Ermənistan prezidenti zəlzələ ilə bağlı hökumətin Türkiyəyə yardım göstərmək qərarını dəstəkləyib

Bakı/11.02.23/Turan: Ermənistan prezidenti Vaaqn Xaçaturyan Türkiyə və Suriyada baş verən zəlzələ ilə bağlı hökumətin yanaşmasına görə baş nazir Nikol Paşinyana minnətdarlığını bildirib, deyə “Armenpress” məlumat verir.

“Mən həm başsağlığını, həm də qonşu Türkiyəyə kömək etməyə hazır olmağı nəzərdə tuturam. Həmçinin dost Suriyaya münasibətə görə. Əslində, bu, hər iki ölkədə, xüsusən də Suriyada təqdir edilib. Düşünürəm ki, başqa cür edə bilməzdik, çünki Spitak zəlzələsinin (1988) yaraları hələ də yaddaşımızda təzədir, üstəlik, qonşu ölkədə faciə baş vermişdi, başqa cür edə bilməzdik. Bu qərarlara görə Sizə xüsusi minnətdarlığımı bildirmək istəyirəm”.

Baş nazir Paşinyan çıxışında qeyd edib ki, “dəhşətli fəlakət baş verib və bütün bunlara biganə qalmaq mümkün deyil. Xüsusən də Yeni il müraciətimdə qeyd etdiyim kontekstdə ki, dövlətimizin əbədiliyini təmin etmək istəyiriksə, bir çox sahələrdə əlaqələrimizin keyfiyyətinin dəyişməsinə çalışmalıyıq, amma ilk növbədə regionumuzda, çünki hər şeyə rəğmən, biz buradayıq və ətrafımızdakı ölkələr, qonşu ölkələr də buradadır”.

Paşinyan qeyd edib ki, ilk növbədə, bu münasibətlərin keyfiyyətinin dəyişdirilməsi üzərində işləmək lazımdır. “Əlbəttə, (bunu) başa düşərək, bunun yalnız bizdən asılı olduğunu düşünəcək qədər sadəlövh deyilik. Təbii ki, bu, təkcə bizdən asılı deyil və biz heç bir şəraiti unutmuruq. Problem ondadır ki, biz səylərimizi hansı istiqamətə yönəltmək istəyirik. Bütün bu məsələləri tez-tez müzakirə etməyimiz çox vacibdir. Düşünürəm, çoxları bilir ki, biz təkcə rəsmi yox, qeyri-rəsmi formatda da görüşürük. Orada anlaşma, razılıq var və Respublika Prezidentinin dəstəyi həqiqətən çox vacibdir. Bunun üçün ona təşəkkür edirəm.”—0—