'Azadlığa çıxıb qısa vaxtda həyata vida deyirlər'

Bu günlər Azərbaycan Xalq Cəbhəsi Partiyasının (AXCP)  fəallarından, Qarabağ müharibəsinin veteranı Babək Həsənov  vəfat etdi.Ona xərçəng xəstəliyi diaqnozu qoyulduğu açıqlanmışdı.
B.Həsənov iki dəfə həbs olunub.Sonuncu dəfə o, 2018-ci ildə çirkli pulların yuyulması ittihamı ilə 3 il həbs edilmişdi. Həbsin tamam olmasına qısa bir müddət qalmış əfv olunmuşdu. Hərçənd, ittihamı qəbul etmirdi və bunu siyasi fəaliyyəti ilə əlaqələndirirdi.

İndi 50 yaşlı müxalifətçinin ölümünü yaxınları ölkədə ağır siyasi fəaliyyətin fəsadları sayırlar.O, həbsdə işgəncələrə məruz qaldığını açıqlamışdı, amma rəsmi qurumlar onun şikayətini əsaslı saymamışdılar.

Bundan əvvəl də keçmiş deputat, Milli Şuranın Koordinasiya Mərkəzinin üzvü İbrahim İbrahimli, AXCP sədrinin müavini Gözəl Bayramlı, AXCP üzvü Elnur Fərəcovun da xərçəng xəstəliyindən vəfat etdiyi açıqlanıb. Onlar da həbs həyatı yaşayıblar. Aralarında daha gənc Elnur Fərəcovun həmin xəstəliyə yoluxduğu həbsinin başa çatmasına az qalmış aşkarlanmışdı. O, həbsdən azadlığa çıxdığından aylar sonra vəfat etmişdi. Elnur Fərəcov 2017-ci il mayın 5-də Cinayət Məcəlləsinin 234.2-ci (narkotik vasitələrin satış məqsədilə əldə edilməsi, saxlanması, hazırlanması) maddəsi ilə təqsirli bilinərək 3 il azadlıqdan məhrum edilmişdi.2019-cu ildə əfv olunmuşdu.

Həm Elnur Fərəcov, həm də digər adı çəkilənlər siyasi məhbus siyahılarında yer alıblar.Hərçənd rəsmilər ölkədə siyasi məhbusların olması fikrini qəbul etmirlər.

Milli Məclisin İnsan hüquqları komitəsinin sədri Zahid Oruc Turana bildirib ki, siyasət dünyanın hər yerində özündə müəyyən riskləri daşıyır: “Bu, yalnız həbsə məruz qalıb-qalmamaqla bağlı deyil. Siyasət maraqların ən çox toqquşduğu bir yerdir və bəlkə də birincisidir. Çünki özlüyündə insanların mühüm bir hissəsinin mənafelərinin daşıyıcısına çevrilirsənsə, mütləq başqa bir qrupla da toqquşmaya məruz qalırsan. Ən sivil cəmiyyətlərin özündə də belədir”.

Amma deputatın fikrincə, konkret müxalifət təmsilçilərinin hər hansı biri müəyyən bir dövr cəzaçəkmə müəssisələrində olubsa, “orada ağır xəstəliyə yoluxub və  bu qəsdən edilib” kimi düşüncələri  qeyri-real sayır: “Hakim partiyanın təmsilçiləri də, icra hakimiyyəti nümayəndələri də cinayət törədiblərsə, onlar da həbsə məruz qalıblar. Məsələni dərin araşdırmadan onun barədə fikir söyləmək olmaz. 3-4 nəfər haqqında fikirlə ümumiləşdirmə çox yanlış olar”.

Z.Oruc siyasi münasibətlərin sivilləşməsinin tərəfdarı olduğunu qeyd edib: “Nəhayət bu barrikada təfəkkürü, siyasi düşmənçilik aradan qalxsın. Biz Ermənistanla sülh gündəliyindən bəhs edirik. Amma ölkə içərisində də bəzi qüvvələr var ki, onların davranışları üçün də bu sülh gündəliyi lazımdır. Elə partiya sədrləri var ki, onların vəzifəsi partiya üzvlərini hakimiyyətlə bu və ya digər formada toqquşdurub həbsə məruz qoymaq olmamalıdır”.

O, vurğulayıb ki, insanların siyasi baxışlarından asılı olmadan həbsini istəmir və sonrakı dövrdə onun  ağır nəticələr doğurmasını qətiyyən arzu olunmur.

“Müdafiə Xətti” hüquq müdafiə təşkilatının həmtəsisçi Rüfət Səfərov isə AzadlıqRadiosuna bildirib ki, Azərbaycanda siyasilər illərə məhkum olunarkən, qanunsuz cinayət təqiblərinə məruz qalarkən həyəcan və təlaş qaçılmaz olur.

Ekspertin sözlərinə görə, həbs yerlərinin tibbi-müalicə məsələsində nöqsanlar var: “Məhkumlar müalicəyə, ixtisaslı həkimlərin məsləhətinə çata bilmirlər. Siyasi məhbusların bəzisi məhz cəza evlərində, istintaq təcridxanalarda qazandığı xəstəliklərdən sonra azadlıqda çıxıb qısa müddətdə həyata vida deyirlər”.

Bu fikirə Penitensiar Xidmətdən münasibət almaq isə mümkün olmayıb.Amma qurumdan bundan əvvəl deyiblər ki, Azərbaycanın cəzəçəkmə-müəssisələrində məhbusların istər tibbi, istərsə də digər hüquqları qaunuvericliyin tələblərinə uyğun qorunur.