Azərsu-nun zərərləri qarşılamaq üçün yazdığı əlavə borclar

Bakı/08.12.21/Turan: Saray Bağları bağ massivinin sakini Kamal Əli ev tikir, məskunlaşmağa hazır olmasına hələ çox var. Ötən il Azərsu işçilərinin iştirakı ilə sayğacı sıfırlayıb. Əvvəlki torpaq sahibi öz borcunu ödəyib.

Evdə sakin olmadığına görə, yalnız çay hazırlamaq, bəzən məhlulları qarışdırmaq üçün sudan istifadə edən ustalar olduğuna görə su sərfiyyatı çox azdır - ayda təxminən 10-20 manatlıq fakturalar gəlirdi.

Apreldə nəzarətçi gözlənilmədən qapıya 600 manat borc göstərilən faktura yapışdırıb. Sumqayıt Su Kanalı İdarəsinin işçisi ilə yazışdıqdan, WhatsApp vasitəsilə ona sayğacın fotoşəkli göndərildikdən sonra işçi üzrxahlıqla cavab verib: “sistemin səhvidir, faktura ləğv edilib”.

Payıza qədər hər şey normal idi. Bu ilin oktyabrında isə sayğacda 41 kubmetr su istifadəsi göstərildiyi halda, 190 manatlıq mifik faktura gəlib. Fakturanı təqdim edən nəzarətçi deyib ki, o, sayğacdan mövcud göstəriciləri götürüb, ondan artıq olan hissəni isə sistem əlavə edib. Nəzarətçi sistemdəki məlumatları dəyişdirmək səlahiyyətinə malik olmadığı üçün abunəçiyə problemi idarədə aydınlaşdırmağı təklif edib.

Sumqayıt Su Kanalı İdarəsində idarə rəisinin müavinin kabinetində kompüterdəki məlumatlar bazası yoxlanılıb və məlum olub ki, 190 manatlıq faktura qanunsuzdur. Rəis müavini Kamal Əliyə bildirib ki, yol verilmiş səhvə görə nəzarətçi cəzalandırılacaq.

İki “səhv” unudulub, “kimin başına gəlmir ki?!”. Amma bu ilin noyabrında elə həmin vətəndaş istifadə olunan su üçün eyni rəqəm - 190 manat borc göstərilən üçüncü fakturanı alıb.

Su Kanalı İdarəsində abunəçinin qəzəbli qışqır-bağırını dinlədikdən sonra göstəriciləri yoxlayıblar və vətəndaşa belə deyiblər: “işçimizin səhvidir, o, yes düyməsinə basmayıb”.

İndi o, istənilən mifik məbləğin göstərilə biləcəyi dördüncü, beşinci qəbzi gözləyir. Kamal Əli Azərsu-nun istehzalarına son qoymaq üçün Sumqayıt məhkəməsinə müraciət etmək mümkünlüyünü nəzərdən keçirir.

O, bu idarənin dəhlizlərində keçirdiyi saatlar ərzində qarmaqarışıqlıq, abunəçilərin növbəsinin olmamasını, bəzi ziyarətçilərin daha yüksək səslə qışqıraraq digərlərinin səsini basdırmağa çalışdığını, ziyarətçiləri qəbul edən əməkdaşların çaş-baş qaldığını müşahidə edib. Sumqayıt idarəsi sovet Mənzil İstismar İdarələri kimi işləyir – müasir işin təşkili metodları tətbiq edilmir, abunəçilər istənilən vəzifənin həlli üçün oraya şəxsən getməli olur. Pandemiyaya baxmayaraq, orada online rejimdə heç nə həll olunmur.

Kamal Əli üç həftədir orada əsəbi və yorğun ziyarətçilər arasında şəxsən növbə gözləyərək sadə vəzifəni – iki torpaq sahəsinin əvvəlki sahiblərinin abunəçilik müqavilələrinin öz adına keçirilməsini məsələsini həll etməyə çalışır. Bu arada, şirkət rəhbərliyinin istəyi olsa, bürokratik prosedurları çox tez həll etmək olar. Elə həmin vətəndaş qaz idarəsi ilə abunə müqaviləsini asanlıqla öz adına keçirib: öz qapısının ağzında şəxsiyyət vəsiqəsinin və Dövlət Əmlak Reyestrindən çıxarışın surətini qaz idarəsinin nəzarətçisinə təqdim edib. Vəssəlam! Növbəti aydan etibarən istifadə olunan qazın fakturası torpaq sahəsinin əvvəlki deyil, indiki sahibinin adına gəlir.

Saxta fakturalar bütün Azərbaycan ərazisində Azərsu ASC-nin işində adi təcrübədir. Bakının rusdilli sakinləri 2019-cu ildə Disput.az-da “Azərsu-da özbaşınalıq” mövzusunda forum açıblar, burada bu idarənin saxtakarları ilə mübarizə təcrübələrini bölüşüblər.

Boob yazırdı: “Saxta faktura ilə bağlı prezident.az-a şikayət yazdım, eyni zamanda Təbriz küçəsində yerləşən “Azərsu”ya getdim. Qadın çoxmənalı şəkildə soruşur: kiməsə müraciət etmisiniz? Rəisimiz gəlib deyib ki, faktura yoxlanılsın. Nəticədə faktura düzəldildi və indi uzun müddətdir ilk dəfədir ki, mən onlara deyil, onlar mənə bir neçə manat borcludurlar. Odur ki, ey insanlar, prezidentin saytı həmişə cavab verməsə də, onlar səssizcə öz işlərini görürlər, bu isə ən əsas məsələdir!”.

Sumqayıt Su Kanalı İdarəsindən Kamal Əliyə istifadə olunmuş su üçün üç dəfə şişirdilmiş faktura təqdim edilməsini “sistem səhvi” ilə izah ediblər. Sistemləri səhv etmək xüsusiyyətinə malikdirsə, niyə bunu abunəçilərin deyil, həmişə idarənin xeyrinə edir?

Cavabı su inhisarçısı Azərsu-nun hər il zərərlə işləməsi faktında axtarmaq lazımdır. Təşkilatın maliyyə hesabatına əsasən, 2020-ci ilin yekunlarına görə Azərsu ASC-nin xalis gəliri 323,222 mln. manat təşkil edib, bu da 2019-cu ilin göstəricisindən 45,6% azdır. Abunəçilərə əlavə borclarla saxta fakturalar göndərən ASC mifik borcların bir hissəsini ala biləcəyinə və bu pullarla rəhbərliyin səriştəsizliyi və rüşvətxorluğu nəticəsində yaranmış öz real borcunu ödəməyə ümid edir. –0—