Türkiyəyə yardım davam edir

Bakı/13.02.23/Turan: Bakıda bir neçə məntəqədə Türkiyədə zəlzələdən zərərçəkənlərə humanitar yardım toplanması davam etdirilir. Yardımlar əsasən Heydər Əliyev adına İdman və Konsert sarayında toplanır.

Zəlzələ baş verəndən başlayaraq indiyədək zəlzələ bölgəsinə tonlarla humanitar yardım göndərilir. Böyüklər və uşaqlar üçün isti geyim, ayaqqabı, yorğan-döşək, çadır, isidicilər, uşaq qidası, pampers, quru ərzaqlar toplanıb və göndərilib. Yardım axını fasiləsiz gedir. Sıravi vətəndaşlar, müxtəlif idarə və müəssisələrin kollektivləri aksiyaya qoşulub. Bir çox qutuların üstünə içərisində nə olduğu yazılıb. Demək olar ki, hamısı mağazalardan və anbarlardan alınan yeni əşyalardır. Bir gün ərzində o qədər yardım toplanıb ki, toplanan əşyalar küçəyə yığılır, oradan yük maşınları ilə fəlakət zonasına göndərilir.