A.Paşazadə haqqında deyilənləri təkzib etdi

Qafqaz Müsəlmanları İdarəsinin (QMİ) sədri, Şeyxülislam Allahşükür Paşazadə 8 iyul çıxışı ətrafında mətbuatda gedən yazılarla bağlı Turan-a açıqlama verib.

QMİ sədri bəzi mətbuat orqanlarının məscidlərdə iftarlara, siyasi şəxslərin iftar vermələrinə qadağa qoyulması haqda bəyanatları birmənalı olaraq təkzib edib. Məscidlərdə iftar verilməsinin uzun on illəri aşıb gəldiyini deyən QMİ sədri bu niyyətdə olmadığını deyib. İftarlar verilməsinin həmişə tərəfdarı olduğunu deyən A.Paşazadə yalnız bunu siyasiləşdirməyin əleyhinə olduğunu söyləyib. “Əgər bir şəxs ehsan verirsə, bunu Allaha xatir etsin, daha adının və özünün reklamına döndərməsin”, - deyə Şeyxülislam bildirib. O, islamın ehkamlarına söykənərək, təkəbbürün olduğu yerdə nəinki ehsan və iftarın, insanın öz oruc-namazının qəbulunun belə sual altına düşdüyünü xatırladıb. Həm də islamın “sağ əlin verdiyini sol əlin bilməməsi” prinsipini yada salıb. 

A.Paşazadə Azərbaycanda müstəqilliyin ilk illərində olan bir vəziyyətə diqqət çəkib. Onun sözlərinə görə, həmin vaxtlar kənd və rayonların məscidlərə ehtiyacı çox olub. Elə buna görə də deputatlığa namizədlərin çoxu “deputat platfoması”na kənddə və ya rayonda məscid tikdirmək bəndi salırdı. Amma məsələ burasındadır ki, həmin şəxslərdən deputat olan çox olsa da, vədini yerinə yetirən olmayıb. Söz də elə söz olaraq qalıb. -05B-