Ümidsiz nikbinlik

Bu gün sosial-iqtisadi mövzu əksərən uzanmış iqtisadi böhrandan narazı olan və dəyişikliklər zərurətini hökumətə getdikcə daha əminliklə xatırladan Azərbaycan ailəsinin ən önəmli mövzusudur.

İclasın ictimaiyyətə təqdim edilən hissəsində prezident sosial gərginliyin azaldılması və vətəndaşların mühüm problemlərinin həlli üçün atılan addımlara diqqət çəkib. O, dövlətin əlini uzatdığı əhalinin ən zəif qruplarını - şəhid ailələrini, pensiyaçıları, işsizləri, tələbələri, problemli kredit borcu olanları və digərlərini yada salıb.

Bu zaman Əliyev ənənəvi şəkildə əhalinin sosial gərginliyindən narahatlığını nümayiş etdirməyib, 2019-cu ildə iqtisadiyyatın artan inkişafını proqnozlaşdırmağa imkan verən ÜDM-in artış rəqəmlərinə, struktur islahatlarına və digər islahatlara diqqət çəkib.

2019-cu ilin yanvarında Azərbaycan ÜDM-i 3% atıb və bu, son 2-3 il ərzində ən yüksək göstəricidir. İqtisadi artım yüksək sürətlə davam edəcək. Makroiqtisadi vəziyyət sabitdir, manatın məzənnəsi bir ildən çoxdur sabitdir, deyə o, müşavirədə bildirib.

Ümumilikdə Əliyevin iqtisadi artımla bağlı bəyanatı əsassız deyil. Beynəlxalq Valyuta Fondunun fikrincə, Azərbaycanda qaz hasilatının artması 2019-cu ildə ÜDM-in 5% artmasına gətirib çıxara bilər. "Azərbaycanda gündəlik qaz hasilatı 2018-ci ildə 0,41 mln. barrel neft ekvivalenti təşkil edəcək (2017-ci ildə 0,31 mln. barrel olub), 2019-cu ildə isə 0,54 mln. barrel neft ekvivalentinə qədər artacaq", BVF ekspertləri belə hesab edir.

Amma Fitch Ratings beynəlxalq reytinq agentliyi 2019-cu ildə "əhalinin etimadının bərpa edilməsi və büdcə xərclərinin artması fonunda" Azərbaycan iqtisadiyyatının artım sürətinin artacağını gözləyir. Əhalinin hökumətə etimadı həqiqətən hakimiyyətin addımlarına səlahiyyət verən mühüm amildir. Amma 3 faizlik iqtisadi artım qeydə alınan yanvarda etimad ən aşağı səviyyədə olub, bu, özünü sosial şəbəkələrdə və müxalifətin 19 yanvar mitinqində göstərib.

Hətta prezidentin azsaylı iştirakçı ilə keçirdiyi müşavirədən sonra belə etimad göstəricisi, çətin ki, yüksəlsin, baxmayaraq ki, cəmiyyətdə müəyyən nikbinlik yaranıb. Amma o, prezidentin sosial-iqtisadi blokla bağlı sonuncu məşhur qərarları ilə deyil, cəmiyyətin öz gücündən və vəziyyətə təsir etmək qabiliyyətindən əminliyinin artması ilə bağlıdır.

Prezident ictimai əhval-ruhiyyəni nəzərə almağa çalışır və sıravi vətəndaşlarla ünsiyyətdə açıqlıq nümayiş etdirir. Amma bu təqdimat vətəndaş cəmiyyəti ilə açıq dialoqsuz və onu islahat proseslərinə cəlb etmədən uğur gətirə bilməz. 2016-cı ildə manatın iki devalvasiyasından sonra o, böhranın aradan qaldırılması üzrə əsas vəzifələri formalaşdırıb, burada cəmiyyətin hökumətə nəzarət prosesinə cəlb edilməsini qeyd edib. Amma bu parametr işləməyib, bu da iqtisadiyyatda nisbi artıma baxmayaraq, sosial-iqtisadi geriləməyə təsir etməyə bilməzdi.

Maraqlıdır ki, iqtisadi blokun bütün əvvəlki müşavirələrində olduğu kimi, cəmiyyət hökumətin planları ilə bağlı tam anlayış əldə edə bilmir. O, ayrı-ayrı anonsları və bəzi aspektlər üzrə vədləri görür, amma problemin aradan qaldırılması üzrə hansısa proqram və ya yol xəritəsi şəklində bütöv bir mənzərəni müşahidə etmir. Bu mənada 25 fevral tarixli mikroiclas müəyyən nikbinlik versə də, cəmiyyətin arzusunda olduğu dəyişikliklərə ümid vermir.