2021/2022-ci tədris ili ənənəvi formada təşkil olunacaq

Bakı/08.09.21/Turan:  2021/2022-ci tədris ili ənənəvi formada təşkil olunacaq. Bu barədə sentyabrın 7-də təhsil naziri Emin Əmrullayev məlumat verərək bildirib ki, sentyabrın 22-dən orta məktəblərin ibtidai sinif şagirdləri, sentyabrın 29-dan isə yuxarı sinif şagirdləri və ali təhsil müəssisələrinin tələbələri ənənəvi formada təhsil almağa başlayacaqlar.

Bu o deməkdir ki, bu il tələbə olan 44861 nəfərin böyük hissəsi Bakıya gələcək.

Bəs Bakıya gələn tələbələr harada yaşayacaqlar? Tələbələr üçün yataqxanalar nəzərdə tutulubmu? Azərbaycan Dövlət İqtisad Universitetinin 3-cü kurs tələbəsi Ağayeva “Azadlıq” radiosuna bildirib ki, təhsil aldığı universitetin yataqxanası olsa da, orada məcburi köçkünlər yerləşir: "Universitetə daxil olanda yataqxana ilə maraqlandım, dedilər ki, orada məcburi köçkünlər qalır. Buna görə də digər 3 qızla mənzil kirayə etmək məcburiyyətində qaldıq. Mən ayda 120 manat ödəyirdim".

Onun sözlərinə görə, distant təhsil formasına görə o, öz rayonunda idi: Bu il yenidən Bakıya gəlməli və mənzil axtarmalıyam. Dərslərin başlanmasına az qaldığından qiymətlər icarə haqqı bahalaşıb. Necə olacaq, bilmirəm".

Bakıda daşınmaz əmlak sahəsində rieltor fəaliyyətilə məşğul olan Əhməd Süleymanov Turan-a bildirib ki, mənzil icarəyə götürmək istəyənlərin sayının çoxluğuna baxmayaraq, mənzil sahibləri öz daşınmaz əmlaklarını tələbələrə icarəyə verməyə tələsmirlər: "Tələbat böyük, təklif isə azdır. Ev sahibləri ehtiyat edirlər ki, keçən il olduğu kimi, universitetlər bir aydan sonra bağlanar və tələbələr öz evlərinə qayıtmalı olar. Belə qeyri-müəyyən vəziyyətdə evini kirayə vermək istəyən adam azdır. Ev sahibləri ailəli adamlara üstünlük verirlər”.

Təhsil Nazirliyindən bildiriblər, hazırda ali məktəblərin tabeliyində 48 yataqxana var. "Bu binalar 9 universitetə məxsusdur. Bunlar Azərbaycan Memarlıq və İnşaat Universiteti, Azərbaycan Dövlət Pedaqoji Universiteti, Bakı Mühəndislik Universiteti, Azərbaycan Dillər universiteti, Bakı Dövlət Universiteti, Azərbaycan Texniki Universiteti, Bakı Slavyan Universiteti, Lomonosov adına Moskva Dövlət Universiteti və Azərbaycan Texnologiya Universiteti. Bu yataqxanalar öz  tələbələrinin kiçik bir hissəsini yaşayışla təmin edə bilər".

Nazirlikdən qeyd ediblər ki, Bakı Dövlət Universitetinin tələbə yataqxanası əsaslı təmir edilib və tələbələrə təqdim olunmağa hazırdır. 5 mərtəbəli “tələbə evi” 220 yerlik olmaqla həm xarici, həm də yerli tələbələr üçün nəzərdə tutulub. Azərbaycan Dövlət Neft və Sənaye Universitetinin 1000 nəfərlik tələbə yataqxanası da istifadəyə hazırdır.

Təhsil məsələləri üzrə ekspert Kamran Əsədov bildirib ki, hazırda Azərbaycanda bütün tələbələri yataqxana ilə təmin etmək imkanı yoxdur. Bir neçə universitetin yataqxanası var. Bu da tələbələrin ümumi sayının ancaq 0,7 faizini əhatə edə bilər.

Ekspertin sözlərinə görə, belə bir vəziyyətdə yeganə çıxış yolu mənzil icarəsidir. "Amma pandemiya dövründə bu, kifayət qədər riskli və təhlükəlidir. Çünki əksər hallarda bir evdə bir neçə nəfər qalır.

O hesab edir ki, dövlət bir neçə hündürmərtəbəli ev almalı və onlarda yataqxanalar təşkil etməlidir. Beləliklə, tələbələr mənzil icarəsi problemini həll edə bilər.—0—