A.Musayev: Kreditlərin mənimsənilməsi faktı yoxdur

Çərşənbə axşamı Bakı Ağır Cinayətlər Məhkəməsində AMAY şirkətinin rəhbəri Abdulla Abdullayev və təqsirləndirilən daha 5 nəfər üzərində növbəti məhkəmə prosesi keçirilib.

Bugünki məhkəmə prosesində bir qrup şahid dindirilməzdən öncə müdafiə tərəfi vəsatətlərlə çıxış ediblər. Vəkillər A.Abdullayev barəsində həbs qətimkan tədbirinin dəyişdirilməsi, 269 nəfərin “zərərçəkən” kimi tanınmasından imtina edilməsi vəsatətləri qaldırıblar. Bundan əlavə, mülki işin cinayət işinə döndərildiyi, bu barədə məhkəmə qərarları olduğu üçün məhkəmənin bu işdən imtina etməsi vəsatəti də qaldırılıb.

Dövlət ittihamçısı Fərid Nağıyev A.Abdullayevin ölkəni tərk etməsi, məhkəmədən yayınması kimi ehtimalların aradan qalxmamasını əsas gətirərək, həbs qətimkan tədbirinin dəyişdirilməsinin əleyhinə çıxıb. Qısa müşavirədən sonra hakimlər heyəti vəsatətin birinci hissəsini təmin etməyib, ikinci hissəsinə dair məsələnin isə məhkəmənin gedişində həllini tapacağını bildirib.

Daha sonra auditor Adıgözəl Musayev 2007-2010-cu illərdə 34 firmanın götürdüyü kreditlə bağlı audit yoxlamasının nəticələri haqda danışıb. O qeyd edib ki, firmalar “Texnikabank”dan kreditləri sahibkarlıq fəaliyyəti üçün götürdüklərini, sonradan AMAY-a məxsus “Xətai” ticarət mərkəzində tamamlama işlərinə yönəltdiklərini deyiblər. A.Musayev kreditlərin 90%-nin tikintiyə yönəldildiyini, 10%-nin isə bank xərclərinə sərf edildiyini, kreditlərin təminatlı olduğunu deyərək, burada hər-hansı şəkildə mənimsəmə olmadığını bəyan edib. Kreditlərin alınması və ya qəbulunda uyğunsuzluq olması haqda prokurorun sualına cavabda A.Musayev texniki xarakterli səhvlər olduğunu deyib. A.Abdullayev 20 min kv.metr sahəyə “Xətai” ticarət mərkəzinn tikintisini 2007-ci ilin mayında bitirdiyini, kreditlərin isə həmin ilin iyulundan almağa başladığını vurğulayıb, bununla da alınan kreditlərin təminatlı olduğunu sübut edib. A.Abdullayev AMAY tərkibində olan “Birlikbank”ın 16 milyon manat kapitala və 20 min kv.metrlik əmlaka sahib kimi etibarlı bank olduğunu vurğulayıb. “Mən düz 14 aydır ki, burada cinayət əməli olmadığını, kreditlərin qaytarıldığını sübut edirəm, yenə də mənim həbsdə saxlanmağıma qərar verirsən, ədalətsizlik olar, daha bu qədər yox”, - deyə A.Abdullayev prokurora etirazını ifadə edib.

“Xudafərin” firmasının tikdiyi çoxmərtəbəli binaya gəlincə, A.Abdullayev həmin binanın görünən və görünməyən xərcləri haqda danışıb. Hələ kürsüdə olan A.Musayev Bakıda mənzilin 1 kv.metrinin görünən xərclərinin 350 manat, görünməyən xərclərlə birgə 1200 manat təşkil etdiyini xatırladıb. Binanın 10 bal zəlzələyə hesablanaraq tikildiyini deyən A.Abdullayev buna görə təkcə armatur xərclərinin 5-6 milyon manat təşkil etdiyini bildirib. “Buna baxmayaraq, korrupsiya idarəsi 18 mərtəbəli binaya bütünlükdə 6-7 milyon manat qiymət qoyub”, - deyə A.Abdullayev idarənin hesablamalarının gerçək olmadığını ifadə edib.

“Birlikbank”ın İdarə Heyətinin sədri Səriyyə Səmədova qısa izahat verdikdən sonra A.Abdullayev onun getməsini xahiş edərək, vəkillərlə sual-cavabına imkan verməyib.

Bundan sonra hakim Əfqan Hacıyev növbəti məhkəmə prosesini mayın 29-na təyin edib.

A.Abdullayev 2014-ci il aprelində həbsə alınıb, ona qarşı dələduzluq, səlahiyyətindən sui-istifadə, “çirkli” pulların yuyulması ittihamları irəli sürülüb. A.Abdullayev bütün ittihamları rədd edərək, özünü təqsirli bilmir. A.Abdullayev üzərində məhkəmə prosesi 2015-ci il yanvaın 29-dan başlayıb. -05C-