Bakı/30.04.18/Turan: "Nardaran məhbusu" Abbas Hüseynov saxlanıldığı Qobustan qapalı həbsxanasında işgəncəyə məruz qalıb. Bu barədə A.Hüseynin anası Rəhimə Hüseynova bildirib.
Hüseynovanın sözlərinə görə, aprelin 30-da Abbas ailə üzvlərilə əlaqə saxlayaraq, bu barədə danışıb.
"Bundan əvvəl axırıncı dəfə Abbasla aprelin 26-da danışmışdıq. Həmin zəngdən sonra Abbası çox möhkəm döyüblər. Bu gün telefonla danışanda özü dedi. Rəis müavini də daxil olmaqla, dörd-beş nəfər onu o qədər döyüb ki, bədəni bütün yaradır. Sonra da beş günlük "kars" cəzası veriblər. Amma üç gündən sonra rəisin göstərişi ilə "kars"dan çıxarıblar", - R.Hüseynova "Azadlıq Radiosu"na bildirib.
R.Hüseynovanın sözlərinə görə, A.Hüseynov döyülməsinin səbəbini bilmir və bu barədə ona heç nə deməyiblər. "Abbasın həbsxanada məhbus yoldaşları ilə problemi yoxdur. Ehtimal edirik ki, (AXCP sədri) Əli Kərimliyə ad günü təbrikinə görədir. Axırıncı dəfə telefonla danışanda xahiş elədi ki, onun təbrikini çatdıraq. Biz də çatdırdıq, hətta mediada da bu məsələ yayıldı".
A.Hüseynovun vəkil Fariz Namazlı hadisədən xəbərsiz olduğunu, məsələni araşdıracağını bildirib.
Penitensiar Xidmətin ictimaiyyətlə əlaqələr şöbəsinin rəhbəri Mehman Sadıqov bunun əsassız olduğunu söyləyib: "Həbsxananın rəisi ilə danışdım, heç bir işgəncə, döyülmə halı olmayıb. Bizim əməkdaşlar mütəmadi məhkumlarla, o cümlədən Abbas Hüseynovla profilaktik söhbətlər aparırlar".
A.Hüseynov 2015-ci il noyabrın 26-da DİN-in Baş Mütəşəkkil Cinayətkarlıqla Mübarizə İdarəsinin Bakının Nardaran qəsəbəsində keçirdiyi əməliyyat zamanı həbs olunub və 20 il azadlıqdan məhrum edilib. Həmin əməliyyatda ikisi polis olmaqla, altı nəfər həlak olub.
Nardaranda və Sabunçu Rayon Polis İdarəsinin qarşısında baş verən hadisələrə görə 70-dən çox (hüquq müdafiəçilərinin siyahısında bu rəqəm 80-dən çox göstərilir) adam həbs olunub. Onların bir qisminə silah saxlama ittihamı ilə ilyarımdan 6 il 6 ayadək həbs cəzası kəsilib. 40 nəfərdən çox adama isə daha ağır maddələrlə (dövlət çevrilişinə cəhd, terrorçuluq, dini nifaq salma və s.) ittihamlar verilib.
Həbs olunanların işi üç qrupa ayrılıb. A.Hüseynov birinci qrupda "Müsəlman Birliyi" Hərəkatının sədri Taleh Bağırov və daha 16 nəfərlə birlikdə mühakimə olunub. Onlara 10 ildən 20 ilə qədər həbs cəzası verilib. -05B-
Cəmiyyət
-
"Gələn il Azərbaycan növbəti böyük idman yarışına ev sahibliyi edəcək, bu da MDB Oyunlarıdır. Üçüncü MDB Oyunları Azərbaycanda keçiriləcək". Bunu, dekabrın 24-də 2024-cü ilin idman yekunlarına həsr olunan mərasimdə prezident İlham Əliyev söyləyib.
-
Dekabrın 28-də Bakıda və Abşeronda yağış gözlənilir. Şimal-cənub küləyi şimal-qərb küləyinə keçəcək. Havanın temperaturu gecə müsbət 5 +8, gündüz müsbət 8 + 10 dərəcə olacaq. Rütubət 80-90 faiz olacaq.
-
Dekabrın 25-də "Azərbaycan Hava Yolları" QSC-nin (AZAL) Bakı–Qroznı reysini yerinə yetirən "Embraer 190" tipli sərnişin təyyarəsi Qazaxıstanın Aktau şəhəri yaxınlığında qəzaya uğrayıb. Azərbaycanın Aktau şəhərindəki Baş konsulu Ayxan Süleymanlı deyib ki, təyyarədə ekipaj üzvləri ilə birlikdə 67 nəfər uçub, onlardan 38 nəfər həlak olub. Onun vurğulamasına görə, ölənlərin 26-sı Azərbaycan vətəndaşlarıdır.
-
Dekabrın 27-də Bakıda və Abşeronda yağış yağacağı, bəzi yerlərdə intensiv olacağı gözlənilir. Cənub-şərq küləyi əsəcək. Havanın temperaturu gecə 7-9 dərəcə, gündüz 9-11 dərəcə olacaq. Nisbi rütubət 70-80% təşkil edəcək..
Rəy yaz