: Elə mövzular, problemlər var ki, onlara dönə-dönə qayıdırsan. Çünki problem həll olunmur və bəzən bu problemlər birbaşa insan hayatına aid olur.

Turan iyunun 28-də Saatlı rayonunun Dəllər kəndində baş vermiş yol qəzası haqda yazıb. Qəza nəticəsində taksi sürücüsü İlkin Mirzəağazadə komaya düşüb və həkimlərin səylərinə baxmayaraq, indiyə qədər özünə gəlməyib.

Bizi bu mövzuya qayıtmağa bu hadisədəki bir məqam vadar etdi. Zərərçəkən Lazım Umudovun atası yenidən redaksiyaya müraciət edərək bildirdi ki, qəzadan bir ay keçməsinə baxmayaraq, qəza faktı və onun oğlu ilə maraqlanan yoxdur, istintaq işi yubadılır.

Məsələ bundadır ki, L.Umudovun sözlərinə görə, saatda 150 km./s sürətlə hərəkət edən və qəzada günahkar olan sürücü indiyədək məsuliyyətə cəlb edilməyib. Komada olan xəstənin müalicəsinə çox pul lazımdır, lazım olan dərmanlar pulsuz dərmanlar siyahısında yoxdur və aztəminatlı ailənin vəziyyəti yaxşı deyil.

Ancaq qəzanı törədən tərəflərdən heç biri öz məsuliyyətini dərk etsə də köməklik göstərmək istəmir.

Zərərçəkənin ailəsi ədalətin öz yerini tapacağı ümidilə bütün instansiyalarda olub. Ancaq nəticəsiz qalıb. Bundan əlavə, heç bir istintaq hərəkəti aparılmır. Ancaq rayon polis şöbəsinin müstəntiqi Xəyal Abbasov zərərçəkənin atasına bir neçə dəfə telefon edib, o da ancaq qəza qurbanının vəziyyətinin nəzərə alınması ilə bağlı. Günahkarların məsuliyyətə cəlb edilməsi ilə bağlı xahişin cavabında deyib ki, "bəlkə sənin oğlun günahkardır".

Bu sualdan şaşıran L.Umudov ancaq "mənim oğlum sərnişindir, o, qəzada necə günahkar ola bilər" sözlərini deyə bilib. Məhz bu sual ona düşünmək üçün əsas verib ki, hansısa səbəblərdən istintaq işi ört-basdır etməyə çalışır. Bundan sonra L.Umudov DİN-in "qaynar xətt"inə üç dəfə telefon edərək istintaqın fəaliyyəsizliyindən şikayətlənib. Ancaq bu da nəticə verməyib. Əlacsız qalan ata daxili işlər naziri Ramil Usubova müraciət edib. Ancaq hələlik bir irəliləyiş yoxdur.

Turan-ın müxbirləri dəfələrlə müstəntiqlə əlaqə yaratmağa cəhd ediblər, ancaq nəticə verməyib: ya telefon zənglərinə cavab vermir, ya da mobil telefonu söndürülmüş vəziyyətdə olur. Ümid edirik ki, bu yazını oxuduqdan sonra o, mətbuatın suallarını cavablandıracaq. -0-