ASAN Xidmət avtomobillərin texniki baxışına qoşulub

Azərbaycan DİN Kollegiyası respublika ərazisində avtomobillərin məcburi texniki baxışdan keçməsi qaydalarını dəyişib. Yanvarın 8-də Kollegiyanın qərarı ilə avtomobillərin texniki vəziyyətinə və istismarına nəzarət təlimatına prinsipial dəyişikliklər edilib.

Bundan sonra texniki baxışdan keçmə müddəti ləğv edilib. Əvvəlki təlimata əsasən maşının istehsalçısı olan ölkədən asılı olaraq texniki baxışdan ilin müəyyən aylarında keçmək lazım idi. İndi baxış əvvəlki texniki baxışdan sonra avtomobilin icazəli istismar müddəti başa çatdıqdan sonra 20 gün ərzində həyata keçirilməlidir.

Yeni təlimat avtomobilin texniki vəziyyəti yoxlanıldıqdan sonra onun istismarına qadağanı nəzərdə tutmur. Əvvəlki təlimata görə, nasazlığın aradan qaldırılması tələbi irəli sürülərək maşının istfadəsi qadağan oluna bilərdi. İndi belə qadağa ancaq avtobuslara, xüsusi təyinatlı avtomobillərə və kütləsi 3,5 tondan çox olan yük maşınlarına tətbiq edilə bilər.

Avtomobil sahibi texniki baxış zamanı aşkar edilmiş çatışmazlıqları növbəti icbari baxışa qədər il ərzində aradan qaldıra bilər. Əgər çatışmazlıq aradan qaldrılmasa maşın növbəti texniki baxışdan keçməyəcək.

Texniki baxışın keçirilməsinə dair kağız talon ləğv edilir. Onların əvəzinə elektron talon veriləcək, Yol Polisi bunu ASAN Xidmət (Vətəndaşlara Xidmət və Sosial İnnovasiyalar üzrə Dövlət Agentliyi) sistemində yerləşdirəcək. Bu sistemdə elektron talon ASAN Ödəniş portalında yerləşdiriləcək. Oradan isə avtomobil sahibinin şəxsi elektron kabinetinə köçürüləcək. Dublikat avtomobil sahibinin elektron poçtuna göndəriləcək.

Kağız talon sahibin xahişilə ancaq beynəlxalq daşınmalara cəlb edilmiş avtomobillər üçün verilə bilər.

DİN Yol Polisinin rəsmi saytında əvvəlki təlimat yerləşdirilib:https://dyp.gov.az/index.php?/az/content/154. Yeni təlimatın mətni fed.az saytında dərc edilib.

Qeyd edək ki, DİN Kollegiyasında yeni qaydaların qəbulu gecikmə ilə baş verib, nəzərə alaq ki, 2018-ci ilin oktyabrında Nazirlər Kabineti "Nəqliyyat vasitələrinə və onların qoşqularına (yarımqoşqulara) dövlət texniki baxışının keçirilməsi qaydaları haqqında nümunəvi əsasnamə"yə düzəlişlər edib. Düzəlişlərdə üç ay sonra qəbul edilmiş təlimatda qeydə alınan dəyişikliklər əksini tapıb.

Turan "Avtomobillərə texniki baxışın keçirilməsinə cəmi 20 gün ayrılıb" məlumatında yeni texniki baxış qaydaları haqqında bildirmişdi. http://www.turan.az/ext/news/2018/10/free/Social/ru/76025.htm

Turan Yol Polisi əməkdaşları arasında korrupsiya hallarının aradan qaldırılması və texniki baxış prosedurunun sadələşdirilməsi üçün icbari texniki baxışdan keçmə qaydalarının dəyişdirilməsinin vacibliyi barədə məqalə dərc etmişdi.

2018-ci il noyabrın 23-də dərc edilmiş "Azərbaycanda texniki baxış mərkəzlərinə ehtiyac var" yazısında "http://www.turan.az/ext/news/2018/11/free/Social/ru/76878.htm deyilirdi ki, texniki baxışın keçirilməsi ilə bağlı hazırkı müddətdə Dövlət Yol Polisi Baş İdarəsinin Diaqnostika Mərkəzinin imkanları bütün avtoparkın texniki baxışdan keçirilməsinə yol vermir.

Real olaraq mövcud vəziyyətdə avtomobillərin 5%-ə qədəri texniki baxışdan keçir. Yəni, ümumilikdə texniki baxış formal xarakter daşıyır və korrupsiya üçün şərait yaradır. Məqalədə texniki baxış qaydalarının dəyişdirilməsi, icbari texniki baxışın keçirilməsinin özəl təmir mərkəzlərinə həvalə olunması təklif edilirdi.

Bu yenilik sürücünün yaşadığı yerə yaxın mərkəzdə texniki baxışdan keçməsmə şərait yaradır. Hazırda Bakı sakinləri DİN Dövlət Yol Polisi Baş İdarəsinin Zabratdakı Diaqnostika Mərkəzinə getməli olur. Əyalətdə yaşayan avtomobil sahibləri isə regional texniki mərkəzlərə getməlidir.

Yeni təlimatda DİN tərəfindən sertifikatlaşdırılmış özəl texniki mərkəzlərdə texniki baxışın keçirilməsi nəzərdə tutulmayıb. Maraqlı yenilik texniki baxışın qeydiyyatı prosesinə ASAN xidmətin qoşulmasıdır. Lakin əgər avtomobil sahiblərinin DİN Yol Polisinin texniki mərkəzlərinin əməkdaşları ilə əlaqə qurmaq imkanları qalarsa, bu xidmətin texniki baxış zamanı korrupsiya hallarının qarşısının alınmasına necə yardım edəcəyi aydın deyil.