Aldadılmış əməkdaşlar AİMROC-un kölgəsinə çevrilib

Qızıl çıxaran AİMROC (Azərbaycan yataqlarının beynəlxalq ehtiyatları üzrə əməliyyat şirkəti) əməliyyat şirkətinin otuza yaxın əməkdaşı yanvarın 25-də səhər Əmək və Əhalinin Sosial Müdafiəsi Nazirliyinin qarşısına gələrək, əmək haqlarının ödənməsini tələb ediblər və hüquqlarının pozulduğunu bəyan ediblər. Amma onlara məhkəməyə müraciət etməyi məsləhət görüblər.

AİMROC-un narazı heyəti Milli Məclisə üz tutub, burada da eyni məsləhəti alıb. Daha sonra onlar AİMROC şirkətinin Neftçilər prospektində yerləşən qərargah-mənzilinə gəliblər, lakin mühafizəçi onları içəri buraxmayıb, şirkətin artıq bu binanı tərk etdiyini bildirib.

Etirazçıların günün ikinci yarısında gəldiyi Ekologiya Nazirliyində onlara izah ediblər ki, AİMROC hələ 2014-cü il yayın əvvəllərində səhmlərini satışa çıxarıb və praktiki olaraq, fəaliyyətini dayandırıb.

Yoxa çıxmış şirkətin əməkdaşları dövlət müəssisələrinin qapılarını çoxdan döyür. Dekabrın sonlarında onlar Prezident Administrasiyasına gəliblər, buradan onları Baş Prokurorluğa göndəriblər, prokurorluq isə əmək müfəttişliyinə və məhkəməyə müraciət etməyi tövsiyə edib.

Problemin mahiyyəti ondan ibarətdir ki, 2014-cü ilin mayından AMİROC qızıl mədənində bütün işləri dayandırıb, 300-ə yaxın əməkdaşı ödənişsiz məzuniyyətə göndərib. İyunda heyətə bildiriblər ki, hələ bir müddət də iş olmayacaq və əmək haqqı borcları ödənilməyib.

AİMROC LTD “Londex Resources S.A.” şirkəti tərəfindən təsis edilmiş əməliyyat şirkətidir (100% təsisçiyə məxsusdur) və 03 sentyabr 2007-ci il tarixində Azərbaycan Ədliyyə Nazirliyində qeydiyyatdan keçib (№ 1107-N17-1925).

Londex Resources S.A. Panamada qeydiyyatdan keçib (dövlət reyestri, Microjacket 511442, sənəd 882804) və Azərbaycanda nümayəndəliyi var (qeydiyyat № 1106-N9-1711).

Londex Resources S.A. dörd şirkəti təmsil edir – podratçılar (Londex Resources S.A., Will and Meyris S.A., Fargate Mining Corporation, Qlobeks International LLP) və baş nəzarətçi rolunu yerinə yetirən Yaponiyanın “Mitsui Mineral Development Engineering Co. Ltd (“MİNDEKO”) şirkətini.

2006-cı il dekabrın 30-da Londex Resources Ekologiya Nazirliyi ilə hasilatın pay bölgüsü haqqında 30 illik saziş imzalayıb. Saziş 2007-ci il iyunun 8-də Azərbaycan prezidentinin 05 iyun 2007 ci il tarixli 358-III-Q nömrəli fərmanı ilə qüvvəyə minib.

Sazişin predmeti üç yatağın işlənməsidir:

1. Çovdar (Daşkəsən). Kəşfiyyat işləri 2007-ci ildə başlayıb.

2012-ci ildə filiz emalı zavodu işə salınıb. Qızıl istehsalı 2014-cü ilə qədər davam edib.

2. Balakəndə Köhnəmədən (Filizçay) yatağı (yarımmetallar və mis kolçedan). Kəşfiyyat işləri həyata keçirilib.

3. Göydağ yatağı (Naxçıvan).

AİMROC LTD Nizamnaməsinin 5.4, 6 və 7-ci maddələrinə əsasən, baş təşkilat (Londex Resources S.A.) filialın (şirkətin) öhdəliklərinə görə tam məsuliyyət daşıyır. Lakin Londex Resources S.A. öhdəliklərin yerinə yetirilməməsinə - işin dayandırılmasına, işçilərin rəsmi olaraq işdən çıxarılmamasına və əmək haqqının ödənilməməsinə görə məsuliyyətə cəlb olunmayıb.

Maraqlıdır ki, şirkət Azərbaycandan yoxa çıxdıqdan sonra, 2015-ci ilin fevralında prezidentin fərmanı ilə 100% dövlət payı ilə AZGOLD dövlət SC yaradılıb. Qızıl hasilatına görə hüquqlar ona təhvil verilib. Lakin AZGOLD SC-nin Londex Resources-un varisi olub-olmadığı məlum deyil.

2012-ci ildə Azərbaycanda AİMROC-un fəaliyyətinin araşdırılması ilə bir sıra ifşalardan sonra ötən il 7,5 il müddətinə azadlıqdan məhrum edilmiş jurnalist Xədicə İsmayılova məşğul olurdu. O, belə bir nəticəyə gəlib ki, AIMROC-un sahibləri arasında Azərbaycan prezidentinin qızları da var. Məhz bunun AİMROC-un fəaliyyətinin dayandırılmasına səbəb olduğu istisna deyil.

Çovdarın bağlanmasının iqtisadi səbəbləri, çətin ki, əsaslandırılsın. Çovdar sərfəli layihədir və Ekologiya Nazirliyinin məlumatına görə, yatağın ehtiyatları ümumilikdə 2,5 mlrd. dollar dəyərində 44 ton qızıl və 164 ton gümün təşkil edir. -0-